Read Waray Samarenyo Meaning Based 2 Cronicas 2 Bible Online

2 Cronicas 2 - Waray Samarenyo Meaning Based bible

2 Cronicas 2

¹Nagbuot hi Hadi Solomon nga magtindog hin templo diin pagsisingbahon an GINOO, ngan magtindog liwat hin palasyo para ha iya.

²Nagtudlok hiya hin 70,000 nga mga tawo nga parahakot han mga materiales ngan 80,000 nga mga tawo nga paratabas hin mga bato. An mga tawo nga tinaporan hini nga buruhaton 3,600 an tanan.

³Nagpatugon hi Solomon hini nga mensahe kan Hadi Hiram han Tiro: “Pakigsabot ha akon sugad han imo ginbuhat ha akon amay han imo pagbaligyai ha iya hin mga kahoy nga sidro para hin pagtindog han iya palasyo.

⁴Nagtitindog ako hin templo ha pagpasidungog han GINOO nga akon Dyos. Magigin baraan ini nga dapit nga pagsisingbahan ko ngan han akon mga tawo pinaagi hin pagsunog hin maghamot nga mga insyenso diin magpapadayon kami hin paghalad ha iya hin baraan nga tinapay, ngan maghahalad kami hin mga hayop nga tutuboron kada aga ug gab-i, sugad man ha mga Adlaw nga Iparahuway, mga Pyesta han Bag-o nga Subang han Bulan, ngan iba pa nga baraan nga mga adlaw nga makakagsingba kami han GINOO nga amon Dyos. Ginsugo niya an Israel nga buhaton ini ha kadayonan.

⁵Naghuhunahuna ako hin pagtindog hin dako nga templo, kay gamhanan an amon Dyos labaw pa hin bisan hin-o nga diyos.

⁶Ha pagkatinuod, waray gad makakatindog hin templo para han Dyos, kay bisan pa an bug-os nga kalangitan diri igo para ha iya. Sanglit hin-o ngani ako nga magtitindog hin templo para ha iya? An akon la mahihimo amo an pagtindog hin templo diin pagsusunogan hin insyenso ngadto ha Dyos.

⁷Sanglit yana padad-i ako hin tawo nga batid hin paghimo hin mga butang tikang hin bulawan, salapi, bronse, ug puthaw, ngan maupay maghablon hin mga badoon nga asol, granate, ngan pula, ngan mga batid magborda ha mga kahoy, metal, ug badoon, basi makabulig han akon mga trabahador dinhe ha Juda ug Jerusalem nga ginpili han akon amay.

⁸Maaram ako nga batid an imo mga paragkahoy, sanglit padad-i ako hin sidro, palotsina, ug sandalo nga mga troso tikang ha Libano. Andam ako hin pagpadara han akon mga tawo hin pagbulig han imo mga tawo

⁹basi madarodamo an madara nga mga kahoy, kay magigin dako ngan matahom gud ini nga templo nga akon titindogon.

¹⁰Para han pagkaon han imo mga paragkahoy, padadad-an ko ikaw hin 46,667 ka bakid nga trigo, 46,667 ka bakid nga sebada, 110,000 ka galon nga bino, ngan 110,000 ka galon nga lana hin olibo.”

¹¹Ginbalos ni Hadi Hiram hi Solomon. Nagsurat hiya, “Tungod nga hinihigugma han GINOO an iya mga tawo, ginhimo ka niya nga ira hadi.

¹²Dayawon an GINOO nga Dyos han Israel, nga Magburuhat han langit ug tuna! Iginhatag niya kan Hadi David in makinaadmananon nga anak nga puno hin kinaadman ug sarabotan, nga yana nagbuot hin pagtindog hin templo para han GINOO ngan hin palasyo para ha iya.

¹³Ginpapadara ko ha imo hi Hiram, usa nga tawo nga maaram ngan batid bahin hini nga trabaho.

¹⁴Sakop han tribo ni Dan an iroy niya ngan taga-Tiro an iya amay. Maaram hiya maghimo hin mga butang nga bulawan, salapi, bronse, puthaw, bato, ug kahoy. Nakakagborda hiya hin asol, granate, ug pula nga dugnit ngan hin lino. Nakakahimo hiya han ngatanan nga pagdibuho ngan nakakasunod han bisan ano nga borda nga ipapagbuhat ha iya. Magtratrabaho hiya upod han imo batid nga mga tawo ngan hadton mga tawo nga ginpili ni Hadi David nga imo amay.

¹⁵Sanglit yana ipadara ha amon an trigo, sebada, bino, ngan lana hin olibo nga imo iginsaad.

¹⁶Pupudlon namon ha Kabukiran han Libano an ngatanan nga sidro nga imo kinahanglan, pagtatabawon ini ha dagat tubtob ha Jope. Tikang didto an imo na mga tawo an magdadara han mga kahoy ngadto ha Jerusalem.”

¹⁷Ginpaihap ni Hadi Solomon an ngatanan nga mga lumalangyaw nga nag-uokoy ha tuna han Israel, sugad han ginbuhat hadto ni David nga iya amay. May-ada 153,600 nga nag-uokoy nga mga lumalangyaw.

¹⁸Gintudlok niya in 70,000 ha ira hin paghakot han mga materiales ngan 80,000 hin pagtabas hin mga bato ha kabukiran, ngan 3,600 nga mga tinaporan nga magpapalakat hin maupay han mga buruhaton.