Read Waray Samarenyo Meaning Based 2 Cronicas 19 Bible Online

2 Cronicas 19 - Waray Samarenyo Meaning Based bible

2 Cronicas 19

¹Binmalik nga talwas hi Hadi Josafat han Juda ngadto han iya palasyo ha Jerusalem.

²Kinmadto pagtapo han hadi in manaragna nga hi Jehu nga anak ni Hanani, ngan nagsiring ha iya, “Matadong ba ha imo hunahuna an pagbulig hadton mga magraot ngan pagdapig hadton mga nasisina han GINOO? Nasinahan ka han GINOO tungod han imo ginbuhat.

³Kundi bisan pa hini, may-ada gihapon maupay dida ha imo. Ginkuha mo an ngatanan nga mga ladawan han diyosa nga hi Asera nga ginsingba han mga tawo, ngan nagtinguha ka hin pagsunod han kaburot-on han Dyos.”

⁴Bisan kon nag-ukoy ha Jerusalem hi Hadi Josafat, dayuday hiya nagsusudoy han mga tawo tikang ha Berseba ha timogan ngadto ha sidsid han sagkahon nga nasod han Efraim ha amihanan, basi pabalikon niya an mga tawo ngadto han GINOO nga Dyos han ira kaapoy-apoyan.

⁵Nagtudlok hiya hin mga maghurukom ha kada usa han pinaderan nga mga syudad han Juda,

⁶ngan gintugon hira: “Paghirot kamo hin paghukom; diri ini tungod hin kaburot-on han tawo, kundi kaburot-on ini han GINOO, ngan upod hiya niyo kon naghuhukom kamo.

⁷Tahora niyo an GINOO ngan paghinay kamo kay diri matugot an GINOO nga aton Dyos nga maglimbong kamo o may-ada niyo mga pinili, o magkarawat kamo hin mga hukip.”

⁸Ha Jerusalem nagtudlok hi Josafat hin mga Levita, kapadian, ngan hin pira han mga dumagko nga mga tuminungnong nga mga maghurukom hin mga kalipongan bahin hin pagsupak han Balaod han GINOO o mga turuhayon han mga umurokoy han syudad.[23]

⁹Gintugon niya hira: “Kinahanglan buhaton niyo an iyo mga katungdanan ha pagtahod han GINOO, nga magsugot kamo ha iya nga matinumanon ha ngatanan nga iyo ginbubuhat.

¹⁰Kon an iyo igkasi mga tuminungnong tikang ha usa hini nga mga syudad may-ada sumbong bahin hin pagpatay o bisan ano nga pakasupak hin balaod o sugo, kinahanglan tugonon hin maupay niyo hira kon uunanhon nira hin pag-atubang han bista, basi diri hira makasala han GINOO. Gawas kon buhaton ini niyo, aabaton niyo ngan han iyo igkasi mga tuminungnong an kasina han GINOO. Kundi kon pagbuhaton niyo an iyo katungdanan, diri kamo makakasala.

¹¹Hi Amarias nga Labaw nga Padi amo an kataposan nga magtutuhay han ngatanan nga kalipongan mahitungod han GINOO, ngan hi Sabadias nga anak ni Ismael nga gobernador han Juda, amo an kataposan nga labaw nga magtutuhay han ngatanan nga kalipongan mahitungod han hadi. May katungdanan an mga Levita nga kinahanglan matuman an mga paghukom han mga hukmanan. Pagmadasigon kamo ngan pagtumana niyo ini nga mga tugon ngan diri mabulag an GINOO han matadong!”