Read Waray Samarenyo Meaning Based Judit 12 Bible Online

Judit 12 - Waray Samarenyo Meaning Based bible

Judit 12

¹Nagsugo hi Holofernes han iya mga tawo nga pagdad-on hi Judit ngadto han lamesa nga gin-aandaman para hin pangaon ngan pagdurotan hiya han gimauupayi nga mga pagkaon ug bino.

²Kundi dinmiri hi Judit. Nagsiring hiya, “Diri ako makakakaon han imo mga pagkaon, kay makakasupak ako han balaod han akon Dyos. Makaon la ako han akon dara nga pagkaon.”

³Nagpakiana hi Holofernes, “Kundi ano man an imo pagbubuhaton kon maubos an imo pagkaon ug bino? Waray mga Israelita dinhe han amon kampo.”

⁴Binmaton hi Judit, “Sir, samtang nga buhi kapa, diri mauubos an akon pagkaon tubtob han paggamita ha akon han Ginoo hin pagtuman han iya plano.”

⁵Niyan gindara han mga surugoon ni Holofernes hi Judit ngadto hin usa nga tulda. Kinmaturog hiya didto ngada han pagkaaga. Binmuhat hiya

⁶ngan nagpatugon kan Holofernes nga tugotan hiya hin paggawas ngadto han kahamub-an hin pag-ampo.

⁷Ginsugo ni Holofernes an iya mga gwardya nga tugotan hi Judit hin pagbaya han kampo. Sanglit sulod hin tulo ka adlaw nag-ukoy hi Judit didto han kampo, ngan kada gab-i nagawas hiya ngadto han kahamub-an hirani han Betulia ngan nakarigos hiya didto han burabod.

⁸Katapos niya karigos, nag-aampo hiya han Ginoo nga Dyos nga buligan hiya han iya plano hin pagdara han padarag-an ngadto ha Israel.

⁹Ngan nabalik hiya ngadto han kampo nga putli na hiya sumala han seremonyas, ngan nagpapabilin hiya ha iya tulda tubtob han katapos han panihapon.

¹⁰Dida han ikaupat ka adlaw nga pag-ukoy ni Judit didto han kampo, naghatag hi Holofernes hin usa nga bangkite para han iya gihahataasi hin ranggo nga mga opisyal, kundi waray niya pagdapita an bisan usa han mga opisyal nga nakadto hin pagtuman han ira katungdanan.

¹¹Nagsiring hiya kan Bagoas nga yunuko nga tinaporan han iya mga kalugaringon nga buruhaton, “Kadtoa ngan patangdoa an Hebreohanon nga babaye nga imo minangnoan, nga makanhi hiya han akon tulda hin pagkaon ngan pag-inom upod ha aton.

¹²Makaarawod para ha akon kon palabyon ta ini nga higayon hin pagpangulitawo hin usa nga babaye nga sugad ha iya. Pagtatawaan ako niya kon diri ko hiya makuha.”

¹³Sanglit binayaan ni Bagoas hi Holofernes ngan kinmadto hiya kan Judit. Nagsiring hiya, “Mahusay nga babaye, gindadapit ka han heneral ngadto han iya tulda para hin pag-inom. Tana ngan paglipay sugad han Asiriahanon nga kababayen-an nga nagsisirbe didto han palasyo ni Nabucodonosor. Usa ini nga dako nga dungog para ha imo.”

¹⁴“Kinakarawat ko ini nga malipayon,” binmaton hi Judit. “Uunanhon ko hin pakabaribad? Hinunumdoman ko ini nga malipayon nga gab-i samtang buhi pa ako.”

¹⁵Sanglit binmuhat hi Judit ngan nagsul-ot han labi kamahusay niya nga mga panapton. Nag-una ha iya an iya oripon nga babaye ngan iginbitad niya dida ha tuna ha atubangan ni Holofernes an mga anit hin kordero nga iginhatag ni Bagoas kan Judit nga lingkoran niya ha pagkaon.

¹⁶Sinmulod hi Judit han tulda ngan linmingkod didto. Nasindak hi Holofernes han pakakita niya ha iya ngan nagkamay-ada hiya diri kapugngan nga ungara hin paghigugma ha iya. Tikang han syahan nga adlaw nga paghikit-i ha iya, nagbinantay hi Holofernes hin higayon hin paghugay ha iya.

¹⁷Iya ginsiring hiya, “Tampo ha amon hin pag-inom ngan pagmalipayon.”

¹⁸Binmaton hi Judit, “Malipayon ako hin pagtampo ha iyo, sir; amo ini an gimamalipayi nga adlaw ha akon kinabuhi.”

¹⁹Kundi bisan pa ngani, kinmaon ngan inminom la hi Judit han gin-andam han iya oripon.

²⁰Nalukmay ha iya hi Holofernes ngan nag-inom hiya han darudamo pa nga bino kay han iya hadto nainom ha usa ka higayon ha bug-os niya nga kinabuhi.