Read Waray Samarenyo Meaning Based Esdras 4 Bible Online

Esdras 4 - Waray Samarenyo Meaning Based bible

Esdras 4

¹Hinbatian han mga kaaway han mga tawo han mga banay nira Juda ug Benjamin nga ootrohon hin pagtindog an Templo han GINOO nga Dyos han Israel hadton mga inmoli tikang han paghalina ha ira.

²Nakigkita hira kan Sorobabel ngan han mga puno han mga banay ngan nagsiring, “Pabuliga kami ha iyo hin pagtindog han Templo. Nasingba kami han amo ngahaw nga Dyos nga iyo ginsisingba, ngan naghinalad kami ha iya tikang pa han pagdad-a ha amon ni Esardad[6] nga hadi han Asiria.”

³Ginsiring hira nira Sorobabel, Josue, ngan han mga puno han mga banay, “Diri kami nagkikinahanglan han iyo bulig hin pagtindog han templo han GINOO nga amon Dyos. Kamo la an magtitindog hini sumala han sugo ha amon ni Emperador Ciro han Persia.”

⁴Niyan nagtalinguha an mga tawo nga naukoy han tuna hin paghulop ngan paghadlok han mga Judiyo ngan hin pagpugong nga diri hira magtrabaho.

⁵Ginhukipan liwat nira in mga opisyal nga taga-Persia hin pag-ulang-ulang ha ira. Ginbinuhat ini nira ha bug-os nga panahon han pagkahadi ni Emperador Ciro ngan tubtob pa han pagkahadi ni Emperador Dario.

⁶Han pagtikang han pagkahadi ni Emperador Asuero, nagpasaka hin sinurat nga mga sumbong an mga kaaway han mga tawo nga naukoy ha Juda ug Jerusalem.

⁷Niyan han hadi liwat hi Emperador Artajerjes han Persia, nagsurat ngadto han emperador hira Baselan, Mitdridates, ug Tabel ngan an ira mga kaurosa. Ginsurat ha pinulongan nga Aramaica[7] ngan kinahanglan nga paghubaron an kahulogan kon basahon.

⁸Nagsurat liwat hi Rehum nga gobernador ngan hi Simsai nga sekretaryo han lalawigan ngadto kan Emperador Artajerjes hiunong han Jerusalem nga amo ini masunod:

⁹“Tikang kan Rehum nga gobernador, kan Simsai nga sekretaryo han lalawigan, ngan han ira mga kauropdan, han mga maghurukom, ngan han iba nga mga opisyal, nga taga-Erec, taga-Babilonia, ngan taga-Susa didto ha tuna han Elam,

¹⁰ngan upod an iba nga mga tawo nga ginbalhin han makusog ngan gamhanan nga Asulbanipal tikang han ira mga urokyan ngan iginpahimutang ha syudad han Samaria ngan ha iba nga dapit han Katundan han Eufrates nga Lalawigan.”[8]

¹¹Amo ini an surat nga ira ginpadara: “Ngadto kan Emperador Artajerjes tikang han iya mga surugoon nga mga tawo ha Katundan han Eufrates.

¹²“Karuyag namon nga mahibaro an Imo Kaharangdon nga an mga Judiyo nga nagkaabot dinhe tikang han iba nimo nga katunaan nag-uokoy na ha Jerusalem ngan nagaayad na liwat hito nga maraot ngan masupilon nga syudad. Nagtikang na hira hin pagtindog liwat han mga pader ngan diri ngani maiiha nga mahuhuman nira.

¹³Harangdon nga Emperador, kon matindog na liwat ini nga syudad ngan mahuman na an mga pader, maundang pagbayad han ira mga buhis an mga tawo, ngan makunhod gud an panalapi han ginhadian.

¹⁴Yana, tungod nga may kabaralsan man kami han Imo Kaharangdon diri namon karuyag nga mahinabo ini, sanglit nagsasagdon kami

¹⁵nga magsugo ka hin pagpausisa han mga tinipig nga sinurat han imo mga ginikanan. Kon buhaton mo ini, hibabaroan mo nga dayuday masupilon ini nga syudad, ngan tikang pa ha kadaanan nga mga panahon nakahatag ini hin kasamokan ha mga kahadian ngan mga punoan han mga lalawigan. An iya mga tawo makuri gud sumugot han mga punoan. Amo ini nga ginbungkag an syudad.

¹⁶Sanglit natoo kami nga kon matindog na liwat ini nga syudad ngan mahuman na an iya mga pader, diri na makakag-angkon an Imo Kaharangdon han Katundan han Eufrates nga Lalawigan.”

¹⁷Nagpadara hini nga balos an emperador: “Kumosta kan Rehum nga gobernador, kan Simsai nga sekretaryo han lalawigan, ngan han ira mga kauropod nga naukoy ha Samaria ngan ha iba pa ha Katundan han Eufrates.

¹⁸“Ginbasa ha akon an surat nga iyo ginpadara.

¹⁹Nagsugo ako hin pag-usisa, ngan hinbaroan nga tikang pa ha kadaanan nga mga panahon sinmupil an Jerusalem han mga gamhanan nga kahadian, ngan puno ini hin masupilon ngan magsamok nga mga tawo.

²⁰Naghadi didto in gamhanan nga kahadian ngan nagpangulo han bug-os nga lalawigan ha Katundan han Eufrates, ngan nangaro hin mga buhis ngan mga kabaraydan.

²¹Sanglit kinahanglan magpagawas kamo hin sugo nga diri ipadayon an pag-ayad han syudad hini nga mga tawo tubtob nga kumarawat kamo hin sugo tikang ha akon.

²²Buhata ini dayon basi waray na karat-an nga mahinabo han akon mga ginpapanuyo.”

²³Kahuman gudla basaha ini nga surat ni Emperador Artajerjes ngada kanda Rehum, Simsai, ngan ha ira mga kauropod, nagdagmit hira ngadto ha Jerusalem ngan ginpirit nira hin pagpaukoy han trabaho an mga Judiyo.

²⁴Sanglit amo ini an nahinabo nga an trabaho han Templo waray na ipadayon ngada han ikaduha ka tuig nga paghadi ni Emperador Dario han Persia.