Read Waray Samarenyo Meaning Based Tobit 12 Bible Online

Tobit 12 - Waray Samarenyo Meaning Based bible

Tobit 12

¹Han katapos na han kombite han pagkasal, gintawag ni Tobit hi Tobias nga iya anak ngan ginsiring hiya, “Anak, talinguhaa nga kasuholan an imo iginkaupod ngan ayaw hingalimot hin paghatag ha iya hin usa nga pahalipay.”

²Nagpakiana ha iya hi Tobias, “Itay, ha imo paghunahuna, pira ba an kinahanglan igsuhol ko ha iya? Diri ako maawa hin paghatag ha iya han katunga han ngatanan nga amon nadara nganhi.

³Iginbalik ako niya nga waray bisan ano nga nahinabo ngan maupay an akon lawas; kinmadto hiya hin pagkuha han kwarta para ha akon tikang kan Gabael; ginpaiwas niya in usa nga yawa tikang han akon asawa; ngan gintambal niya an imo pagkabuta. Pira nga pahalipay an angay ighatag ha iya?”

⁴Binmaton hi Tobit, “Ighatag an katunga han ngatanan nga iyo gindara nganhi. Igo ito para ha iya.”

⁵Sanglit gintawag ni Tobias hi Rafael ngan ginsiring hiya, “Iini an katunga han imo ginbuligan ha akon hin pagdara nganhi. Imo ini ginpakabuhian; maupay na la nga imo paglakat tipauli.”

⁶Niyan gintawag ni Rafael hira Tobit ug Tobias ngan nagsiring hiya ha ira, “Pagdayawon an Dyos ngan pagsumati an ngatanan hiunong han mag-upay nga mga butang nga iya ginbuhat para ha iyo, basi magpasidungog liwat hira ha iya ngan magkanta han ira pagdayaw. Pahibaroa an ngatanan han ginbuhat han Dyos. Ayaw gud pag-undang hin pagdayaw ha iya.

⁷“Usa nga maupay nga hunahuna an diri pagsumat han tinago hin usa nga hadi, kundi kinahanglan igsumat ha ngatanan nga dapit an ginbubuhat han Dyos, basi pagdayawon ngan pagpasidunggan hiya. “Kon buhaton mo an maupay, waray maraot nga maabot ha imo.

⁸“Mauruupay an kinasingkasing nga pag-ampo ngan an paglipay han Dyos pinaagi hin pagbulig han mga kablas kay han kariko ngan han kadiri tangkod. Mauruupay an paghatag ngadto han mga kablas kay han pagtirok hin bulawan.

⁹Makakatalwas ha imo tikang ha kamatayon in sugad nga pagkamahinatagon, ngan makakahugas han ngatanan mo nga mga sala. Mag-uokoy hin hingpit nga kinabuhi adton mga nahatag ngadto han mga kablas,

¹⁰kundi adton naukoy dida han sala ngan karat-an, amo ini an labaw ka maraot nga ira mga kaaway.

¹¹“Ginsumatan ko na kamo nga angay diri igsumat an tinago hin usa nga hadi, kundi kinahanglan igsumat ha ngatanan an mga butang nga ginbubuhat han Dyos. Yana igpapadayag ko ha iyo an bug-os nga kamatuoran ngan waray ko gud pagtatagoon.

¹²Tobit, han pag-ampo niyo ngan hi Sara, amo ako an nagdara han iyo mga pag-ampo ngadto han iya mahimayaon nga atubangan. Amo ngahaw an akon ginbuhat ha kada paglubong mo han minatay.

¹³Dida han adlaw han pagtukdaw mo tikang han lamesa, ngan waray ka kumaon basi iglubong mo adto nga minatay, ginsugo ako han Dyos hin pagsari ha imo.

¹⁴Kundi iya liwat ako ginsugo hin pagtambal ha imo ngan pagtalwas kan Sara nga imo umagad han iya mga kakurian.

¹⁵Amo ako hi Rafael nga usa han pito nga mga anghel nga natindog didto han mahimayaon nga atubangan han Ginoo, nga andam hin pag-alagad ha iya.”

¹⁶Duro an kahadlok nira Tobit ug Tobias ngan natumba hira ha tuna, nga nangungurog hin kahadlok.

¹⁷Kundi nagsiring ha ira hi Rafael, “Ayaw kamo kahadlok; maupay an ngatanan. Dayuday panumdom kamo hin pagdayaw han Dyos.

¹⁸Ginpakanhi ako niya hin pagbulig ha iyo; waray ako kumanhi ha akon kalugaringon. Sanglit pagkanta kamo han mga pagdayaw sa Dyos samtang mga buhi pa kamo.

¹⁹Han paghunahuna niyo nga iyo ako hinkit-an nga nakaon, ha tinuod waray ako kumaon hin bisan ano; daw sugad la adto hin nakaon ako.

²⁰Samtang aanhi pa kamo hini nga kalibutan, kinahanglan pagdayawon niyo an Ginoo nga Dyos ngan pagpasalamatan niyo hiya. Yana kinahanglan bumalik na ako ngadto ha iya nga nagsugo ha akon. Igsurat an ngatanan nga mga butang nga nahinabo ha iyo.”

²¹Niyan napara ha ira mga mata hi Rafael tipakadto ha langit. Tinmindog hira Tobit ug Tobias, kundi waray na hira makakita ha iya.

²²Nagtikang hira hin pagkanta hin mga karantahon hin pagdayaw, ngan nagpapasalamat hira tungod han dagko nga mga buhat nga ginbuhat han Dyos samtang kaupod nira hi Rafael nga iya anghel.