Read Waray Samarenyo Meaning Based 2 Cronicas 3 Bible Online

2 Cronicas 3 - Waray Samarenyo Meaning Based bible

2 Cronicas 3

¹Gin-andam na nga daan ni Hadi David nga amay ni Solomon in dapit para han Templo. Aadto ini ha Jerusalem, ha bukid han Moria, an dapit nga ginamit nga giriokan ni Ornan nga Jebuseohanon. Gintikangan ni Hadi Solomon an pagtindog

²ha ikaduha ka bulan han ikaupat ka tuig han iya paghadi.

³An Templo nga gintindog ni Hadi Solomon 30 ka metros an kahilaba ngan 10 ka metros an kahiluag.

⁴May-ada kwarto ha portahan han Templo. An iya kahiluag sugad han kahiluag han Templo, nga 10 ka metros, ngan 60 ka metros an kahitaas. Hinaklapan hin puraw nga bulawan an sakob han kwarto.

⁵Ginbungbungan hin sidro an sunod nga hiluag nga kwarto ngan ginhaklapan hin gimamaupayi nga bulawan nga may-ada debuho nga mga kahoy nga palmera ngan mga karukadena.

⁶Gin-adornohan han hadi an Templo hin magtahom nga mahal nga mga bato ngan hin bulawan nga ginpalit tikang ha tuna han Parbaim.

⁷Ginluob niya hin bulawan an mga bungbong han Templo, an mga pagbo, an mga aragian, ngan an mga porta. Iginuhit ha mga bungbong in mga debuho nga kerubin.[5]

⁸An surusulod nga kwarto nga tinatawag nga Labi ka Baraan nga Dapit 10 ka metros an kahilaba ngan 10 ka metros an kahiluag, nga amo an kahiluag han Templo. An bulawan an ginamit hin pagputos han mga bungbong han Labi ka Baraan nga Dapit 25,000 ka kilo;

⁹sobra 600 ka gramos nga bulawan an ginamit hin paghimo hin mga raysang, ngan ginluob liwat hin bulawan an mga bungbong han mga kwarto ha igbaw.

¹⁰Nagpahimo liwat an hadi han iya mga paragtrabaho hin duha nga metal nga kerubin, ginputos ini hin bulawan, ngan iginbutang didto han Labi ka Baraan nga Dapit,

¹¹diin nagtutupad hira ngan naatubang han portahan. May duha nga mga pako an kada usa, nga duha ka metros an kahilaba han kada pako. Binuklad ini nga mga pako, sanglit naghihiabutay ha butnga han kwarto an kataposan han ira pako ngan naabot ha bungbong han kwarto an usa nira nga pako, ngan nakakaguop hira han bug-os nga kahiluag han kwarto nga 10 ka metros.

¹⁴Hinimo an biray han Labi ka Baraan nga Dapit hin lino ngan hin iba nga mga dugnit nga gintina hin asol, granate, ug pula, nga may mga borda nga kerubin.

¹⁵Nagpahimo an hadi hin duha nga mga harigi nga 15 1/2 ka metros an kahitaas han kada usa, ngan iginbutang ini ha atubangan han Templo. May uloulo an kada usa nga 2.2 ka metros an kahitaas.

¹⁶Gin-adornohan an igbaw han mga harigi hin hinokot nga mga kadena ngan hin usa ka gatos nga bronse nga mga granada.[6]

¹⁷Iginbutang an mga harigi ha mga ligid han aragian han Templo; ginngaranan nga Jaquin[7] an ha timogan nga ligid ngan Boos[8] an ha amihanan.