Read Waray Samarenyo Meaning Based 2 Cronicas 4 Bible Online

2 Cronicas 4 - Waray Samarenyo Meaning Based bible

2 Cronicas 4

¹Ginpahimo ni Hadi Solomon in bronse nga altar nga siyam ka metros ka kwadrado ngan 4 1/2 ka metros an kahitaas.

²Ginhimo liwat niya in malidong nga tangke nga bronse nga 2.2 ka metros an kahitaas, 4 1/2 ka metros an diyametro, ngan 13.2 ka metros an likos.

³May duha ka rungbay hin mga borda nga nagtutupad palibot ha gawas nga ganggang han tangke.[9] Dagway hin mga baka an igindungan hin pagdibuho dida han pagpormaha han tangke.

⁴Natungtong an tangke ha mga bungkog hin dose nga bronse nga mga baka nga naatubang tipagawas: tulo, tipaamihanan, tulo, tipakatunda, tulo, tipatimogan, ngan tulo, tipasinirangan.

⁵Tulo ka pulgada an kadakmol han ligid han tangke. An ligid han ganggang sugad hin kanan kupa nga nabawod tipagawas sugad hin nabuklad nga bukad. Nasulod hin mga 15,000 ka galon an tangke.

⁶Naghimo liwat hira hin napulo nga mga hugasan nga palanggana nga ibinutang an lima ha timogan nga ligid han Templo ngan ha amihanan nga ligid an lima. Ginagamit ini hin paghugas han mga bahin han mga hayop nga tutuboron. Gagamiton han kapadian hin panhugas an tubig didto han dako nga tangke.

⁷Naghimo hira hin napulo nga bulawan nga mga kandelero sumala han nahigaraan nga surubdan, ngan napulo nga mga lamesa, ngan iginbutang ini ha hiluag nga kwarto han Templo, tag lima nga mga kandelero ngan lima nga mga lamesa ha kada ligid. Naghimo liwat hira hin usa ka gatos nga mga makaong nga bulawan.

⁹Naghimo hira hin sulod nga bungsaran para han kapadian, ngan gawas liwat nga bungsaran. Ginputos hin bronse an mga sada han mga portahan ha butnga han mga bungsaran.

¹⁰Iginbutang an tangke hirani han timogan-sinirangan nga kanto han Templo.

¹¹Naghimo liwat hi Hiram hin mga daba, mga pala, ngan mga makaong. Ginhuman niya an ngatanan nga mga garamiton nga iginsaad niya kan Hadi Solomon nga iya hihimoon para han Templo: An duha nga mga harigi An duha nga mga uloulo nga dagway hin makaong ha bawbaw han harigi An adorno hin hinokot nga mga kadena ha kada uloulo An 400 nga bronse nga mga granada nga iginpila hin duha ka rungbay palibot han adorno han kada uloulo An napulo[10] nga mga karomata An napulo nga mga palanggana An tangke An dose nga mga tudo nga baka nga nahawid han tangke An mga daba, mga pala, ngan mga tinidor Ginhimo ni Hiram nga batid nga paragtrabaho ini ngatanan nga mga garamiton[11] tikang hin pinainggat nga bronse sumala han iginsugo ni Hadi Solomon nga gagamiton ha Templo han GINOO.

¹⁷Iginpahimo han hadi ini ngatanan didto hin pandayan hin puthaw ha butnga han Sucot ug Sereda[12] didto ha Kahamub-an Jordan.

¹⁸Damo hin duro an nahimo nga mga garamiton sanglit waray tawo nga nakaihap han kabug-at han nagamit nga bronse.

¹⁹Iginpahimo liwat ni Hadi Solomon in mga garamiton nga bulawan para han Templo: an altar ngan an mga lamesa para han tinapay nga halad ngadto sa Dyos;

²⁰an mga kandelero ngan an mga suga nga hinimo han gimamaupayi nga bulawan nga para hin pag-agma ha atubangan han Labi ka Baraan nga Dapit, sumala han plano;

²¹an mga adorno nga mga bukad, an mga suga, ngan an mga kimpit;

²²an mga ipaparong han mga suga, an mga makaong, an mga plato para han insyenso, ngan an mga sangga nga ginagamit hin pagdara hin mga baga. Ginhimo hin puraw nga bulawan ini ngatanan nga mga garamiton. Binawbawan hin bulawan an garugawas nga mga porta han Templo ngan an mga porta han Labi ka Baraan nga Dapit.