Read Waray Samarenyo Meaning Based 2 Cronicas 20 Bible Online

2 Cronicas 20 - Waray Samarenyo Meaning Based bible

2 Cronicas 20

¹Paglabay hini nga panahon, ginsulong an Juda han mga kasondalohan han Moab ug Amon kaupod an mga Meunitanhon[24] nga ira kasagabay.

²Inmabot in mga magsarangyaw ngan nagsumat kan Hadi Josafat: “Nagkaabot pagsulong ha imo in damo nga kasondalohan nga taga-Edumea tikang ha luyo han Dagat Pula. Nakuha na nira an Asasontamar.” (Lain ini nga ngaran han En-gadi.)

³Kinalasan hi Josafat ngan nag-ampo han GINOO nga tutdoan hiya kon ano an maupay buhaton. Niyan nagsugo hiya nga magpuasa an bug-os nga nasod.

⁴Tikang han tagsa nga syudad han Juda nagdagmit an mga tawo hin pagkadto ha Jerusalem hin paghangyo han GINOO nga tutdoan hira,

⁵ngan nagtitirok hira ug an mga tawo han Jerusalem didto han bag-o nga bungsaran han Templo. Kinmadto ngan tinmindog hi Hadi Josafat ha atubangan nira

⁶ngan nag-ampo hin dako nga tingog, “O GINOO nga Dyos han amon kaapoy-apoyan, naghahadi ka tikang ha langit han ngatanan nga mga nasod han kalibutan. Gamhanan ngan makusog ka, ngan waray makakaato ha imo.

⁷Amo ikaw an amon Dyos. Han pagbalhin han imo mga tawo nga Israel nganhi hini nga tuna, ginpaiwas mo an mga tawo nga nag-uokoy dinhe ngan ginhatag mo an tuna ha mga tulin ni Abraham, an imo sangkay, nga magin ira ha kadayonan.

⁸Nag-ukoy na hira dinhe ngan nagtindog hin templo hin pagpasidungog ha imo, ngan maaram hira

⁹nga kon pagkastigohon hira hin bisan ano nga karat-an—araway[25] o sakit o gutom—makakahimo hira hin pagkanhi ngan hin pag-atubang hini nga Templo diin ikaw ginsisingba. Makakag-ampo hira ha imo ha ira kakurian ngan pamamatian ngan tatalwason mo hira.

¹⁰“Yana ginsulong kami han mga tawo han Amon, Moab, ug Edumea. Han pagkagawas ha Ehipto han amon kaapoy-apoyan, waray mo hira tugoti hin pagsulod hito nga mga tuna. Sanglit ginlipasan la han amon kaapoy-apoyan ini nga mga tuna ngan waray ini nira pagbungkaga.

¹¹Amo ini an ira iginbabalos ha amon—nakanhi hira hin pagpaiwas ha amon han tuna nga iginhatag mo ha amon.

¹²Amo ikaw an amon Dyos! Kastigoha hira kay makalolooy kami ha atubangan hini nga damo nga kasondalohan nga nasulong ha amon. Diri kami maaram kon ano an amon bubuhaton, sanglit nakikibulig kami ha imo.”

¹³Nagkatukdaw didto ha Templo an ngatanan nga kalalaken-an han Juda upod an ira kaasaw-an ug kabataan.

¹⁴Inmabot an espiritu han GINOO ngada hin usa nga Levita nga nakada ha kadam-an nga mga tawo. An iya ngaran hi Jahasiel, ngan anak hiya ni Zacarias. Sakop hiya han banay ni Asaf ngan tulin hiya ni Asaf pinaagi kan Matanias, Jeiel, ug Benaya.

¹⁵Nagsiring hi Jahasiel, “Harangdon nga Hadi ngan kamo ngatanan nga mga tawo han Juda ug Jerusalem, nasiring an GINOO nga kinahanglan diri kamo mahulop o mahadlok hin pag-atubang hini nga damo nga kasondalohan. An Dyos an labi maaram han araway, diri hi kamo.

¹⁶Sulonga hira buwas samtang magawas hira han agianan ha Sis. Igkakatapo niyo hira ha kataposan han kahamub-an nga tipakadto ha kamingawan nga hirani han Jeruel.

¹⁷Diri kinahanglan nga kamo an makiaway ha ira. Tindog la kamo ha iyo mga dapit ngan paghulat kamo; makita kamo nga padadag-on kamo han GINOO. Mga tawo han Juda ug Jerusalem, ayaw pag-alang o kahadlok. Gawas kamo ngadto ha pag-awayan, ngan maupod ha iyo an GINOO.”

