Read Waray Samarenyo Meaning Based Tobit 6 Bible Online

Tobit 6 - Waray Samarenyo Meaning Based bible

Tobit 6

¹Sanglit linmakat hi Tobias ngan an anghel tipakadto ha Media ngan gindara nira an ayam ni Tobias. Naglakat hira tubtob han katunod han adlaw ngan didto hira pagkampo ha ligid han Salog Tigris.

²Linmugsong hi Tobias ngadto han salog hin panhimsaw ngan tigda la linmukso in dako nga isda nga naisiribad han usa niya nga tiil. Ginmoliat hi Tobias

³ngan sinmingit an anghel ha iya, “Kapti ito nga isda! Ayaw pagbuhii!” Niyan kinaptan ni Tobias an isda ngan gindanas ngadto ha tangpi han salog.

⁴Nagsiring ha iya an anghel, “Buksi an tiyan han isda ngan kuhaa an apdo, kasingkasing ug atay. Hiposa ini; magagamit ini hin pagtambal, kundi ilabog an mga tinae.”

⁵Gintuman ni Tobias sumala han siring ha iya han anghel. Niyan ginluto niya an isda, kinmaon hiya ngan an salin iya gin-asinan basi dad-on niya. Nagpadayon hira nga duha tubtob nga hirani na hira han Media.

⁶Niyan nagpakiana hi Tobias, “Sangkay Azarias, ano nga mga sakit an natatambal hini nga apdo, kasingkasing, ug atay?”

⁷Binmaton an anghel, “Mahihimo nga tuboron mo an kasingkasing ug an atay ngan magagamit ini hin pagpaiwas hin yawa o hin maraot nga espiritu nga nagsasakit hin usa ka tawo. Naukoy dayon an mga pagtulos ngan nawawara an sakit nga binabati han tawo.

⁸Magagamit mo an apdo hin pagtambal hin mga bulog ha mata. Ipahid la ini dida han iya mga mata ngan huypa an mga bulog ngan makakakita na liwat ito nga tawo.”

⁹Han pag-abot nira ha Media ngan han tikahirani na hira han syudad han Ecbatana,

¹⁰nagsiring hi Rafael, “Tobias nga akon sangkay.” “Oo, ano ngani?” pinmakiana hi Tobias. Nagpadayon hi Rafael, “Yana nga gab-i aadto kita mahuron ha balay han iyo uropod nga hi Raguel. May-ada hiya usa la nga anak nga babaye nga an ngaran hi Sara.

¹¹Tungod kay ikaw an labi ka suok nga uropod, may-ada ka katungod hin pangasawa ha iya. May-ada liwat nimo katungod hin pagsunod han ngatanan nga hiagi han iya amay.

¹²Buotan hiya, maisog, ngan mahusay gud nga daraga; ngan maupay nga tawo an iya amay. Yana nga gab-i makikighimangraw ako han iya amay hiunong hin pangasawa ngan mauyon hiya hin paghatag kan Sara ha imo nga imo pangangasaw-on. Niyan ha pagbalik ta tikang han bungto han Rages magsasaurog kita han kasal. Diri hi Raguel makakabaribad ha imo hin pagpaasawa kan Sara ngan diri hi Raguel makakahatag ha iya ngadto hin iba nga tawo. Kon pagbuhaton niya ini, angay hiya pagsirotan hin kamatayon sumala han Balaod ni Moises. Maaram hiya nga amo la ikaw an lalake nga may-ada katungod hin pangasawa han iya anak ngan pagkarawat han surondanon; sanglit tumana an akon sagdon. Paghihimangrawan namon ngan hi Raguel ini nga butang niyan nga gab-i ngan pagtutuhayon ini nga iyo pagkasabot ngan hi Sara. Ha aton pagbalik tikang han syudad han Rages, pauupdon ta hiya kon manguli na kita.”

¹³Sanglit nagsiring hi Tobias kan Rafael, “Sangkay Azarias, nakabati na ako hiunong han nahiuna nga pito nga mga bana ni Sara ngan han kamatay han kada usa ha ira hito nga gab-i nga pagkasal ha ira, san-o hira magdirig ha higdaan.

¹⁴Sumala han sumat nga akon hinbatian, usa nga yawa an nagpatay ha ira. Diri niya ginlalabtan hi Sara kundi iya pinapatay an tagsa nga lalake nga nagtatalinguha hin pagduok ha iya. Nahadlok ako hini nga yawa. Uusa la ako nga anak ngan kon mamatay ako, an kabido amo an magdadara han akon mga kag-anak ngadto ha ira lubnganan. Waray na ngani hira iba nga anak nga maglulubong ha ira.”

¹⁵Binmaton an anghel, “Nahingalimot ka na ba han mga tugon han imo amay? Ginsiring ka niya nga mangangasawa ka hin usa nga babaye nga sakop han kalugaringon niyo nga tribo. Sanglit pamatii hin maupay an akon igyayakan ha imo. Ayaw kabaraka hiunong han yawa. Pangasaw-a hi Sara. Maaram ako nga niyan nga gab-i ipapaasawa ni Raguel ha imo hi Sara.

¹⁶Kon kumadto ka ha sulod nga katurogan, dad-a an kasingkasing ug atay han isda ngan ibutang ini dida han insyenso nga gintubod ha kalayo,

¹⁷basi magsarang an baho hini ha bug-os nga sulod. Kon makabaho hini an yawa, maiwas hiya ngan diri na gud mahirani kan Sara. Kundi nga diri pa kamo magdidirig, kinahanglan nga bumuhat anay kamo nga duha ngan mag-ampo kamo ngadto han Ginoo ha langit basi kalooyan ngan panalipdan kamo. Ayaw kahadlok. Daan na para ha imo hi Sara tikang pa ha tinikangan han pagtuhaa han mga butang. Tatalwason mo hiya tikang han yawa ngan maupod hiya ha imo ngadto ha iyo balay. Magkakamay-ada kamo ngan hi Sara damo nga mga anak nga hihigugmaon nimo hin maupay. Sanglit ayaw kabaraka.” Pinamatian ni Tobias an siring ha iya ni Rafael. Maaram hiya nga usa nga uropod hi Sara bahin han tulin han iya amay. Ginhigugma niya hi Sara ngan nag-andam hiya hin pangasawa ha iya.