Read Waray Samarenyo Meaning Based Tobit 5 Bible Online

Tobit 5 - Waray Samarenyo Meaning Based bible

Tobit 5

¹Niyan ginbaton ni Tobias an iya amay, “Tutumanon ko an ngatanan nga imo ginsiring ha akon.

²Kundi uunanhon ko hin pagkuha han kwarta didto kan Gabael? Waray pa gud ngani kami magkakita. Uunanhon ko hin pagpamatuod ha iya kon hin-o ako basi tumoo hiya ha akon ngan ihatag ha akon an kwarta? Labot la hini, diri ako maaram kon uunanhon ko in pagkadto ha Media.”

³Binmaton hi Tobit, “Nagpirma kami ngan hi Gabael hin usa nga dokumento. Niyan gintunga ko an pagpikas hini ngan an katunga iginhatag ko kan Gabael. An katunga liwat igintampo ko han kwarta; karuhaan na ka tuig an naglabay tikang hadto! Yana, lakat ngan pamiling hin usa nga katataporan nga tawo nga maupod ha imo ngadto ha Media ngan maupod gihapon hiya ha imo pagbalik nganhi. Ihahatag ko an suhol kon mahibalik na kamo. Kundi kinahanglan nga kuhaon niyo an kwarta nga akon iginbilin kan Gabael.”

⁴Sanglit linmakat hi Tobias hin pagbiling hin tawo nga maaram han dalan ngadto ha Media ngan maupod ha iya. Han paghigawas la niya han balay, iginkaatubang niya dayon hi Rafael. Waray hi Tobias kilala nga anghel han Dyos ini hiya sanglit

⁵ginpakianhan niya kon taga diin hiya. Binmaton hi Rafael, “Usa ako nga Israelita, usa nga harayo na nga imo uropod ngan kinmanhi ako tikang ha Ninibe hin pagbiling hin trabaho.” “Maaram ka ba han dalan ngadto ha Media?” pinmakiana hi Tobias.

⁶“Oo, maaram ako,” binmaton hi Rafael, “Masukot ako makadto ngan maaram ako han mga dalan tipakadto ha Media. Danay ako humuron didto han aton uropod, hi Gabael, nga nag-uokoy didto han bungto han Rages.[11] Bangin magduha ka adlaw an pagbaktas ngadto tikang ha Ecbatana nga kapital nga syudad kay aadto an Rages ha sampaw han kabukiran.”

⁷Niyan nagsiring hi Tobias kan Rafael, “Hulata ako dinhe, sangkay ko, samtang masulod ako ngan susumatan ko an akon amay. Karuyag ko nga umupod ka ha akon ngan susuholan ko ikaw.

⁸“Sigi, mahulat ako ha imo,” nagsiring hi Rafael, “kundi ayaw pag-iha.”

⁹Sinmulod hi Tobias ngan ginsiring an iya amay, “Hin-agian ko in usa nga igkasi Israelita nga maupod ha akon.” “Pasudla nganhi an tawo,” binmaton hi Tobit. “Karuyag ko hibaroan kon ano nga panimalay ug tribo nga sakop hiya ngan kon katataporan ba hiya nga imo kaupod ha paglakat mo ngadto ha Media.” Sanglit ginmawas hi Tobias ngan gintawag niya hi Rafael, “Karuyag makigkita ha imo an akon amay.” Han pagsulod ni Rafael, nag-una hi Tobit hin paghatag hin katalahuran ha iya. Niyan ginbaton ni Rafael hin pagsiring, “Naglalaom ako nga maupay an imo kahimtang.” Kundi binmaton hi Tobit, “Ano nga kaupayan an aanhi ha akon? Buta ako ngan diri ako nakita. Sugad na la ako hin patay nga diri na nakita han kapaw-an. Gabay la lugod ako mamatay. Nakakabati ako han mga yakan han tawo kundi diri ako nakita ha ira.” “Pagmadinasigon!” nagsiring ha iya hi Rafael. “Diri maiha pagtatambalon ka han Dyos; sanglit ayaw la kabaraka!” Niyan nagsiring hi Tobit, “Karuyag han akon anak, hi Tobias, pagkadto(...)

