Read Waray Samarenyo Meaning Based 2 Cronicas 9 Bible Online

2 Cronicas 9 - Waray Samarenyo Meaning Based bible

2 Cronicas 9

¹Hinbatian han rayna han Saba an bantog ni Hadi Solomon, ngan nasingadto hiya ha Jerusalem hin pagsari ha iya pinaagi hin magkuri nga mga pakiana. Nagdara hiya hin damo nga mga surugoon, sugad man mga kamelyo nga kargado hin mga panakot, mga alahas, ngan damo gud nga bulawan. Han pagkita na niya ngan hi Solomon, ginpakianhan niya hi Solomon han ngatanan nga mga pakiana nga iya nahuhunahunaan.

²Ginbaton ni Solomon ini ngatanan; waray butang nga makuri ha iya hin pagsaysay.

³Binmati an rayna han Saba han dako nga kinaadman ni Solomon ngan kinmita hiya han palasyo nga iya gintindog,

⁴han pagkaon nga igindurot ha iya lamesa, an mga kwarto han iya mga opisyal, an pag-alagad ha iya han iya mga sakop ha palasyo, ngan an mga uniporme han mga surugoon nga nagsisirbe ha iya ha mga kombite, ngan an mga hayop nga tinubod nga iya iginhalad[15] ha Templo. Dako gud an iya katingala tungod han katahom hini ngatanan.

⁵Ginsiring niya an hadi, “Matuod gud an akon hinbatian didto ha akon kalugaringon nga nasod mahitungod ha imo[16] ngan han imo kinaadman!

⁶Waray ako tumuod han ira iginsumat ha akon tubtob han akon pagkanhi ngan pakakita ko hini ha akon kalugaringon nga mga mata. Diri ngani katunga an akon hinbatian. Labaw pa an imo kinaadman han iginsumat ha akon han mga tawo.

⁷Hin kapalaran han mga tawo nga dayuday nag-aalagad ha imo atubangan, ngan namamati han imo makinaadmananon nga mga pulong!

⁸Dayawon an GINOO nga imo Dyos! Iginpakita niya an iya kalipay ha imo pinaagi hin paghimoa ha imo nga hadi nga magpapangulo ha iya ngaran. Tungod nga hinihigugma niya an Israel nga iya mga tawo ngan naruruyag nga magpadayon hira ha kadayonan, ginhimo ka niya nga ira hadi basi padayonon mo an balaod ug katadongan.”

⁹Naghatag hiya kan Hadi Solomon han mga regalo nga iya gindara: hirani 5,000 ka kilo nga bulawan ngan damo hin duro nga mga panakot ngan mga alahas. Waray nagud masugad ka mag-upay nga mga panakot hadton iginhatag han rayna han Saba kan Hadi Solomon. (

¹⁰An mga tawo ni Hadi Hiram ug Hadi Solomon nga nagdara hin bulawan tikang ha Ofir nagdara liwat hin sandalo nga kahoy ngan mga alahas.

¹¹Ginggamit ni Solomon an kahoy hin paghimo hin mga hagdan han Templo ngan han iya palasyo ngan paghimo hin mga arpa ngan mga lira para han mga paragtokar. Waray pa sugad hito nga hinkit-an hadto ha tuna han Juda.)

¹²Gintagan ni Hadi Solomon an rayna han Saba han ngatanan nga iya pinangaro. Labot la ini han iya iginhatag ha iya nga balyo han mga regalo[17] nga gindara niya kan Solomon. Niyan inmoli hiya ngan an iya mga surugoon ngadto ha tuna han Saba.

¹³Kada tuig nakarawat hi Hadi Solomon hin sobra 25,000 ka kilo nga bulawan,

¹⁴labot han mga buhis nga iginbayad han mga magparatigayon ngan mga nigosyante. Gindad-an liwat hiya hin salapi ug bulawan han kahadian han Arabia ngan han mga gobernador han mga distrito nga Israelita.

¹⁵Naghimo hi Solomon hin 200 nga higlapad nga mga taming nga pinutos hin mga pito ka kilo nga pinilpig nga bulawan an kada usa,

¹⁶ngan 300 nga harohagligot nga mga taming nga pinutos hin mga upat ka kilo nga pinilpig nga bulawan an kada usa. Iginpabutang niya ini nga mga taming didto ha Ruwang han Kagurangan Libano.[18]

¹⁷Iginpahimo liwat han hadi in dako nga trono. Pinutos hin marpil in usa ka bahin hini ngan pinutos hin puraw nga bulawan an iba nga bahin.

¹⁸May unom nga mga balitang ngadto han trono ngan may taramakan ha ubos nga pinutos liwat hin bulawan. May mga hangbuyan ha paluyo nga ligid han trono, ngan may natindog nga dagway hin liyon ha kada ligid.

¹⁹Nakada ha mga balitang in dose nga dagway hin mga liyon, pinaligiran an kada balitang hin duha nga bulto hin liyon. Waray pa trono nga sugad hini ha bisan diin nga ginhadian.

²⁰Hinimo hin bulawan an ngatanan nga irimnan nga mga kopa ni Hadi Solomon, ngan puraw nga bulawan an ngatanan nga mga garamiton ha Ruwang han Kagurangan Libano. Waray pag-isipa an salapi nga mahal ha panahon ni Solomon.

²¹May-ada niya mga barko ha kalalawdan nga nabiyahe upod han mga barko ni Hadi Hiram. Kada tulo ka tuig nabalik an iya mga barko nga may dara nga bulawan, salapi, marpil, mga urang-utang, ngan mga ulot.

²²Linabwan ni Hadi Solomon hin kariko ngan kamakinaadmananon an bisan hin-o nga hadi ha kalibutan.

²³Napakiana ha iya hira ngatanan, hin pamati han kinaadman nga iginhatag ha iya han Dyos.

²⁴Nagdara kan Solomon an kada usa ha ira in mga regalo—mga hinimo hin salapi ug bulawan, hilawig nga mga panapton, mga hinganiban, mga panakot, mga kabayo, ngan mga mula. Nagpadayon ini tuigtuig.

²⁵May-ada liwat hi Hadi Solomon 4,000 nga mga balaybalay han iya mga karuwahe ngan mga kabayo, ngan may-ada niya 12,000 nga mga kabayo nga para hin dikabayo nga mga sondalo. An pira hini ginbutang niya ha Jerusalem, ngan an iba ginbutang niya ha iba nga mga syudad.

²⁶Gilalabawi hiya nga punoan han ngatanan nga kahadian han katunaan tikang ha Salog Eufrates ngadto ha Filistia ngan ha pag-ultan han Ehipto.

²⁷Ha panahon han iya paghadi sugad la hin bato ka kumon an salapi ha Jerusalem, ngan an mga sidro sugad ka damo hin duro han mga sikomoro nga nakakaluob ha ubos han kapungtoran han Juda.

²⁸Pinmalit hi Solomon hin mga kabayo tikang ha Musri[19] ngan tikang han ngatanan nga mga nasod.

²⁹Iginsurat an iba nga mga nahimo ni Solomon tikang ha tinikangan ngadto ha kataposan dida han Kasaysayan ni Natan nga Manaragna, dida han Panagna ni Ahias han Silo, ngan dida han Mga Panan-awon ni Ido nga Manaragna, nga naghihinabi liwat han pagkahadi ni Hadi Jeroboam han Israel.

³⁰Naghadi didto ha Jerusalem hi Solomon han bug-os nga Israel hin 40 ka tuig.

³¹Namatay hiya ngan iginlubong ha Syudad ni David, ngan sinmunod ha iya hin pagkahadi hi Roboam nga iya anak.