Read Waray Samarenyo Meaning Based 2 Cronicas 15 Bible Online

2 Cronicas 15 - Waray Samarenyo Meaning Based bible

2 Cronicas 15

¹Inmabot an espiritu han Dyos kan Asarias nga anak ni Obed,

²ngan ginmawas hiya pagsugat kan Hadi Asa. Nagtawag hiya, “Pamatii ako, Hadi Asa, ngan kamo ngatanan nga mga tawo han Juda ug Benjamin! Upod niyo an GINOO samtang nga upod kamo niya. Kon mamiling kamo ha iya, hiaagian hiya niyo, kundi kon bumaya kamo, isisikway kamo niya.

³Sulod hin maiha nga panahon nag-ukoy an Israel nga waray matuod nga Dyos, waray kapadian nga nagtututdo ha ira, ngan waray balaod.

⁴Kundi han pag-abot hin kakurian, dinmangop hira han GINOO nga Dyos han Israel. Ginbiling hiya nira ngan hin-agian hiya.

⁵Hito nga mga adlaw makulba ngan makaharadlok an paglinakatlakat kay may kakurian ngan kasamokan ha tagsa nga tuna.

⁶Gintalumpigos hin usa nga nasod in lain nga nasod, ngan gintalumpigos hin usa nga syudad in lain nga syudad, kay gindad-an hira han Dyos hin kasamokan ug kakurian.

⁷Kundi kinahanglan magmakusog kamo ngan diri kamo mahulop. Babaloson an iyo ginbubuhat.”

⁸Han pakabati ni Asa han panagna nga iginhimangraw ni Asarias nga anak ni[21] Obed, nadasig hiya. Ginkuha niya an ngatanan nga mga diyosdiyos ha tuna han Juda ug Benjamin ngan an ngatanan nga mga diyosdiyos ha mga syudad nga nabihag niya ha sagkahon nga katunaan han Efraim. Gin-ayad liwat niya an altar han GINOO nga natindog ha bungsaran han Templo.

⁹Dinmapig kan Asa in damo nga mga tawo tikang ha Efraim, Manases, ug Simeon ngan nag-ukoy hira ha iya ginhadian, kay hinkit-an nira nga upod niya an GINOO. Ginpatawag ni Asa hira ngatanan ngan an mga tawo han Juda ug Benjamin.

¹⁰Nagtitirok hira ha Jerusalem ha ikatulo nga bulan han ika-15 ka tuig nga pagkahadi ni Asa.

¹¹Hito nga adlaw naghalad hira ngadto han GINOO hin mga hayop nga tutuboron tikang han mga gintikas: 700 nga mga baka ngan 7,000 nga mga karnero.

¹²Naghimo hira hin ginsaaran diin nagkasarabot hira hin pagsingba han GINOO nga Dyos han ira kaapoy-apoyan ha bug-os nira nga kasingkasing ug kalag.

¹³Papatayon an bisan hin-o nga batan-on o tigurang, lalake o babaye nga diri magsingba ha iya.

¹⁴Ha dako nga tingog nagsumpa hira ha ngaran han GINOO nga ira tutumanon an ginsaaran, ngan katapos naggogliat ngan nagtrompeta hira.

¹⁵Malipayon an ngatanan nga mga tawo han Juda kay ginhimo nira ha bug-os nga kasingkasing ini nga ginsaaran. Nalipay hira ha pagsingba han GINOO, ngan ginkarawat hira niya ngan gintagan hira hin kalinaw ha ngatanan nga dapit.

¹⁶Gintangtang ni Hadi Asa hi Maaca nga apoy niya han iya katungdanan nga iroy nga rayna, kay naghimo hiya hin malaw-ay nga ladawan ni Asera nga diyosa. Gintiak ni Asa an diyosdiyos, ngan ginsunog didto ha Kahamub-an Kidron.

¹⁷Bisan kon waray pagrub-a ni Asa an ngatanan nga pagano nga mga siringbahan, nagpabilin hiya nga matinumanon ha GINOO ha bug-os niya nga kinabuhi.

¹⁸Iginbutang niya ha Templo an ngatanan nga mga iginhalad ha Dyos ni Abias nga iya amay, sugad man an bulawan ug salapi nga mga garamiton nga iya iginhalad.

¹⁹Waray na gud araway ngada han ika-35 ka tuig nga iya pagkahadi.