¹⁰Ginpakianhan pa hiya ni Tobit, “Sumati ako, sangkay ko, kon ano nga panimalay ug tribo an imo nasasakopan.”

¹¹Kundi nagpakiana hi Rafael, “Kay ano nga kinahanglan ka man mahibaro?” Nagsiring hi Tobit, “Sumati ako han kamatuoran. Ano an imo ngaran ngan hin-o ka?”

¹²Binmaton hi Rafael, “Hi Azarias an akon ngaran ngan ako amo an anak han tigurang nga Ananias nga usa han imo kauropdan.”

¹³Niyan nagsiring ha iya hi Tobit, “Kinakarawat ka han amon panimalay! Bendisyonan ka unta han Dyos, anak ko. Ayaw gad la kasina kay karuyag ko hibaroan an kamatuoran hiunong ha imo ngan han imo panimalay. Sumala han akon hinbaroan, sakop ka hin usa nga maupay nga panimalay ngan uropod ka namon! Nakilala ako kanda Ananias ug Natan, mga anak han tigurang nga Semaias. Dayuday hira mainugopon han ira tuloohan. Dayuday kami hadto nagkakaupod ngadto ha Jerusalem hin pagsingba. Maupay nga mga tawo an imo kauropdan ngan tikang ka hin maupay nga tulin. Maupay na la nga paglakat niyo.”

¹⁴Nagpadayon hi Tobit, “Babaydan ta kamo han kada adlaw nga suhol pati an mga gastos niyo nga duha.

¹⁵Pagmaupay ikaw nga kaupod ni Tobias ngan pagpapahalipayan ta pa ikaw labot han imo mga suhol.”

¹⁶Nagsiring hi Rafael, “Maupod ako ha iya ngan ayaw kabaraka; makakasangpot kami ngadto ngan makakabalik kami nganhi hin waray bisan ano nga mahinanabo ha amon. Diri makulba an paglakat dida hini nga mga dalan.” “Updan unta kamo han Dyos!” binmaton hi Tobit. Niyan iya gintawag hi Tobias ngan iya ginsiring, “Anak, andama na an ngatanan nga iyo kinahanglanon para han paglakat basi makalakat na kamo nga duha. Bantayan unta kamo han Dyos ngan han iya anghel ngan makabalik unta kamo nga waray mahinabo ha iyo dida ha dalan!” San-o hira lakat para Media, hinadkan anay ni Tobias hira iya tatay ug nanay hin pagpanamilit. Nagsiring hi Tobit, “Maupay na la an iyo paglakat!”

¹⁷Niyan nagtangis hi iya nanay. Nagngurutob hiya, “Kay ano nga nakahunahuna ka hin pagpalakat han akon anak hin sugad hini nga higayon? Hiya la an nagbubuhi ha aton. Hin-o man an magmamangno ha aton yana?

¹⁸Importante ba iton nga imo kwarta nga karuyag mo ig-unong an kinabuhi han imo anak basi la mabawi mo ito nga kwarta?

¹⁹Kay ano nga diri na man la kita makontento hini nga kinabuhi nga hatag ha aton han Ginoo?”

²⁰“Ayaw la kabaraka,” nagsiring ha iya hi Tobit, “Makakadangat hiya ngadto ngan makakabalik hiya nganhi nga talwas ngan makita ka ha imo kalugaringon nga mga mata nga mauli hiya nga talwas ug maupay an lawas.

²¹Sanglit ayaw na kaguol hiunong ha ira, minahal ko. Maupod kan Tobias in usa nga buotan nga anghel. Magmamaupay an iya paglakaton ngan mauli hiya nga maupay an lawas.” Waray na hi Ana kabaraka ngan waray na hiya pagtangis.