Read Waray Samarenyo Meaning Based Tobit 9 Bible Online

Tobit 9 - Waray Samarenyo Meaning Based bible

Tobit 9

¹Niyan gintawag ni Tobias hi Rafael ngan ginsiring hiya,

²“Azarias, paupda ha imo in upat han mga surugoon ngan duha nga mga kamelyo, ngan pakadto han balay ni Gabael didto han bungto han Rages. Ighatag ha iya an pinirmahan nga dokumento, basi ighatag ha imo an kwarta. Niyan paupda hiya ha imo pagbalik para han kombite hin pagkasal.

³Maaram ka man nga nag-iinihap an akon amay han mga adlaw tubtob han akon pag-uli, ngan maguguol gud hiya hin duro kon malangan ako hin bisan usa la ka adlaw. Maaram ka liwat han pagpirit ni Raguel nga kinahanglan magpabilin ako, ngan diri ako makakabaribad ha iya.”

⁵Sanglit kinmadto ha Rages didto ha Media hira Rafael ngan an upat nga mga surugoon, diin naghuron hira didto han balay ni Gabael. Iginhatag kan Gabael ni Rafael an pinirmahan nga dokumento ngan ginsumatan hiya nga bag-o pa la nga nakaasawa hi Tobias nga anak ni Tobit, ngan gindadapit hi Gabael ngadto han kombite han pagkasal. Gin-ihap dayon ni Gabael an mga supot han kwarta nga mga sinilyohan pa, ngan iginkarga ini dida han mga kamelyo.[16]

⁶Timprano pa han kaagahon nga magkalakat hira para han kombite han pagkasal. Han pag-abot nira Rafael ug Gabael ngadto han balay ni Raguel, ira hin-abotan hi Tobias nga nakaon. Binmuhat dayon hi Tobias ngan pinangumosta hi Gabael. Upod in mga luha dida han iya mga mata kinarawat ni Gabael an pangumosta ngan igindugang hin pagsiring, “Supo ka han imo tangkod ngan mahinatagon nga amay. Bendisyonan unta han Ginoo han langit hi ikaw ngan an imo asawa, an imo ugangan nga babaye, ngan an imo amay. Pagdayawon an Dyos! Tinugotan ako niya nga mabuhi hin pagkita kan Tobias nga akon patod, nga supo han iya amay.”