Read Waray Samarenyo Meaning Based 2 Cronicas 1 Bible Online

2 Cronicas 1 - Waray Samarenyo Meaning Based bible

2 Cronicas 1

¹Madig-on an pagpangulo ni Solomon nga anak ni Hadi David, han ginhadian han Israel, ngan ginbendisyonan hiya han GINOO nga iya Dyos hin damo nga kaupayan ngan ginhimo hiya nga labi kagamhanan nga hadi.

²Ginpatugonan ni Hadi Solomon an ngatanan niya nga mga opisyal nga tinaporan hin tinagyukot ngan tinaggatos nga mga sondalo, ngatanan nga mga opisyal han gobyerno, ngatanan nga mga puno han mga panimalay, ngan ngatanan nga mga tawo,

³basi makaupod hira ha iya ngadto han siringbahan nga dapit ha Gabaon. Kinmadto hira kay didto ibutang an Tulda nga inuokyan han GINOO, nga ginhimo ni Moises nga surugoon han GINOO didto ha kamingawan. (

⁴Kundi nakadto ha Jerusalem an Kahon han Ginsaaran nga ginbutang dida hin tulda nga gintindog ni Hadi David han pagdad-a niya han Kahon tikang ha Kiriat Jearim.)

⁵Nakadto liwat ha Gabaon, ha atubangan han Tulda nga inuokyan han GINOO, an bronse nga altar nga ginhimo ni Besaleel nga anak ni Uri ngan apo ni Hur. Didto ginsingba an GINOO ni Hadi Solomon ngan han ngatanan nga mga tawo.

⁶Ha atubangan han Tulda ginsingba han hadi an GINOO pinaagi hin paghalad hin mga hayop nga tutuboron ha altar nga bronse; ginpaihaw niya in usa ka yukot nga mga mananap ngan gintubod nga bug-os ha bawbaw hini nga altar.

⁷Hito nga gab-i pinmakita kan Solomon an Dyos ngan nagpakiana, “Ano an imo karuyag nga akon ihahatag ha imo?”

⁸Binmaton hi Solomon, “Ginpakita mo in dako ngan waray paglubad nga paghigugma kan David nga akon amay, ngan yana ginpasunod mo ako ha iya nga hadi.

⁹O GINOO nga Dyos, tumana an saad nga ginhimo mo han akon amay. Ginhimo mo ako nga hadi hin mga tawo nga uraura hin kadamo nga makuri maihap,

¹⁰sanglit tagi ako hin kinaadman ug hibaro nga akon kinahanglan hin pagdumara ha ira. Kay hin-o in makakagdumara hin maupay hin sugad ka damo nga mga tawo?”

¹¹Nagbaton kan Solomon an Dyos, “Waray ka magsayop han imo ginpili. Waray ka mangaro hin karikohan o manggad, kabantogan, kamatayon han imo mga kaaway, o bisan hin hilawig nga kinabuhi para ha imo ngahaw, kundi pinangaro mo lugod in kinaadman ug hibaro basi makagdumara ka han akon mga tawo nga akon ginpahadian ha imo.

¹²Tatagan ko ikaw hin kinaadman ug hibaro. Ngan labot hini, tatagan ko ikaw hin karikohan, manggad, ug kabantogan nga labaw han naangkon hin bisan hin-o nga hadi nga una ha imo o maaangkon han masunod ha imo.”

¹³Sanglit binayaan[1] ni Solomon an siringbahan nga dapit didto ha Gabaon nga diin nakadto an Tulda nga inuokyan han GINOO, ngan binmalik hiya ha Jerusalem. Didto naghadi hiya han Israel.

¹⁴Gintirok niya in 1,400 nga mga karuwahe ngan 12,000 nga dikabayo nga mga sondalo. Ginbutang niya ha Jerusalem an pira hini ha ira, ngan ginbutang niya an iba didto ha magkalainlain nga mga syudad.

¹⁵Ha panahon han iya paghadi nahimo nga sugad la hin bato ka komon an salapi ug bulawan ha Jerusalem, ngan an mga kahoy nga sidro sugad la kadamo han sikomoro nga mga kahoy nga naturok bisan diin nga dapit ha ubos han mga kapungtoran han Juda.

¹⁶An mga magparatigayon han hadi amo an labi nga maaram magbaligya hin mga kabayo tikang ha Musri[2] ug Cilicia,[3]

¹⁷ngan an pagbaligya hin mga karuwahe tikang ha Ehipto. Ginbaligyaan nira hin mga kabayo ngan mga karuwahe an mga Hiteohanon ug Siriahanon nga kahadian, nga pinapalit ha ira hin 600 ka bug-os nga salapi an kada usa nga karuwahe, ngan 150 ka bug-os nga salapi an kada usa nga kabayo.[4]