¹⁸Niyan hinmapa hi Hadi Josafat, ngan yinmukbo an mga tawo upod ha iya ngan nagsingba hira han GINOO.

¹⁹Nanindog an mga sakop han Levita nga mga banay nira Coat ug Cora ngan nagdayaw han GINOO nga Dyos han Israel hin dako nga paggoliat.

²⁰Temprano pa han pagkaaga ginmawas an mga tawo ngadto ha kamingawan nga hirani han Tecoa. Han nagtitipagawas hira, namulong ha ira hi Josafat hin pagsiring: “Mga tawo han Juda ug Jerusalem! Sarigi niyo an GINOO nga iyo Dyos ngan magmamadig-on kamo. Tuohi niyo an iginsumat ha iyo han iya mga manaragna ngan magmamainuswagon kamo.”

²¹Katapos niya makigsarabot han mga tawo, ginsugo han hadi in pira nga mga parakanta nga magsul-ot hin higlawig nga mga bado para hin baraan nga katirok, ngan mag-una han kasondalohan, nga nagkakaranta, “Dayawa an GINOO! Waray kataposan an iya gugma!”

²²Han pagtikang na nira hin pagkanta, ginlisang han GINOO an nasulong nga mga kasondalohan.

²³Ginsulong han mga Amonitanhon ug mga Moabita an Edomeanhon nga kasondalohan ngan damo an nagkamatay, ngan katapos hira ngahaw nag-urugnay hin pamatay ha ira mga igkasi sondalo.

²⁴Han pag-abot han taga-Juda nga kasondalohan ngadto hin torre ha kamingawan, tinman-aw hira ngadto han pag-awayan ngan hinkit-an nira nga nalunay hira ngatanan ha tuna nga mga patay na. Waray usa ha ira nga nakapalagiw.

²⁵Inmabot hi Josafat ngan an iya mga sondalo hin pagkuha han mga naagaw nira, ngan hin-agian nira in damo nga mga baka,[26] mga pagkaon, mga panapton, ngan iba pa nga mahal nga mga butang. Tulo ka adlaw an ira pagtirok han mga inagaw nira, kundi waray hira makaakos hin pagdara hini ngatanan.

²⁶Ha ikaupat ka adlaw nagtitirok hira ha Kahamub-an Beraca ngan gindayaw nira an GINOO tungod han ngatanan nga iya ginbuhat. Amo ito nga gintawag nga “Beraca”[27] ini nga kahamub-an.

²⁷Ginmandoan ni Josafat an iya mga sondalo hin pagbalik ha Jerusalem nga madinaogon, kay ginpirde han GINOO an ira mga kaaway.

²⁸Han pag-abot nira han syudad, naglakat hira nga tinokaran han mga arpa ngan mga trompeta ngadto ha Templo.

²⁹Nahadlok an tagsa nga nasod nga nakabati nga ginpirde han GINOO an mga kaaway han Israel,

³⁰sanglit naghadi ha kalinaw hi Josafat, ngan gintagan hiya han Dyos hin kalinaw bisan diin han iya ginhadian.

³¹Nahimo hi Josafat nga hadi han Juda ha panuigon nga 35 ngan 25 ka tuig an iya pagkahadi ha Jerusalem. Hi Asuba nga anak ni Salai amo an iroy niya.

³²Sugad kan Asa nga iya amay nga una ha iya ginbuhat niya an matadong ha atubangan han GINOO;

³³kundi waray niya bungkaga an pagano nga mga dapit hin pagsingba. Waray gihapon an mga tawo magsingba hin kinasingkasing han Dyos han ira kaapoy-apoyan.

³⁴Nahisurat an ngatanan nga iba pa nga ginbuhat ni Josafat tikang ha tinikangan ngadto ha kataposan dida han Kasaysayan ni Jehu nga anak ni Hanani, nga bahin han Kasaysayan han Kahadian han Israel.

³⁵Ha usa ka panahon nakigsangkay hi Hadi Josafat kan Hadi Ahasias han Israel nga damo an ginbuhat nga maraot.

³⁶Naghimo hira ha duruongan han Asiongaber hin mga barko nga nabiyahe ha kalalawdan.

³⁷Kundi ginpahimatngon hi Josafat ni Eliezer nga anak ni Dodaba nga taga bungto han Maresa, “Bubungkagon han GINOO an imo gintindog kay nakigsangkay ka kan Ahasias.” Ngan naruba ngatanan an mga barko ngan waray gud makabiyahe.