Read Waray Samarenyo Meaning Based 2 Cronicas 36 Bible Online

2 Cronicas 36 - Waray Samarenyo Meaning Based bible

2 Cronicas 36

¹Ginpili han mga tawo han Juda hi Joacas nga anak ni Josias ngan gindihogan hiya nga hadi didto ha Jerusalem.

²Baynte tres an panuigon ni Joacas han kahimo niya nga hadi han Juda ngan naghadi hiya hin tulo ka bulan ha Jerusalem.

³Ginpriso hiya ni Hadi Neco ngan ginpabayad an Juda hin buhis nga mga 3,500 ka kilo nga salapi ngan mga 34 ka kilo nga bulawan.

⁴Ginhimo ni Neco nga hadi han Juda hi Eliaquim nga bugto ni Joacas, ngan ginliwanan an iya ngaran hin Joakim. Gindara ni Neco hi Joacas ngadto ha Ehipto.

⁵Baynte singko an panuigon ni Joakim han kahimo niya nga hadi han Juda ngan naghadi hiya hin 11 ka tuig ha Jerusalem.

⁶Ginsulong ni Hadi Nabucodonosor han Babilonia an Juda, nabihag hi Joakim, ngan gindara hiya nga kinadenahan ngadto ha Babilonia.

⁷Gindara ni Nabucodonosor in pira han mga manggad han Templo ngan iginbutang ini ha iya palasyo ha Babilonia.

⁸Nahisurat an ngatanan nga ginbuhat ni Joakim dida han Kasaysayan han Kahadian han Israel ug Juda, lakip an makapupungot nga iya mga binuhatan ngan an karat-an nga iya nabuhat. Sinmaliwan ha iya hin pagkahadi hi Joaquin nga iya anak.

⁹Dyisiotso an panuigon ni Joaquin han kahimo niya nga hadi han Juda ngan naghadi hiya hin tulo ka bulan ug napulo ka adlaw ha Jerusalem. Nakasala liwat hiya han GINOO.

¹⁰Han pagtikang na han panahon han katsirak, gindara nga bihag ni Hadi Nabucodonosor ngadto ha Babilonia hi Joaquin ngan gindara liwat niya an mga manggad han Templo. Niyan ginhimo ni Nabucodonosor nga hadi han Juda ug Jerusalem hi Sedequias nga bata[44] ni Joaquin.

¹¹Baynte uno an panuigon ni Sedequias han kahimo niya nga hadi han Juda ngan naghadi hiya hin 11 ka tuig ha Jerusalem.

¹²Nakasala hiya han GINOO ngan waray hiya mamati nga mapinaubsanon kan manaragna Jeremias nga naghimangraw han pulong han GINOO.

¹³Sinmupil hi Sedequias kan Hadi Nabucodonosor nga nagpugos ha iya hin pagsumpa ha ngaran han GINOO nga magmamaunongon hiya kan Nabucodonosor. Nagdumiri gud hiya hin pagbasol ngan pagbalik ngadto han GINOO nga Dyos han Israel.

¹⁴Labot hini, ginsunod han mga pangulo han Juda, han kapadian, ngan han mga tawo an makapupungot nga susbaranan han mga nasod nga nagpapalibot ha ira ha pagsingba hin mga diyosdiyos, sanglit ginhugawan nira an Templo nga ginbaraan han GINOO.

¹⁵Nagpadayon an GINOO nga Dyos han ira kaapoy-apoyan hin pagpadara hin mga manaragna hin pagpahimatngon han iya mga tawo, kay karuyag niya nga matalwas hira ngan an Templo.

¹⁶Kundi gin-intrimisan la nira an mga sinugo han Dyos, ginpasibay-an nira an iya mga pulong, ngan gintaw-an nira an iya mga manaragna, tubtob nga ha kataposan duro na gud an kasina han Dyos han iya mga tawo nga waray na gud makakalikay han iya kasina.

¹⁷Sanglit itinugot han GINOO nga sulongon hira han hadi han Babilonia. Pinamatay han hadi an batan-on nga kalalaken-an han Juda bisan ha sakob han Templo. Waray gud niya kalooy bisan kan kanay, batan-on o tigurang, lalake o babaye, masakiton o maupay an panlawas, igintubyan han Dyos hira ngatanan ha iya.

¹⁸Gintikasan han hadi han Babilonia an Templo, an hirimosan han manggad ha Templo, ngan an manggad han hadi ngan han iya mga opisyal, ngan gindara ini ngatanan ngadto ha Babilonia.

¹⁹Ginsunog niya an Templo ngan an syudad upod an ngatanan nga mga palasyo ngan an ngatanan nga mga manggad, ngan ginruba an pader han syudad.

²⁰Gindara niya ha Babilonia an ngatanan nga nanhisalin nga buhi, diin nag-alagad hira nga mga oripon niya ngan han iya mga tulin ngada han pagkatukod han ginhadian han Persia.

²¹Sanglit natuman an igintagna han GINOO pinaagi han manaragna Jeremias: “Magpapabilin nga binayaan an tuna sulod hin 70 ka tuig ha pagbayad han waray pagtumana nga mga pagpahuway.”[45]

²²Dida han syahan nga tuig nga pagkaemperador[46] ni Ciro han Persia, gintuman han GINOO an iya iginsiring pinaagi kan manaragna Jeremias. Gin-aghat niya hi Ciro hin pagpagawas hinin masunod nga sugo ngan pagpadara hini nga sinurat basi basahon hin dako nga tingog ha bug-os niya nga ginhadian.

²³“Amo ini an sugo ni Ciro nga Emperador han Persia. Ginhimo ako nga punoan han bug-os nga kalibutan han GINOO nga Dyos han langit, ngan iginhatag ha akon an katungdanan hin pagtindog hin templo para ha iya didto ha Jerusalem, ha Juda. Yana pakadto kamo ngatanan nga mga tawo han Dyos, ngan maada unta ha iyo an GINOO nga iyo Dyos.”