Read Waray Samarenyo Meaning Based 2 Cronicas 10 Bible Online

2 Cronicas 10 - Waray Samarenyo Meaning Based bible

2 Cronicas 10

¹Nasingadto hi Roboam ha Siquem diin nagtitirok an ngatanan nga mga tawo han amihanan nga Israel basi himoon hiya nga hadi.

²Han kasumati hini kan Jeroboam nga anak ni Nabat nga kinmadto ha Ehipto hin pagpalagiw kan Hadi Solomon, inmoli hiya.

³Ginpasugoan hiya han mga tawo han amihanan nga mga tribo ngan hira ngatanan nasingadto kan Roboam ngan nagsiring ha iya,

⁴“Ginpakurian kami ni Solomon, an imo amay ngan ginpabug-atan kami niya. Kon makahimo ka hin pagpagaan ngan pagmasarosayon han amon kinabuhi, magmamaunongon kami nga imo mga sakop.”

⁵Binmaton hi Roboam, “Balik kamo katapos hin tulo ka adlaw ngan babatonon ta kamo.” Sanglit nagkalakat hira.

⁶Ginpakianhan ni Hadi Roboam an larolagas nga mga tawo nga nag-alagad nga mga magsaragdon ni Solomon nga iya amay, “Ano an iyo isasagdon nga sadang ko ibaton hini nga mga tawo?”

⁷Binmaton hira, “Kon karuyag mo nga magmaupay an imo pag-alagad hini nga mga tawo ihatag an ira pinangangaro ngan dayuday mag-aalagad hira ha imo.”

⁸Kundi nagpakabungol la hi Roboam han sagdon han larolagas nga mga tawo ngan kinmadto lugod hiya han batan-on nga kalalaken-an nga katubo niya ngan amo na an iya mga magsaragdon.

⁹Nagpakiana hiya, “Ano an iyo isasagdon nga akon bubuhaton? Ano an akon isisiring ha mga tawo nga naghangyo ha akon nga pagan-on ko an ira mga darad-on?”

¹⁰Binmaton hira, “Amo ini an imo isisiring ha ira: ‘Darudako an akon tamuyingking kay han hawak han akon amay.’

¹¹Sidnga hira, ‘Kon pinabug-atan kamo han akon amay; maburubug-at pa an akon ipapapas-an ha iyo. Ginlamba kamo niya hin mga latigo; kundi kakastigohon ta kamo hin mga balbag!’”

¹²Katapos hin tulo ka adlaw, binmalik kan Roboam hi Jeroboam ngan an ngatanan nga mga tawo sumala han iya tugon ha ira.

¹³Ngan nasinahan la lugod hira. Ginpabay-an niya an sagdon han larolagas nga mga magsaragdon,

¹⁴ngan ginhimangrawan niya an mga tawo sumala han siring han iya batan-on nga mga magsaragdon. Nagsiring hiya, “Kon ginpabug-atan kamo han akon amay; maburubug-at pa an akon ipapapas-an ha iyo. Ginlamba kamo niya hin mga latigo; kakastigohon ko kamo hin mga balbag.”

¹⁵Kaburot-on ini han GINOO nga Dyos nga matuman an iya iginyakan kan Jeroboam nga anak ni Nabat pinaagi kan manaragna Ahias nga taga-Silo. Sanglit waray an hadi mamati han mga tawo.

¹⁶Han pakasabot han mga tawo nga diri gud mamamati ha ira an hadi, ginmoliat hira, “Mapukan hi David ngan an iya panimalay! Ano gud an ira nabuhat para ha aton? Mga tawo han Israel, panguli kita! Pasagdi ta hi Roboam!” Sanglit sinmupil an mga tawo han Israel,

¹⁷ngan ginbayaan hi Roboam nga hadi han mga tawo nga nag-uokoy ha katunaan han Juda.

¹⁸Niyan ginsugo ni Hadi Roboam hi Adoniram nga tinaporan han pinugos nga pagtrabaho, hin pagkadto han mga Israelita, kundi ginbato hiya nira ngada han kamatay. Tungod hini sinmakay dayon hi Roboam han iya karuwahe ngan kinmalagiw ngadto ha Jerusalem.

¹⁹Tikang hadto nga panahon sinmupil han panimalay ni David an mga tawo han amihanan nga ginhadian han Israel.