Read Waray Samarenyo Meaning Based 2 Cronicas 32 Bible Online

2 Cronicas 32 - Waray Samarenyo Meaning Based bible

2 Cronicas 32

¹Katapos hini nga mga hinabo, nag-alagad hi Hadi Ezequias nga matinumanon han GINOO. Ginsulong an Juda ni Senaquerib nga emperador han Asiria. Ginpalibotan niya an pinaderan nga mga syudad ngan ginsugo an iya kasondalohan hin pagruba han mga pader basi hira makasulod.

²Han pakasabot ni Ezequias nga nakahunahuna hi Senaquerib hin pagsulong liwat han Jerusalem,

³naglarang hiya ngan an iya mga opisyal hin pag-utod han kinukuhaan han tubig ha gawas han syudad basi mawaray tubig an mga Asiriahanon kon magtikahirani na hira ha Jerusalem. Gindara han mga opisyal in damo nga mga tawo ngan ira gintak-opan an ngatanan nga mga burabod, sanglit waray na tubig nga inmawas.

⁵Ginparig-on han hadi an mga kota han syudad pinaagi hin pag-ayad han pader, pagtindog hin mga lantawan ha bawbaw hini,[40] ngan pagtindog hin pader ha gawas. Labot hini, gin-ayad niya an mga kota nga gintindog didto han tuna nga gintak-opan ha sinirangan han daan nga bahin han Jerusalem. Ginpahimo liwat niya in damo nga mga bangkaw ngan mga taming.

⁶Iginbutang niya an ngatanan nga kalalaken-an ha syudad ha ubos han pagmando hin mga opisyal han kasondalohan ngan gintirok hira didto han plasa ha ganghaan han syudad. Nagsiring hiya ha ira,

⁷“Pagsarig ngan pagmadasigon kamo ngan ayaw kamo kahadlok han emperador nga Asiriahanon o han kasondalohan nga iya ginmamandoan. May-ada kita labaw nga gahom nga dapig ha aton kay han gahom nga dapig ha ira.

⁸May-ada nira gahom nga kanan tawo la, kundi may-ada naton GINOO nga aton Dyos nga mabulig ha aton ngan maatubang han aton mga pakig-away.” Nadasig an mga tawo hini nga mga pulong han ira hadi.

⁹Paglabay hin panahon, samtang nakadto pa ha Laquis hi Senaquerib ngan an iya kasondalohan, ginpadara niya kan Ezequias ngan han mga tawo han Juda nga kaupod niya ha Jerusalem ini nga mensahe:

¹⁰“Nagpapakiana ako, hi Senaquerib nga emperador han Asiria, kon ano an iyo tinataporan nga nagpapabilin man kamo ha Jerusalem bisan kon ginpalibotan na an syudad?

¹¹Ginsumatan kamo ni Ezequias nga tatalwason kamo han GINOO nga iyo Dyos tikang ha amon gahom, kundi ginlilimbongan la kamo ni Ezequias ngan mapatay kamo hin gutom ug uhaw.

¹²Amo hiya an nagbungkag han mga siringbahan ngan mga altar han GINOO ngan nagsugo han mga tawo han Juda ug Jerusalem hin pagsingba ngan pagtubod hin insyenso didto hin usa la nga altar.

¹³Diri ba kamo maaram han ginbuhat ko ngan han akon kaapoy-apoyan han mga tawo han iba nga mga nasod? Gintalwas ba han kadiyosan hin iba nga mga nasod an ira mga tawo tikang han emperador han Asiria?

¹⁴Kakan-o pa man an mga kadiyosan hini nga mga nasod magtalwas han ira tuna tikang ha amon? Niyan ano man an iyo ginlalaoman nga makakatalwas ha iyo an iyo diyos?

¹⁵Sanglit ayaw kamo pagpalimbong o pagpalipat kan Ezequias. Ayaw kamo pagtuod ha iya! Waray gud diyos hin bisan ano nga nasod nga nakatalwas han iya mga tawo tikang hin Asiriahanon nga emperador. Sanglit diri gud makakatalwas ha iyo ini nga diyos niyo!”

¹⁶Nagyakan pa gud hin magraot nga mga butang an mga opisyal nga Asiriahanon mahitungod han GINOO nga Dyos ngan kan Ezequias nga surugoon han GINOO.

¹⁷Gintamay an GINOO nga Dyos han Israel han surat han emperador. Nagsiring ini, “Waray magtalwas han ira mga tawo tikang ha akon gahom an kadiyosan han mga nasod, ngan diri liwat magtatalwas han iya mga tawo tikang ha akon an diyos ni Ezequias.”

