Read Waray Samarenyo Meaning Based 2 Cronicas 26 Bible Online

2 Cronicas 26 - Waray Samarenyo Meaning Based bible

2 Cronicas 26

¹Ginpili han ngatanan nga mga tawo han Juda hi Oseas nga anak ni Amasias, nga 16 an panuigon ha pagsaliwan niya han iya amay hin pagkahadi. (

²Katapos adto han kamatay ni Amasias nga ginbawi ni Oseas an Elat ngan gin-ayad niya an syudad.)

³Nahimo nga hadi hi Oseas ha panuigon nga 16, ngan naghadi hiya ha Jerusalem hin 52 ka tuig. Hi Jecolias nga taga-Jerusalem amo an iroy niya.

⁴Ha pagsunod han susbaranan han iya amay, ginbuhat niya an nakakalipay han GINOO.

⁵Samtang buhi pa hi Zacarias nga iya magsaragdon, gin-alagad niya nga matinumanon an GINOO, ngan ginbendisyonan hiya han Dyos.

⁶Nakiaway hi Oseas han mga Filisteohanon. Ginruba niya an mga pader han mga syudad han Gat, Jabnia, ug Asdod, ngan gintindog niya in pinaderan nga mga syudad nga hirani han Asdod ngan ha iba pa nga dapit han Filistia.

⁷Ginbuligan hiya han Dyos hin pagpirde han mga Filisteohanon, han mga Arabeanhon nga nag-uokoy ha Gorbaal, ngan han mga Meunitanhon.

⁸Nagbayad hin buhis kan Oseas an mga Amonitanhon, ngan nahimo hiya nga gamhanan nga hadi nga inmabot ha Ehipto an iya kabantogan.

⁹Ginparig-on ni Oseas an mga kota han Jerusalem pinaagi hin pagtindog hin mga lantawon didto ha Kanto Ganghaan, ha Kahamub-an Ganghaan, ngan ha dapit nga linilikdoan han pader.

¹⁰Gintindog liwat niya in pinaderan nga mga lantawan ha kaumhan, ngan gin-ukab in damo nga mga atabay kay damo an iya panon hin kabakahan ha katundan nga kapungtoran ug kapatagan. Gin-aghat niya an mga tawo hin pagtanom hin mga urubasan ha sagkahon nga katunaan ngan pag-uma han malangbo nga tuna, kay may hilig niya hin pag-uma.

¹¹May-ada niya damo nga kasondalohan nga andam pakiaway. Gintipigan an mga sinurat han mga kasondalohan nira Jehiel ug Maasias nga iya mga sekretaryo, ha ubos han pagdumara ni Hananias nga sakop han hugpo hin mga opisyal han hadi.

¹²Ginmandoan an kasondalohan hin 2,600 nga mga opisyal.

¹³Ilarom han ira pagdumara in 307,500 nga mga sondalo nga takos hin pakiaway para han hadi kontra han iya mga kaaway.

¹⁴Gintagan ni Oseas an kasondalohan hin mga taming, mga bangkaw, mga helmet, mga hinganiban ha lawas, mga pana ngan mga udyong, ngan mga bato nga ilalabyog.

¹⁵Didto ha Jerusalem nagpahimo hiya hin kasangkapan para hin pagpana ngan paglabyog hin dagko nga mga bato tikang han mga torre ngan mga kanto han pader han syudad. Nahisangyaw an iya kabantogan ha ngatanan nga dapit ngan nahimo hiya nga gamhanan tungod han tambulig nga iya nakarawat tikang han Dyos.

¹⁶Kundi han gamhanan na hi Hadi Oseas, nagmapinahitas-on hiya ngan nagdalan ini ngadto han iya pagkapukan. Inatohan niya an GINOO nga iya Dyos pinaagi hin pagsulod niya han Templo hin pagtubod hin insyenso ha altar.

¹⁷Inmugop han hadi hi Azarias nga padi ngan upod niya in 80 nga magkusog ngan mag-isog nga kapadian

¹⁸ngan inmato hira ha iya. Sinmiring hira, “Oseas! Waray mo katungod hin pagtubod hin insyenso ngadto han GINOO. An kapadian la nga tikang kan Aaron an may katungod hin pagbuhat hini. Bayai ini nga baraan nga dapit. Nakasayop ka han GINOO nga Dyos, ngan kinuhaan ka na han bendisyon han GINOO.”

¹⁹Natindog hi Oseas didto ha Templo sapit han altar han insyenso ngan nagdara hiya han turuboran han insyenso. Nasina hiya han kapadian, ngan dida dayon binmutho ha iya agtang in matapon nga sakit ha panit.

²⁰Tinutokan ni Azarias ngan han iba nga kapadian an agtang han hadi. Nahadlok hira ngan ginpirit nira an hadi nga gumawas han Templo. Nagdagmit hiya paggawas kay ginkastigo hiya han GINOO.

²¹Ngada han iya kamatay mahugaw hi Hadi Oseas sumala han seremonyas tungod han iya sakit. Tungod nga waray na hiya pasudla han Templo, nag-ukoy hiya ha iya kalugaringon nga balay, nga kinuhaan hiya han ngatanan niya nga katungdanan, samtang hi Jotam nga iya anak an nagpangulo han nasod.

²²Iginsurat ni manaragna Isaias nga anak ni Amoz an ngatanan nga iba pa nga mga butang nga ginbuhat ni Hadi Oseas han iya pagkahadi.

²³Namatay hi Oseas ngan iginlubong ha lurubngan nga tuna han kahadian, kundi tungod han iya sakit, waray hiya iglubong didto han hadianon nga mga lubnganan. Sinmaliwan ha iya hin pagkahadi hi Jotam nga iya anak.