Read Waray Samarenyo Meaning Based Nehemias 6 Bible Online

Nehemias 6 - Waray Samarenyo Meaning Based bible

Nehemias 6

¹Nakabati hira Sanbalat, Tobias, Gesem, ngan an iba nga amon mga kaaway nga nahuman na namon an pagtindog han pader. Waray na mga buhang nga nahibilin dida hini bisan kon waray pa namon mahimutang an mga ganghaan dida han mga aragian.

²Sanglit nagpadara ha akon hin mensahe hira Sanbalat ug Gesem. Naghangyo hira ha akon nga kon mahimo karuyag nira makigkita ha akon didto hin usa han mga baryo ha kapatagan han Ono. Usa ini nga ira pagbitik ha akon kay tuyo nira hin pagdaot ha akon.

³Nagpasugo ako hin mga tawo hin pagsiring ha ira, “Importante inin akon trabaho ngan diri ako makakabaya. Diri mahihimo nga paundangon ko an trabaho tungod la hin pakigkita ha iyo.”

⁴Nakaupat ipadara ha akon an amo ngahaw nga mensahe, ngan ha kada mensahe ginpadara ko ha ira an amo liwat nga baton.

⁵Niyan ginsugo ni Sanbalat in usa han iya mga surugoon hin pagdara para ha akon han ikalima nga surat ngan ini inabrehan nga daan.[12]

⁶Amo ini an surat: “Nasumatan kami ni Gesem ngan han mga higrani nga mga nasod nga nakahunahuna ka ngan an mga Judiyo hin pagsupil, sanglit iyo gintindog na liwat an pader. Nasiring pa hi Gesem nga karuyag ka nga mahimo nga hadi

⁷ngan nagpili ka na hin mga manaragna nga amo an magpapakilala ha imo dinhe ha Jerusalem nga ikaw amo an hadi han Juda. Waray ruhaduha hibabatian na ini han hadi, sanglit maupay kon magkita kita basi paghiruhimangrawan ta ini nga kahimtang.”

⁸Ginpadara ko ngadto ha iya ini nga baton: “Waray gud kamatuoran an imo ginsiring. Imo la ini ngatanan hinimohimo.”

⁹Nagtalinguha hira hin pagtarhog ha amon basi maundang an trabaho. Nag-ampo ako, “Kundi tagi ako yana hin kusog, O Dyos!”

¹⁰Hini nga panahon dinmuaw ako kan Semias nga anak ni Delaia ngan apo ni Metabel nga waray makakabaya han iya balay. Nagsiring hiya ha akon, “Kinahanglan tumago kita nga duha didto han Baraan nga Dapit han Templo ngan trangkahan ta an mga porta, kay tikanhi hira hin pagpatay ha imo. Makanhi hira yana nga gab-i hin pagpatay ha imo.”

¹¹Binmaton ako, “Diri ako an tawo nga nadalagan ngan natago. Naghuhunahuna ka ba nga tatalwason ko an akon kinabuhi pinaagi hin pagtago didto han Templo? Diri ko ini bubuhaton.”

¹²Han pagpainoinoha ko hini, nasayoran ko nga waray maghimangraw an Dyos kan Semias, kundi nga ginhukipan hiya nira Tobias ug Sanbalat hin paghatag ha akon hini nga pahimatngon.

¹³Ginsuholan hiya nira hin paghadlok ha akon basi ako makasala, ngan basi madaot nira an akon dungog ngan kaalohan ako.

¹⁴Nag-ampo ako, “Hinumdomi, O Dyos, an ginbuhat nira Tobias ug Sanbalat ngan kastigoha hira. Hinumdomi ito nga babaye nga hi Noadias ngan an iba nga mga manaragna nga nagtalinguha hin paghadlok ha akon.”

¹⁵Katapos hin 52 ka adlaw nga trabaho, nahuman kaayad an bug-os nga pader dida han ika-25 nga adlaw han bulan han Elul.

¹⁶Han pakabati hini han amon mga kaaway didto han mga hagrani nga mga nasod, nakasabot hira nga waray nira nawong ig-atubang hin tawo, kay hinbaroan man han ngatanan nga nahuman an trabaho pinaagi han pagbulig han Dyos.

¹⁷Sulod han bug-os hini nga panahon nagsinuratay hira Tobias ngan an mga pangulo nga Judiyo.

¹⁸Damo nga mga tawo didto ha Juda nga inmugop ha iya tungod han iya ugangan nga lalake nga Judiyo, hi Secanias nga anak ni Ara. Labot hini nakaasawa an iya anak nga hi Johanan han anak nga babaye ni Mesolam nga anak ni Baraquias.

¹⁹Naghimangraw ha akon atubangan an mga tawo hiunong han mag-upay nga mga binuhatan ni Tobias ngan danay sumatan hiya han ngatanan nga akon iginsiring. Ngan nagpadayon hiya hin pagsinurat ha akon basi mahadlok ako.