¹⁸Iginggoliat ini han mga opisyal ha pinulongan nga Hebreo para hin paghadlok ngan paghulop han mga tawo han Jerusalem nga nakadto ha bawbaw han pader han syudad, basi magmasayon an pag-agaw han syudad.

¹⁹Naghimangraw hira mahitungod han Dyos han Jerusalem sugad la han ira paghimangraw hiunong han kadiyosan han iba nga mga katawhan, nga mga diyosdiyos la nga hinimo hin mga kamot hin tawo.

²⁰Niyan nag-ampo ngadto han Dyos ngan nangaro hin pakibulig hi Hadi Ezequias ngan an manaragna nga hi Isaias nga anak ni Amoz.

²¹Nagsugo an GINOO hin anghel hin pagpatay han mga sondalo ngan mga opisyal han kasondalohan nga Asiriahanon. Sanglit binmalik ha Asiria an emperador nga puno hin kaalo. Usa ka adlaw han nakadto hiya ha templo han iya diyos, ginpatay hiya hin pira han iya mga anak nga kalalaken-an pinaagi han ira mga espada.

²²Ha sugad hini nga paagi, gintalwas han GINOO hi Hadi Ezequias ngan an mga tawo han Jerusalem tikang han gahom ni Senaquerib nga emperador han Asiria ngan tikang liwat han iba nira nga mga kaaway. Nagkamay-ada kalinaw an mga tawo,[41] lakip an ngatanan nga kahigrani nga mga nasod.

²³Kinmadto ha Jerusalem in damo nga mga tawo nga nagdara hin mga halad ngadto han GINOO ngan mga regalo kan Ezequias, sanglit tikang hito nga panahon ginpasidunggan hi Ezequias han ngatanan nga mga nasod.

²⁴Hini nga panahon nasakit ngan haros na mamatay hi Hadi Ezequias. Nag-ampo hiya ngan gintagan hiya han GINOO hin tigaman nga mag-uupay hiya.

²⁵Kundi mapinahitas-on hin duro hi Ezequias hin pagpasalamat han GINOO han ngatanan nga bulig ha iya han GINOO, ngan tungod hini nag-antos an Juda ug Jerusalem.

²⁶Kundi ha kataposan nagpaubos hi Ezequias ngan an mga tawo han Jerusalem, sanglit waray pagkastigoha han GINOO an mga tawo ngada han kamatay ni Ezequias.

²⁷Nagriko hi Hadi Ezequias ngan ginpasidunggan hiya han ngatanan nga mga tawo. Nagpahimo hiya hin mga kwarto nga hirimosan han iya bulawan, salapi, mga mahal nga bato, mga panakot, mga taming, ngan iba pa nga mahal nga mga butang.

²⁸Labot hini, naghimo hiya hin mga kamalig nga hirimosan han iya mga pagkaon, bino, ug lana hin olibo; mga balaybalay han iya mga baka; ngan mga alad han iya mga karnero.

²⁹Labot hini ngatanan, gintagan hiya han Dyos hin damo nga kakarnerohan ug kabakahan ngan damo an iya mga manggad, nga nagtindog hiya hin damo nga mga syudad.

³⁰Amo ini hi Ezequias an nagsagpo han inaawasan han Burabod Gihon ngan ginpasimang an tubig ngadto hin dapit ha sakob han mga pader han Jerusalem. Nagmainuswagon hi Ezequias han ngatanan nga iya ginbuhat,

³¹ngan bisan han pag-abot han mga sinugo nga mga taga-Babilonia hin pagpakiana han talagsaon nga nahinabo ha tuna, ginpabay-an la han Dyos hi Ezequias han iya kalugaringon nga paagi, basi la kasarihan hiya ngan hisabotan kon ano gud an nakada ha iya kasingkasing.

³²Nahisurat an iba pa nga ginbuhat ni Hadi Ezequias ngan an iya kamatinumanon han GINOO dida han Panan-awon ni Manaragna Isaias nga Anak ni Amoz ngan ha Kasaysayan han Kahadian han Juda ug Israel.

³³Namatay hi Ezequias ngan iginlubong ha igbaw nga bahin han hadianon nga mga lubnganan. Han iya kamatay ginpasidunggan hiya han ngatanan nga mga tawo han Juda ug Jerusalem. Sinmaliwan ha iya hin pagkahadi hi Manases nga iya anak.