Read Waray Samarenyo Meaning Based 2 Cronicas 35 Bible Online

2 Cronicas 35 - Waray Samarenyo Meaning Based bible

2 Cronicas 35

¹Ginsaurog ni Hadi Josias ha Jerusalem an Paglabay ha pagpasidungog han GINOO; dida han ika-14 nga adlaw han syahan nga bulan gin-ihaw nira an mga hayop para han pyesta.

²Iginhatag niya ha kapadian an mga katungdanan nga ira pagbubuhaton ha Templo ngan gin-aghat hira nga pagbuhaton ini hin maupay.

³Ginhatag liwat niya ini nga mga tugon ha mga Levita nga mga magturutdo han Israel, nga iginhalad ngadto han GINOO: “Isulod an baraan nga Kahon han Ginsaaran ha Templo nga gintindog ni Hadi Solomon nga anak ni David. Diri na niyo ini pagdadaradaraon ngadto hin magkalainlain nga dapit, kundi mag-aalagad kamo han GINOO nga iyo Dyos ngan han iya mga tawo nga Israel.

⁴Kadto na kamo han iyo mga dapit ha Templo pinaagi hin banay sumala han mga katungdanan nga iginhatag ha iyo ni Hadi David ngan ni Hadi Solomon nga iya anak,

⁵ngan tindog kamo ha baraan nga dapit basi magamit an iba ha iyo hin pagbulig han kada panimalay han mga tawo han Israel.

⁶Iihawon niyo an mga nati nga karnero ngan an mga kanding han Paglabay. Niyan paglinis kamo sumala han seremonyas ngan andama niyo an mga iharalad basi makatuman an iyo igkasi mga Israelita han mga tugon nga iginhatag han GINOO pinaagi kan Moises.”

⁷Para han gagamiton han mga tawo ha Pagsaurog han Paglabay nag-amot hi Hadi Josias tikang han iya kalugaringon nga mga panon hin 30,000 nga mga karnero, mga nati nga karnero, ngan mga nati nga kanding, ngan 3,000 nga mga todo nga baka.

⁸Imnamot liwat an iya mga opisyal para han gagamiton han mga tawo, han kapadian, ngan han mga Levita. Niyan gintagan an kapadian nira Hilkias, an Labaw nga Padi, Zacarias ug Jehiel, an mga opisyal nga tinaporan han Templo hin 2,600 nga mga nati nga karnero ngan mga nati nga kanding ngan 300 nga mga todo nga baka para han mga halad nga tutuboron ha panahon han pyesta.

⁹Imnamot hira Conanias, Semias ngan an iya bugto nga lalake nga hi Natanael, Hasabias, Jehiel, ug Josabad nga mga pangulo han mga Levita hin 5,000 nga mga nati nga karnero ngan mga nati nga kanding, ngan 500 nga mga todo nga baka nga ihahalad han mga Levita nga mga halad nga tutuboron.

¹⁰Han andam na an ngatanan para han Paglabay, tinmindog ha ira mga dapit an kapadian ngan an mga Levita sumala han iginsugo han hadi.

¹¹Katapos pag-ihawa han mga nati nga karnero ngan mga kanding, gin-anitan ini han mga Levita ngan iginsablig han kapadian ha altar an dugo.

¹²Niyan ginbahinbahin nira ngadto ha mga tawo pinaagi hin mga pundok hin panimalay an mga mananap para han mga halad nga tutuboron, basi ighalad nira ini sumala han mga tugon dida han Balaod ni Moises.

¹³Ginsugba han mga Levita an mga halad han Paglabay sumala han mga turumanon, ngan ginlaga an mga halad ha mga daba, mga kaldero, ngan mga karaha, ngan igindurot dayon ha mga tawo an linuto.

¹⁴Katapos hini naggahin an mga Levita hin karne para ha ira ngahaw ngan para han kapadian nga tulin ni Aaron, kay nalibang an kapadian tubtob han pagkagab-i hin pagtubod han mga bug-os nga hayop ngan han tambok nga mga halad.

¹⁵Nakada ini nga mga musikero han Levita nga banay ni Asaf ha mga dapit nga igintudlok ha ira han mga tugon ni Hadi David: hira Asaf, Heman, ug Jedutun nga mga manaragna han hadi. Waray na kinahanglan an mga gwardya ha mga ganghaan han Templo hin pagbaya han ira mga buruhaton, kay gin-andam han iba nga mga Levita an Paglabay para ha ira.

¹⁶Sanglit sumala han iginsugo ni Hadi Josias, ginbuhat an ngatanan hito nga adlaw ha pagsingba han GINOO, ha pagtuman han Pyesta han Paglabay, ngan ha paghalad han mga hayop nga tutuboron ha altar.

¹⁷Ginsaurog hin pito ka adlaw an Paglabay ngan an Pyesta han Tinapay nga Waray Patubo han ngatanan nga mga tawo han Israel nga nakadto.

¹⁸Waray pa gud pagsauroga an Paglabay hin sugad hini tikang pa han mga adlaw ni manaragna Samuel. Waray pa gud han una nga kahadian nagsaurog han Paglabay nga sugad hini nga ginsaurog ni Hadi Josias, han kapadian, han mga Levita, ngan han mga tawo han Juda, Israel, ug Jerusalem

¹⁹han ika-18 ka tuig nga pagkahadi ni Josias.

²⁰Katapos pagbuhata ni Hadi Josias ini ngatanan para han Templo, nagmando hin kasondalohan hi Hadi Neco han Ehipto hin pakig-away didto ha Carkemis, ha Salog Eufrates. Gintinguha ni Josias hin pagpugong ha iya,

²¹kundi ginpadad-an ni Neco hi Josias hini nga mensahe: “Diri ka hini hilalabtan, Hadi han Juda, hini nga away nga akon inaatubang. Waray ako kumanhi hin pakiaway ha imo, kundi han akon mga kaaway, ngan ginpapadagmit ako han Dyos. Dapig ha akon an Dyos, sanglit ayaw ako pag-ulanga kay bangin pagdaoton ka niya.”

²²Kundi naglarang na gud hi Josias hin pakiaway. Dinmiri hiya pamati han iginsiring han Dyos pinaagi kan Hadi Neco, sanglit waray la hiya magpakilala ngan kinmadto hiya ha pag-awayan ha kapatagan han Megido.

²³Dida han away naigo hi Hadi Josias hin mga pana hin mga taga-Ehipto. Ginsugo niya an iya mga surugoon, “Ipahirayo ako kay grabe an akon kasamdan!”

²⁴Ginbalhin hiya nira tikang han iya karuwahe ngadto hin lain niya nga karuwahe ngan gindara hiya ngadto ha Jerusalem. Didto han hadianon nga mga lubngaan. Nagmabidoon an ngatanan nga mga tawo han Juda ug Jerusalem tungod han iya pagkamatay.

²⁵Nagkomposo hi manaragna Jeremias hin usa nga pagnguyngoy para kan Hadi Josias. Nahimo na nga batasan han Israel, han mga magkaranta nga kalalaken-an ug kababayen-an hin paggamit hini nga kanta kon nagmamabidoon hira tungod ha iya. Hiaagian an kanta dida han tinirok nga mga pagnguyngoy ni Jeremias.

²⁶Nahisurat an ngatanan nga ginbuhat ni Josias dida han Kasaysayan han Kahadian han Israel ug Juda—an iya pag-alagad han GINOO, an iya pagsugot han Balaod, ngan an kasaysayan han iya kinabuhi tikang ha tinikangan ngadto ha kataposan.