Read Waray Samarenyo Meaning Based 2 Cronicas 33 Bible Online

2 Cronicas 33 - Waray Samarenyo Meaning Based bible

2 Cronicas 33

¹Dose an panuigon ni Manases han kahimo niya nga hadi han Juda, ngan naghadi hiya hin 55 ka tuig ha Jerusalem.

²Tungod kay nagsunod man hiya han makaoorit nga mga binuhatan han mga nasod nga ginpaiwas han GINOO samtang nasulong an iya mga tawo han tuna, nakasala hi Manases han GINOO.

³Gin-ayad niya an pagano nga mga dapit hin pagsingba nga ginruba ni Ezequias nga iya amay. Nagtindog hiya hin mga altar para hin pagsingba kan Baal, naghimo hin mga ladawan han diyosa nga hi Asera, ngan nagsingba han mga bitoon.

⁴Nagtindog hiya hin pagano nga mga altar didto han Templo, didto han dapit nga ginsiring han GINOO nga pagsisingbahon hiya ha kadayonan.

⁵Didto han duha nga mga bungsaran han Templo nagtindog hiya hin mga altar para hin pagsingba han mga bitoon.

⁶Iginhalad niya an iya mga anak nga kalalaken-an nga mga unong nga tinubod didto ha Kahamub-an Hinom. Nagbuhat hiya hin pagdiwata ug salamangka, ngan nagpakiana hiya hin mga paratigo ngan mga espiritista. Nakasala hiya hin duro han GINOO ngan nasina gud an GINOO ha iya.

⁷Iginbutang niya in ladawan didto han Templo didto han dapit nga ginsiring han Dyos kan David ug Solomon nga iya anak: “Dinhe ha Jerusalem, dinhe hini nga Templo, amo an dapit nga akon ginpili tikang han ngatanan nga katunaan han dose nga mga tribo han Israel, nga dapit nga pagsisingbahan ha akon.

⁸Ngan kon pagsugton han mga tawo han Israel an ngatanan nga akon mga sugo ngan pagtumanon an bug-os nga Balaod nga iginhatag ha ira ni Moises nga akon surugoon, diri ko paiiwason hira ha tuna nga akon iginhatag ha ira kaapoy-apoyan.”

⁹Ginmandoan ni Manases an mga tawo han Juda hin pagbuhat hin darudagko pa gud nga mga sala kay han ginbuhat han mga nasod nga ginpaiwas han GINOO samtang nasulong han tuna an iya mga tawo.

¹⁰Bisan kon ginpahimatngon han GINOO hi Manases ngan an iya mga tawo, dinmiri hira hin pamati.

¹¹Sanglit itinugot han GINOO nga sulongon an Juda han kasondalohan nga Asiriahanon. Ginbihag nira hi Manases, ginpandogan an iya mga tiil, ginposasan, ngan gindara hiya ngadto ha Babilonia.

¹²Ha iya pag-antos nagmapinaubsanon hiya, dinmangop hiya han GINOO nga iya Dyos, ngan nangaro han iya tambulig.

¹³Pinamatian han Dyos an pag-ampo ni Manases ngan tinugotan hiya hin paguli ngadto ha Jerusalem ngan magpadayon han iya pagkahadi didto. Tungod hini nakasabot hi Manases nga Dyos an GINOO.

¹⁴Katapos hini ginpahitaas ni Manases an ha gawas nga pader ha sinirangan han Syudad ni David, tikang hin dapit ha kahamub-an nga hirani han Burabod Gihon ha amihanan ngadto ha Ganghaan Isda ngan ha dapit han syudad nga ginngaranan nga Opel. Ginbutangan liwat niya hin opisyal hin kasondalohan nga nagpapangulo hin hugpo hin mga sondalo ha kada pinaderan nga syudad han Juda.

¹⁵Ginkuha niya ha Templo an langyaw nga kadiyosan ngan an ladawan nga iya iginbutang didto, ngan an pagano nga mga altar nga nakadto ha pungtod nga tinitindogan han Templo ngan ha iba pa nga mga dapit ha Jerusalem; iginggawas niya han syudad ini ngatanan nga mga butang ngan iya pinanlabog.

¹⁶Gin-ayad liwat niya an altar diin ginsingba an GINOO, ngan naghalad hiya dida hini nga altar hin mga halad hin pakigdait ngan hin mga halad hin pagpasalamat. Ginsugo niya an ngatanan nga mga tawo han Juda hin pagsingba han GINOO nga Dyos han Israel.

¹⁷Bisan kon nagpadayon an mga tawo hin paghalad hin mga hayop nga tutuboron ha iba nga mga dapit hin pagsingba, iginhalad nira ini ngadto gud la han GINOO.

¹⁸Nahisurat an iba pa nga ginbuhat ni Manases dida han Kasaysayan han Kahadian han Israel, an pag-ampo niya ha Dyos, ngan an mga mensahe han mga manaragna nga naghimangraw ha iya ha ngaran han GINOO nga Dyos han Israel.

¹⁹Nahisurat ngatanan dida han Kasaysayan han mga Manaragna, an pag-ampo han hadi ngan an baton han Dyos, ngan in susumaton han mga sala nga iya nabuhat han waray pa hiya magbasol—an karat-an nga iya ginbuhat, an pagano nga mga dapit hin pagsingba, ngan an mga ladawan han diyosa nga hi Asera nga iya ginhimo, ngan an mga diyosdiyos nga iya ginsingba.

²⁰Namatay hi Manases ngan iginlubong ha palasyo, ngan sinmaliwan ha iya hin pagkahadi hi Amon nga iya anak.

²¹Baynte dos an panuigon ni Amon han kahimo niya nga hadi han Juda, ngan naghadi hiya hin duha ka tuig ha Jerusalem.

²²Sugad kan Manases nga iya amay nakasala hiya han GINOO, ngan ginsingba niya an mga diyosdiyos nga ginsingba han iya amay.

²³Kundi diri sugad han iya amay, waray hiya magmapinaubsanon ngan dumangop han GINOO; labaw pa ngani hiya hin kamakasasala kay han iya amay.

²⁴Kinmontra ha iya an mga opisyal ni Amon ngan ginpatay hiya didto ha palasyo.

²⁵Ginpatay han mga tawo han Juda an mga nagpatay kan Amon ngan ginhimo nira nga hadi hi Josias nga iya anak.