Read Waray Samarenyo Meaning Based Tobit 4 Bible Online

Tobit 4 - Waray Samarenyo Meaning Based bible

Tobit 4

¹Hito ngahaw nga adlaw nahinumdom hi Tobit han kwarta nga iya ginbilin kan Gabael didto ha Rages han Media.

²Naghunahuna hiya, “Yana nga ginhangyo ko an Dyos nga mamatay na la ako, kinahanglan tawgon ko hi Tobias nga akon anak ngan sumatan ko hiya hiunong han kwarta.”

³Sanglit gintawag ni Tobit hi Tobias ngan ginsiring hiya, “Anak, kon mamatay ako, upaya an paglubong ha akon. Ngan kon mawaray na ako, tahora hi imo nanay. Mangnoi hiya samtang nga buhi pa hiya, ngan kon mamatay hiya, iglubong hiya sapit ha akon. Hinumdomi nga igin-unong niya an iya kinabuhi hin pagdara ha imo nganhi ha kalibutan, sanglit talinguhaa hin paglipay ha iya ngan ayaw pagbuhat hin bisan ano nga makakabido ha iya.

⁵“Ha kada adlaw han imo kinabuhi hinumdomi an Ginoo nga aton Dyos. Ayaw gud tuyoa hin pakasala o pagsupak hin bisan ano han iya nga sugo. Dayuday buhata an matadong ngan ayaw gud pagtampo ha bisan ano nga maraot.

⁶Kinahanglan nga tangkod ka ngan magmamainuswagon ka ha bisan ano nga imo pagbubuhaton.

⁷“Pagmahinatagon ha bisan kan kanay nga matinumanon dida ha pagsugot han Dyos.[9] Kon halot ka hin paghatag ha mga kablas, paghahalotan ka liwat han Dyos.

⁸Paghatag sumala han aada ha imo. Kon darudamo an imo naangkon, kinahanglan liwat nga darudamo an imo ihatag. Bisan kon gutiay la an naaangkon nimo, talinguhaa nga makahatag ka gihapon.

⁹Ini nga imo buhat sugad ini hin imo hinipos nga kwarta. Ihahatag ha imo in balos ha panahon hin kakurian.

¹⁰An pagmangno han mga kablas amo an paghalad nga nakakalipay han Dyos ha langit. Buhata ini ngan makakalikay ka han masirom nga kalibutan han mga patay.

¹²“Anak, pag-ikmat han mga babaye nga maraot an dungog. Labaw han ngatanan, pangasawa hin usa nga babaye han aton tribo, kay mga tulin kita han mga manaragna. Ayaw pangasawa hin diri naton uropod. Hinumdomi nga nangasawa hin mga uropod hira Noe, Abraham, Isaac, ug Jacob, nga mga una naton nga kaapoy-apoyan. Ginbendisyonan hira han Dyos pinaagi hin damo nga mga anak; sanglit sumurunod han tuna han Israel an ira mga tulin.

¹³Anak ko, ugopi an imo kalugaringon nga mga kauropdan. Ayaw pagpalabilabi hin diri pangasawa hin usa ha ira. In sugad nga pagpalabilabi amo an tinikangan hin makalilisang nga kapakyasan ngan karat-an, sugad nga an kahubya nagdadara hin grabe nga kakablasan ngan tinikangan han pagkagutom.

¹⁴“Bayari an imo mga sinuholan ha kada adlaw; ayaw iglanganlangan an ira mga suhol bisan hin usa la ka gab-i. Pagpasidunggi an Dyos dida hini nga paagi ngan pagbabaloson ka niya. Upaya an imo ginawian ha ngatanan nga panahon.

¹⁵Ayaw pagbuhata bisan kan kanay in bisan ano nga butang nga diri mo karuyag nga pagbuhaton ha imo hin iba nga tawo. “Ayaw paglapos ha imo pag-inom ngan mahubog ka ngan ayaw itugot nga mabatasan mo na la an pag-ininom.

¹⁶“Tagi hin pagkaon adton mga ginugutom ngan tagi hin panapton adton nagkikinahanglan. Kon magmainuswagon ka, hatag hin huyayag nga kasingkasing ngan buhata ini nga malipayon ka!

¹⁷“Kon mamatay in usa han mga matinumanon han Dyos, pag-andam hin pagkaon para han iya panimalay,[10] kundi ayaw pagbuhata ini kon mamatay in usa nga maraot nga tawo.

¹⁸“Karawata an sagdon han mag-aram nga mga tawo ngan ayaw pagpasibaya han ira mapulsanon nga sagdon.

¹⁹“Paghimulosi an tagsa nga higayon hin pagdayeg han imo Ginoo nga Dyos. Pangaro ha iya basi magmainuswagon ka ha bisan ano nga imo pagbuhaton. Diri niya ihinahatag an iya kinaadman ngadto han mga tawo han iba nga mga nasod. Amo hiya an burabod han ngatanan nga mag-upay nga mga butang, kundi makakahimo hiya hin pagpuo ngan pagpatay ha imo, kon maruyag hiya. “Hinumdomi an ngatanan ko nga mga tugon. Ayaw hingalimti ini bisan usa ka dali.

²⁰“Tobias, karuyag ko nga hibaroan mo nga iginbilin ko hadto in damo nga kwarta kan Gabael nga anak ni Gabrias didto ha Rages han Media.

²¹Kablas na kita yana kundi ayaw kabaraka. Kon magsugot ka han Dyos ngan maglikay ka han sala, malilipay hiya ha imo ngan magmamainuswagon ka.”