Read Waray Samarenyo Meaning Based Tobit 11 Bible Online

Tobit 11 - Waray Samarenyo Meaning Based bible

Tobit 11

¹Han paglakat ni Tobias, malipayon gud hiya hin duro. Gindayaw niya an Ginoo han langit ug tuna, nga Hadi han bug-os nga kalibutan, kay mainuswagon an iya paglakaton, ngan nagsaad hiya hin pagpasidungog kan Raguel ngan han iya asawa samtang buhi pa hira.[18] Han hirani na hira han syudad han Kaserin, nga gawas gudla han Ninibe,

²nagsiring hi Rafael, “Tobias, maaram ka han kahimtang han imo amay han aton paglakat.

³Kinahanglan mag-una kita han imo asawa ngan andamon naton an balay nga waray pa maabot nga bisan hin-o nga tawo.

⁴Ayaw hingalimot han pagdara han apdo han isda.” Sanglit nag-una hira ngan nagdalagan upod ha ira an ayam ni Tobias.[19]

⁵Hito ngahaw nga takna linmingkod hi Ana nga nagtitinan-aw han dalan nga aagian han iya anak.

⁶Ha gilayon iya hinkit-an nga tikahirani na hi Tobias ngan ginmoliat hiya ngadto kan Tobit, “Kitaa! Aadi na an aton anak ngan upod niya an iya sangkay!”

⁷Han waray pa hira aabot kan Tobit, nagsiring hi Rafael kan Tobias, “Makakakita na liwat hi imo tatay.

⁸Igtampos la an apdo han isda dida han iya mga mata sugad hin papilit. An medisina amo an makakapamara han mga bulog ngan malalaknit mo ini, ngan makakakita na liwat an imo tatay.”

⁹Nagdalagan hi Ana ngadto han iya anak, ginggakos hiya niya, ngan nagsiring, “Yana nga hinkit-an ko na ikaw nga buhi pa, anak ko, mahihimo na nga mamatay ako ha kamurayaw!” Ngan nagtangis hiya tungod hin kalipay.

¹⁰Binmuhat hi Tobit ngan nahipakulob ngani dida han aragian han bungsaran.

¹¹Gindaop hiya ni Tobias nga nakakakapot han apdo. Ginkaptan niya hi iya tatay ngan ginhuypan an iya mga mata. Nagsiring hiya, “Ayaw na kabaraka, Itay.”

¹²Niyan igintampos ni Tobias an apdo dida han mga mata ni Tobit, ngan tikang han ligid ha iya mga mata ginlaknit ni Tobias an mga bulog.

¹⁴Ginggakos ni Tobit an liog ni Tobias ngan nagtangis tungod hin kalipay. Niyan sinminggit hiya, “Nakakakita ako ha imo! Anak ko, ikaw an kapawa han akon mga mata! “Pagdayawon an Dyos, Pagdayawon hiya tungod han iya pagkaharangdon. Pagdayawon an ngatanan niya nga baraan nga mga anghel. Magpadayon unta hiya hin pagpakaupay ha aton. Pagdayawon an ngatanan niya nga mga anghel ha kadayonan.

¹⁵Iya gindara ini nga sakit nganhi ha akon, kundi yana nakakakita na ako kan Tobias nga akon anak!” Niyan sinmulod hi Tobias nga malipayon ngadto han balay, nga nagdadayaw han Dyos ha dako nga tingog. Iya iginsumat kan iya tatay an iya pagkamainuswagon, nga diri la dara niya an kwarta ha pagbalik niya, kundi nakaasawa pa hiya kan Sara nga anak ni Raguel, nga sinmunod la ha ira ngan maabot na ha diri maiha.

¹⁶Nasindak hi Tobit ngan nagdayaw han Dyos han paggawas niya hin pagtapo han asawa ni Tobias didto han ganghaan han syudad. Han paghikit-i ha iya han mga tawo han Ninibe, nanhipausa hira kay naglugaring na hiya hin paglakat, ngan waray na nagtutugway ha iya.

¹⁷Gindayaw ni Tobit an Dyos ngan iya iginsumat ha ngatanan kon gin-unan-o han Dyos, tungod han iya kalooy, hin pagpahiuli han iya pagkita. Han pagtapo ni Tobit kan Sara, iya pinangumosta hiya hin pagsiring, “Maupay nga pag-abot, anak! Pagdayawon an Dyos tungod han pagdara ha imo nganhi ha amon, anak ko. Pagbendisyonan unta han Dyos hi imo tatay, sugad man ikaw ngan hi Tobias nga akon anak. Maupay nga pag-abot nganhi han imo bag-o nga panimalay. Dayuday bendisyonan ka unta hin maupay nga lawas ngan kalipayan. Anak ko, uswag ngadi ha balay.” Usa ini nga adlaw hin dako nga kalipay para han ngatanan nga mga Judiyo han Ninibe.

¹⁸Hinmapit hira Ahikar ug Nadab nga mga umangkon ni Tobit ngan nakaangbit hira han kalipay ni Tobit.