Read Waray Samarenyo Meaning Based 2 Cronicas 13 Bible Online

2 Cronicas 13 - Waray Samarenyo Meaning Based bible

2 Cronicas 13

¹Dida han ika-18 ka tuig han pagkahadi ni Hadi Jeroboam han Israel, nahimo nga hadi han Juda hi Abias,

²ngan naghadi hiya hin tulo ka tuig ha Jerusalem. Hi Micaias nga iroy niya amo an anak ni Uriel nga taga syudad han Gabaa. Nag-away hira Abias ug Jeroboam.

³Nagtukod hi Abias hin 400,000 nga mga sondalo ngan inmato ha iya hi Jeroboam nga may 800,000 nga mga sondalo.

⁴Nagkatapo an mga kasondalohan nira nga duha didto han sagkahon nga katunaan han Efraim. Sinmagka ha Bukid Semeron hi Hadi Abias ngan gintawag hi Jeroboam ngan an mga Israelita: “Pamatii ako niyo!” nagsiring hiya.

⁵“Diri ba kamo maaram nga naghimo an GINOO nga Dyos han Israel hin ginsaaran kan David, ngan ginhatag kan David ngan han iya mga tulin an dayon nga pagkahadi han Israel?

⁶Sinmupil kan Solomon nga iya hadi hi Jeroboam nga anak ni Nabat.

⁷Niyan nagtirok hiya hin hugpo hin mga bugoy nga inmato kan Roboam nga anak ni Solomon; batan-on pa hi Roboam ngan diri pa gud batid hin pakig-away.

⁸Yana buot kamo makiaway han ginhadian han GINOO nga iginhatag han GINOO ha mga tulin ni David. May-ada niyo damo nga kasondalohan ngan aada ha iyo an bulawan nga mga baka nga ginhimo ni Jeroboam nga iyo kadiyosan.

⁹Ginpaiwas niyo an kapadian han GINOO, nga mga tulin ni Aaron ngan ginpaiwas niyo an mga Levita. Iyo ginliwanan hira hin kapadian sugad han ginbuhat han iba nga mga nasod. Bisan hin-o nga magdara hin todo nga baka o pito nga mga karnero nahihimo nga padi hito nga iyo gintatawag nga kadiyosan.

¹⁰“Kundi gin-aalagad pa namon an GINOO ngan waray kami magsikway ha iya. Nagtutuman han ira mga katungdanan an kapadian nga tikang kan Aaron ngan binubuligan hira han mga Levita.

¹¹Naghahalad hira hin insyenso ngan hin hayop nga gintutubod hin bug-os kada aga ug gab-i. Gindadara nira an mga halad nga tinapay ngadto ha lamesa nga malinis sumala han seremonyas, ngan gindadagkotan nira kada gab-i an mga suga ha kandilero nga bulawan. Ginbubuhat namon an iginsugo han GINOO, kundi iginsikway hiya niyo.

¹²An GINOO ngahaw amo an amon pangulo ngan aanhi an iya kapadian nga may mga trompeta nga andam hin pagpatunog hini ngan pagtawag ha amon hin pakig-away ha iyo. Mga tawo han Israel, ayaw kamo pakiaway han GINOO nga Dyos han iyo kaapoy-apoyan! Diri kamo makakadaog!”

¹³Hito manta nga takna nagsugo hi Jeroboam hin iya mga sondalo hin paggama tikang ha talikoran han kasondalohan han Juda samtang pinakiawayan nira an iba ha atubangan.

¹⁴Hinkit-an han mga kasondalohan han Juda nga ginpapalibotan hira. Nagtawag hira han GINOO hin pakibulig ngan nagtrompeta an kapadian.

¹⁵Naggogliat hin dako an mga sondalo han Juda ngan sinmulong hira nga ginmandoan ni Abias; ginpirde han Dyos hi Jeroboam ngan an kasondalohan nga Israelita.

¹⁶Nanngalagiw tikang han mga sondalo han Juda an mga Israelita ngan igintubyan hira han Dyos ngadto han mga sondalo han Juda.

¹⁷Ginpirde ni Abias ngan han iya kasondalohan hin makalilisang nga pagkapirde an mga Israelita—pinamatay in 500,000 han gimamag-upayi nga mga sondalo han Israel.

¹⁸Sanglit nagmadinaogon kontra han Israel an mga tawo han Juda kay sinmarig hira han GINOO nga Dyos han ira kaapoy-apoyan.

¹⁹Ginlanat ni Abias an kasondalohan ni Jeroboam ngan nakuha nira in pira han iya mga syudad: an Betel, Jesana, ug Efron, ngan an kabaryohan nga hirani han tagsa hini nga mga syudad.

²⁰Waray na gud mabawi ni Jeroboam an iya gahom ha sakob han pagkahadi ni Abias. Ha kataposan ginhampak hiya han GINOO ngan namatay hiya.

²¹Kundi nagtikagamhanan la hi Abias. May-ada niya 14 nga mga asawa, ngan amay hiya hin 22 nga mga anak nga kalalaken-an ug 16 nga kababayen-an.

²²Nahisurat an iba nga kasaysayan ni Abias, an iya ginyakan ngan an iya ginbuhat dida han Kasaysayan ni Ido nga Manaragna.