Read Waray Samarenyo Meaning Based 2 Cronicas 7 Bible Online

2 Cronicas 7 - Waray Samarenyo Meaning Based bible

2 Cronicas 7

¹Han katapos pag-ampo ni Solomon, kinmunsad in kalayo tikang ha langit ngan gintubod an iginhalad nga mga hayop, ngan napuno an Templo han mabislaw nga kapawa han GINOO.

²Tungod nga puno man an Templo han mabislaw nga kapawa, waray makasulod an kapadian.

³Han paghikit-i la han mga tawo han Israel han kalayo nga kinmunsad tikang ha langit ngan han kapawa nga nakapuno han Templo, yinmukbo hira ha tuna hin pagsingba han Dyos ngan nagdayaw hira ha iya tungod han iya pagkamaupay ngan han iya dayon nga paghigugma.

⁴Niyan naghalad ngadto han GINOO hi Solomon ngan an ngatanan nga mga tawo hin mga hayop nga tutuboron.

⁵Naghalad hiya hin 22,000 nga mga baka ug 120,000 nga mga karnero nga mga halad hin pakigdait. Sanglit pinaagi hini nga mga buhat niya ngan han ngatanan nga mga tawo ira ginhalad an Templo.

⁶Tinmindog an kapadian didto ha mga dapit nga igintudlok ha ira, ngan tinmindog nga naatubang ha ira an mga Levita nga nagdadayaw han Dyos, dinuyogan han mga turonggon nga iginhatag ha ira ni Hadi David, ngan nagkanta hira han karantahon, “Ha kadayonan an Iya Paghigugma!” sumala han sugo ha ira ni David. Nagtrompeta an kapadian samtang natindog an ngatanan nga mga tawo.

⁷Iginhalad liwat ni Solomon an butnga nga bahin han bungsaran, an dapit ha atubangan han Templo, ngan iya ini ginhalaran hin mga hayop nga gintubod nga mga bug-os pa; han mga halad hin pagkaon, ngan han tambok han mga halad hin pakigdait. Ginbuhat niya ini kay haligutay para hini ngatanan nga mga halad an altar nga bronse nga iya ginhimo.

⁸Ginsaurog ni Solomon ngan han ngatanan nga mga tawo han Israel hin pito ka adlaw an Pyesta han mga Sirongan. May-ada damo nga mga tawo tikang ha Aragian han Hamat ha amihanan ngan han pag-ultan han Ehipto ha timogan.

⁹Ginamit nira in pito ka adlaw para han paghalad han altar ngan pito pa ka adlaw para han pyesta. Ha kataposan nga adlaw may nira pangatapusan nga pagsaurog,

¹⁰ngan han pagkabuwas, an ika-23 ka adlaw han ikapito nga bulan, ginpauli ni Solomon an mga tawo. Malipayon gud hira tungod han ngatanan nga kaupayan nga iginhatag han GINOO ha iya mga tawo nga Israel, kan David, ngan kan Solomon.

¹¹Han kahuman na magtindog hi Hadi Solomon han Templo ngan han palasyo, nga natuman niya nga mainuswagon an iya ngatanan mga plano,

¹²pinmakita ha iya ha gab-i an GINOO. Nagsiring ha iya an GINOO, “Pinamatian ko an imo pag-ampo ngan kinakarawat ko ini nga Templo nga dapit nga paghahalaran ha akon han mga hayop nga tutuboron.

¹³Kon parad-an kamo han maiha nga huraw o hin mga duron hin pagkaon han mga tanom, o hin sakit an akon mga tawo,

¹⁴ngan mag-ampo hira ha akon ngan magbasol ngan bumaya han maraot nga ira binuhatan, niyan pamamatian ko hira didto ha langit, pasasayloon ko an ira mga sala, ngan magmamainuswagon hira dinhe han ira tuna.

¹⁵Babantayan ko ini nga Templo ngan andam ako hin pamati han ngatanan nga mga pag-ampo nga iginhahalad dinhe,

¹⁶kay ginpili ngan ginhalad ko ini nga dapit nga pagsisingbahan ha akon ha kadayonan. Babantayan ngan pananalipdan ko ini ha ngatanan nga panahon.

¹⁷Kon mag-alagad ka nga matinumanon ha akon sugad han ginbuhat ni David nga imo amay, ngan magsugot ka han akon mga balaod ngan magbuhat ka han ngatanan nga akon iginsugo ha imo,

¹⁸tutumanon ko an saad nga akon ginhimo kan David nga imo amay han pagsidnga ko ha iya nga paghahadian an Israel han iya mga tulin ha kadayonan.

¹⁹Kundi kon supakon mo ngan han imo mga tawo an mga balaod ngan mga sugo nga iginhatag ko ha imo ngan magsingba kamo hin iba nga kadiyosan,

²⁰niyan kukuhaon ko ikaw ha tuna nga iginhatag ko ha imo, ngan isisikway ko ini nga Templo nga akon ginhalad nga dapit nga pagsisingbahan ha akon. Pag-iintrimisan ngan pagtatamayon ini nga Templo han mga tawo ha ngatanan nga dapit.

²¹“Ginpapasidunggan na gud yana an Templo, kundi onina mahipapausa hini an ngatanan nga malabay ngan mapakiana, ‘Kay ano nga ginbuhat ini han GINOO hini nga tuna ngan hini nga Templo?’

²²Mabaton an mga tawo, ‘Tungod ini nga ginbayaan nira an GINOO nga ira Dyos nga nagpagawas han ira kaapoy-apoyan tikang ha Ehipto. Gin-alagad nira in iba nga kadiyosan ngan ira ginsingba. Sanglit ihinatag ha ira han GINOO ini nga karat-an.’”