Read Waray Samarenyo Meaning Based Tobit 2 Bible Online

Tobit 2 - Waray Samarenyo Meaning Based bible

Tobit 2

¹Han paghibalik ko, iginkaurosa ko na liwat hira Ana nga akon asawa ug hi Tobias nga akon anak. Dida han Pyesta hin Pag-ani nga gintatawag liwat nga Pyesta hin mga Semana, nagsaro kami hin marasa nga pagkaon.

²Han pakakita ko han damo nga pagkaon dida ha lamesa, ginsiring ko hi Tobias, “Anak ko, gawas anay ngan pamiling hin usa nga ginbihag nga igkasi Judiyo nga kablas kundi tangkod nga tawo hin pagtuman han mga sugo han Dyos. Paupda hiya ha imo nganhi basi makasaro hiya ha aton. Diri ako matikang hin pagkaon ngada han imo pag-abot.”

³Ginmawas hi Tobias hin pamiling hin sugad nga tawo. Kundi binmalik hiya dayon nga naggogoliat, “Tatay! Tatay!” “Ano ngani?” binmaton ako. “Ginpatay in usa han aton mga tawo yana pa gud la,” nagsiring hi Tobias. “Ginpitlok hiya ngan iginlabog an iya lawas ngadto ha taboan.”

⁴Binmuhat ako dayon ngan ginbayaan ko an lamesa nga waray pa kalabti an pagkaon. Ginkuha ko an lawas nga nakada ha kalsada ngan gindara ko ini ngadto hin usa nga haligutay nga sirongan, diin ginbutang ko ini tubtob han katunod han adlaw basi nakon iglubong.

⁵Niyan inmoli ako ngan kinmarigos basi magmalinis ako. Ha dako nga kabidoan, kinmaon ako.

⁶Nahinumdom ako han siring ni manaragna Amos han mga tawo han Betel: “Mahihimo nga mga paglubong an iyo mga ginsasaurog nga pyesta, ngan mahihimo nga mga pagtangis an iyo malipayon nga mga kanta.” Nagtikang ako hin pagtangis.

⁷Han katunod han adlaw ginmawas ako, nag-ukab ako hin lubong ngan ginlubong ko an tawo.

⁸An hunahuna han akon mga amyaw nga tuyaw na ako. “Diri ka la gihapon nagmamaan?” nagsiring hira. “Diri ba hadto ginbiniling ka tungod hin paglubong ngan patay ka na unta kon waray ka makakalagiw. Ngan yana amo la gihapon an imo ginbubuhat.”

⁹Hito nga gab-i kinmarigos ako hin paglinis ha akon ngan ginmawas ako ngadto ha bungsaran hin pagkaturog ha ligid han pader. Mapaso adto nga gab-i ngan waray ako magpandong han akon ulo.

¹⁰Nakadto in mga tamsi ha igbaw han pader ngan tungod ha akon kundi waray ako sabot. Nahulog an mga mapaso nga mga iti hini nga mga tamsi nganhi ha akon mga mata ngan nakahimo hin bulog nga nakapabuta ha akon. Nagpatambal ako hin mga doktor kundi dinmugang la lugod nga ha kataposan waray na gud ako makakita. Sulod hin upat ka tuig waray gud ako makakita. Nabaraka hin duro an akon kauropdan hiunong han akon kasugaran ngan sulod hin duha ka tuig hi Ahikar an nagbuhi ha akon san-o hiya mapakadto han tuna han Elam.

¹¹Han paglakat na ni Ahikar, kinahanglan magpatigayon na an akon asawa; sanglit sugad han iba nga kababayen-an, naghablon hiya.

¹²Binabaydan hiya han mga tawo kon dinudol-ong niya an iya ginhablon. Usa ka adlaw tinmabas hiya hin iya human na nga hinablon ngan iya gindara ini ngadto han mga nagpahablon ha iya. Ginbaydan hiya ngan gintagan pa hiya hin kanding.

¹³Han pag-uli ni Ana, dara niya an kanding ngan nag-iniyak ini. Ginmoliat ako, “Diin tikang ito nga kanding? Bangin nimo kinawat ito. Ibalik ito ngadto han tag-iya. Diri angay nga kumaon kita hin kinawat.”

¹⁴“Diri ini kinawat,” binmaton hi Ana. “Usa ini nga regalo nga gabaw han iginbayad ha akon.” Kundi waray ako tumuod ha iya ngan pinmihaw ako hin kaawod tungod han iya ginbuhat. Ginsugo ko hiya hin pag-uli han kanding ngadto han tag-iya kundi makuri gud hiya mawaring. Ginmoliat lugod hiya, “Yana, maaram na ako kon hin-o ka gud. Hain na man an imo pagpaid ug kabaraka han iba nga mga tawo? Ano man an hinungdan han imo mag-upay nga mga buhat nga imo hadto gintuman?”