Read Waray Samarenyo Meaning Based Esdras 6 Bible Online

Esdras 6 - Waray Samarenyo Meaning Based bible

Esdras 6

¹Sanglit nagsugo hi Emperador Dario nga usisahon an hadianon nga mga sinurat nga ginhipos didto ha Babilonia.

²Kundi didto mahiagii ha syudad han Ecbatana, ha lalawigan han Media in linikid nga basahan diin nahisurat inin masunod:

³“Dida han syahan nga tuig nga iya pagkahadi, nagsugo hi Emperador Ciro nga tindogon liwat an Templo ha Jerusalem, usa nga dapit nga pagbubuhatan han mga paghalad ngan pagsusunogan hin mga halad nga tutuboron, 90 ka pyi an kahitaas han Templo ngan 90 ka pyi an kahiluag.

⁴Titindogon an mga pader pinaagi hin usa ka sapad nga kahoy ha bawbaw hin kada tulo ka sapad nga bato. Babaydan an ngatanan nga gasto tikang han hiriposan han manggad han hadi.

⁵Kinahanglan nga ibalik liwat ha iya dapit ha Templo han Jerusalem an bulawan ngan salapi nga mga garamiton nga gindara ha Babilonia ni Hadi Nabucodonosor tikang ha Jerusalem.”

⁶Niyan iginpadara ni Emperador Dario ini nga balos: “Ngadto kan Tatenai nga gobernador han Katundan han Eufrates, kan Setharbozenai, ngan igkasi mga opisyal ha Katundan han Eufrates. “Pahirayo kamo han Templo

⁷ngan ayaw niyo pag-ulanga an trabaho. Papagtindog han Templo han Dyos an gobernador han Juda ngan an mga pangulo nga Judiyo dida han una nga dapit nga iya hinmutangan.

⁸Nagsusugo ako ha iyo nga buligan hira niyo hin pagtindog han templo. Kinahanglan nga kabaydan dayon an ira gastos tikang han hinipos nga salapi han hadi nga natirok tikang han mga buhis ha Katundan han Eufrates, basi diri maulang an trabaho.

⁹Tatagan niyo adlaw-adlaw hin waray gud paglangan, an kapadian ha Jerusalem han bisan ano nga ira ginkikinahanglan: mga nati nga baka, mga karnero, o mga kordero nga mga halad nga tutuboron ngadto han Dyos han langit, o trigo, asin, bino, o lana hin olibo.

¹⁰Bubuhaton ini basi makaghalad hira hin mga unong nga tinubod nga makakalipay han Dyos han langit, ngan makag-ampo hira han iya bendisyon para ha akon ngan para han akon mga anak.

¹¹Nagsusugo pa ako nga kon may magtalapas hini nga sugo, kukuhaon in usa nga gipat ha iya balay, tataison ini, ngan ipapatuhos ha iya lawas. Katapos hihimoon nga tinambak nga sighot an iya balay.

¹²Pukanon unta han Dyos nga nagpili han Jerusalem nga dapit nga pagsisingbahan ha iya an bisan hin-o nga hadi o nasod nga magtalapas hini nga sugo ngan magtalinguha hin pagbungkag han Templo han Jerusalem. Ako, hi Dario, an nagsugo hini. Kinahanglan pagsugton gud an akon sugo.”

¹³Niyan gintuman nira Gobernador Tatenai, Setharbozenai, ngan han ira igkasi mga opisyal sumala han iginsugo han emperador.

¹⁴Nagpadayon hin pagtindog han Templo an mga pangulo nga Judiyo sumala han ginsiring ha ira nira Hageo ug Zacarias nga mga manaragna. Nahuman nira an Templo sumala han iginsugo ha ira han Dyos han Israel, ngan nira Ciro, Dario, ug Artajerjes nga mga hadi han Persia.

¹⁵Nahuman nira an Templo dida han ikatulo nga adlaw han bulan Adar, ha ikaunom ka tuig nga pagkahadi ni Dario.

¹⁶An mga tawo han Israel—an kapadian, an mga Levita, ngan an iba pa nga binalik na tikang han ira kahalin—naghalad nga malipayon han templo.

¹⁷Para han paghalad hini nga Templo naghalad hira hin 100 nga mga tudo nga baka, 200 nga mga karnero, ngan 400 nga mga kordero, nga mga unong nga tutuboron ngan hin dose nga lalaki nga mga kanding nga ira halad tungod hin sala, tag-usa ha tagsa nga tribo han Israel.

¹⁸Nagtindog hira hin hugpo hin kapadian ngan mga Levita para han mga buruhaton han Templo ha Jerusalem, sumala han mga tugon nga nahisurat ha basahan ni Moises.

¹⁹[10] Dida han ika-14 nga adlaw han syahan nga bulan han pagkasunod nga tuig nagsaurog han Paglabay an mga tawo nga binalik tikang han paghalina ha ira.

²⁰Naglinis han ira kalugaringon an kapadian ngan an mga Levita, ngan malinis na hira sumala han seremonyas. Gin-ihaw han mga Levita an mga hayop nga tutuboron nga unong han Paglabay para han ngatanan nga mga tawo nga binalik tikang ha paghalina ha ira, para han kapadian, ngan para ha ira ngahaw.

²¹Nangaon an ngatanan nga mga Israelita nga binalik tikang ha paghalina ha ira ngan adton ngatanan nga binmaya han pagano nga mga paagi han iba nga mga tawo nga tinmampo ha ira dida han tuna ngan kinmada hin pagsingba han GINOO nga Dyos han Israel.

²²Nagsaurog hira hin pito ka adlaw nga malipayon han Pyesta han Tinapay nga Waray Patubo. Malipayon gud hira kay ginhimo han GINOO nga umabuyon ha ira an emperador han Asiria,[11] ngan ginbuligan hira han hadi han ira pagtindog na liwat han Templo han Dyos han Israel.