Read Waray Samarenyo Meaning Based 2 Cronicas 24 Bible Online

2 Cronicas 24 - Waray Samarenyo Meaning Based bible

2 Cronicas 24

¹Pito ka tuig an panuigon ni Joas han kahimo niya nga hadi ngan naghadi hiya hin 40 ka tuig ha Jerusalem. Hi Sebia amo an iroy niya nga taga syudad han Berseba.

²Ginbuhat niya an nakalilipay ha GINOO samtang nga buhi pa hi Joyada nga padi.

³Ginpili ni Joyada in duha nga asawa para kan Hadi Joas ngan nag-anak hira hin kalalaken-an ug kababayen-an.

⁴Han hadi na hiya, naglarang hi Joas hin pag-ayad han Templo.

⁵Ginsugo niya an kapadian ngan an mga Levita hin pagkadto ha mga syudad han Juda ngan pagtirok hin igo nga kwarta tikang han ngatanan nga mga tawo basi ha ikinatuig makag-ayad hira han Templo. Ginsiring niya hira nga buhaton dayon ini nira, kundi naglangan an mga Levita,

⁶sanglit gintawag ni Joas hi Joyada nga ira pangulo ngan ginpakianhan hiya, “Kay ano nga waray mo pagtalinguhaa nga an mga Levita magtirok tikang ha Juda ug Jerusalem han buhis nga ginkinahanglan ni Moises nga surugoon han GINOO nga ihatag han mga tawo[30] para han Tulda nga inuokyan han GINOO?” (

⁷Ginhugawan an Templo han mga sumusunod ni Atalia, an maraot nga babaye,[31] ngan ginggamit in damo nga baraan nga mga butang ha pagsingba kan Baal.)

⁸Ginsugo han hadi an mga Levita hin paghimo hin kahon nga surudlan han mga amot ngan pagbutang hini didto ha ganghaan han Templo.

⁹Ginpasangyaw nira ha bug-os nga Jerusalem ug Juda nga dad-on han ngatanan ngadto han GINOO an buhis nga didto ha kamingawan syahan gintirok ni Moises nga surugoon han Dyos.

¹⁰Nakalipay ini han mga tawo ngan han ira mga pangulo, ngan gindara nira an ira iburuhis nga kwarta ngan iginsulod nira ha kahon.

¹¹Kada adlaw dinadara han mga Levita an kahon ngadto han opisyal han palasyo nga tinaporan han pagtirok han kwarta. Kon puno na an kahon, kinukuha an kwarta han sekretaryo han palasyo ngan han tumindog han Labaw nga Padi ngan ibinabalik an kahon ngadto han dapit ha may portahan. Sanglit nakatirok hira hin damo nga kwarta.

¹²Ihinahatag han hadi ngan ni Joyada an kwarta ngadto hadton mga tinaporan han pag-ayad han Templo, ngan nagsuhol hira hin mga kantero, mga panday, ngan mga paragtrabaho hin metal basi maayad dayon an Templo.

¹³Gintrabaho hin maupay han ngatanan nga mga paragtrabaho, ngan gin-ayad nira an Templo sugad han daan nga katindog nga madig-on la gihapon.

¹⁴Han kahuman na han mga pag-ayad, iginbalik ngadto han hadi ngan kan Joyada an nahisalin nga bulawan ug salapi, nga ginggamit hin paghimo hin mga makaong ngan iba pa nga mga garamiton para han Templo. Samtang nga buhi pa hi Joyada, diri gud naaawnan hin paghalad ha Templo hin mga hayop nga tutuboron.

¹⁵Pakaabot ni Joyada hin panuigon nga 130, namatay hiya.

¹⁶Iginlubong hiya nira didto han hadianon nga mga lubnganan ha Syudad ni David ug usa hini nga pagpakilala han iya maupay nga pag-alagad han mga tawo han Israel, han Dyos, ngan han Templo.

¹⁷Kundi han patay na hi Joyada, ginhugay hi Hadi Joas han mga pangulo han Juda, ngan namati lugod hiya ha ira.

¹⁸Sanglit hinmunong an mga tawo hin pagsingba ha Templo han GINOO nga Dyos han ira kaapoy-apoyan, ngan nagtikang hira hin pagsingba hin mga diyosdiyos ngan han mga ladawan han diyosa nga hi Asera. Tungod hini nga ira mga sala, nasinahan han GINOO an Juda ug Jerusalem.

¹⁹Ginsugo han GINOO in mga manaragna hin pagpahimatngon ha ira nga bumalik hira ha iya, kundi dinmiri hin pamati an mga tawo.

²⁰Niyan ginbut-an han espiritu han Dyos hi Zacarias nga anak ni Joyada nga padi. Tinmindog hiya ha dapit diin nakikita hiya han mga tawo ngan ginmoliat hiya, “Napakiana an GINOO nga Dyos, kay ano nga ginsupak niyo an iya mga sugo ngan kamo la ngahaw in nagdadara hin karat-an ha iyo? Ginsalikway hiya niyo, sanglit iginsalikway man kamo niya!”

²¹Binmulig hi Hadi Joas hin paglingo kan Zacarias, ngan ginsugo niya an mga tawo hin pagbato kan Zacarias didto ha bungsaran han Templo.

²²Hinngalimtan han hadi an maunongon nga pag-alagad nga ginpakita ha iya ni Joyada nga amay ni Zacarias, ngan iginpapatay niya hi Zacarias. Han tikamaratay na hi Zacarias, ginmoliat hiya, “Makasabot unta an GINOO han imo ginbubuhat ngan kastigohon ka unta!”

²³Han pag-abot han panahon han kat-uran hito nga tuig, ginsulong an Juda ug Jerusalem han kasondalohan han Siria, ginpatay an ngatanan nga mga pangulo, ngan gindara in damo nga ira mga inagaw ngadto ha Damasco.

²⁴Gutiay la an kasondalohan nga Siriahanon, kundi tinugotan hira han GINOO nga makadaog hira han damo nga kasondalohan nga taga-Juda, kay iginsalikway man han mga tawo hiya, an GINOO nga Dyos han ira kaapoy-apoyan. Ha sugad hini ginkastigo hi Hadi Joas.

²⁵Nasamad hiya hin grabe, ngan han pag-isol na han kaaway, ginkontra hiya hin duha han iya mga opisyal ngan ginpatay hiya ha iya higdaan ngan pagbulos ini ha iya kay iya man ginpatay an anak nga lalake[32] ni Joyada nga padi. Iginlubong hiya ha Syudad ni David, kundi diri didto han hadianon nga mga lubnganan. (

²⁶Adton mga kinmontra ha iya amo hira Sabad nga anak hin babaye nga Amonitanhon nga ginngaranan kan Simeat, ug Josabad nga anak hin babaye nga Moabita nga ginngaranan kan Semrit.)

²⁷Dida han Pagsaysay han Basahan han Kahadian may mga susumaton han mga anak nga kalalaken-an ni Joas, mga panagna nga ginhimangraw kontra ha iya, ngan mga sinurat mahitungod han iya pagtindog hin utro han Templo. Sinmaliwan ha iya hin pagkahadi hi Amasias nga iya anak.