Read Waray Samarenyo Meaning Based Judit 13 Bible Online

Judit 13 - Waray Samarenyo Meaning Based bible

Judit 13

¹Ha kataposan, han tabis na an kagab-ihon, naghinayhinay na an mga dinapit hin pagpanamilit ngan pagkalakat. Niyan ginsadhan ni Bagoas an tulda tikang ha gawas ngan waray na pasudla an mga surugoon ni Holofernes. Sanglit nangaturog hira ngatanan; mga kapoy hin duro hira ngatanan kay nag-iha man an ira bangkite.

²Nag-usaan na la hi Judit ha sakob han tulda upod kan Holofernes nga nahigda nga hubog dida han iya kama.

³Naghulat ha gawas han tulda an oripon ni Judit kay magawas man hi Judit hin pag-ampo, sugad han iya ginbuhat ha kada gab-i. Ginsiring liwat ni Judit hi Bagoas nga magawas hiya hin pag-ampo sugad han iya nababatasan.

⁴Nagkalakat na an ngatanan nga mga dinapit ngan mga surugoon, ngan nagduhaan na la hira Judit ngan Holofernes ha sakob han tulda. Tinmindog hi Judit ha ligid han kama ni Holofernes ngan nag-ampo hin hilom, “O Ginoo nga Labi Kamakagarahum, buligi gad ako han akon pagbubuhaton para han kadungganan han Jerusalem.

⁵Yana amo na an takna hin pagtalwas han imo pinili nga mga tawo ngan pagbulig ha akon hin pagtuman han akon plano hin pagpatay han mga kaaway nga nagtatarhog ha amon.”

⁶Kinmadto hi Judit han poste han kama ha ulohan ni Holofernes ngan ginkuha an iya espada.

⁷Dinmuok hiya, kinaptan niya an buhok ni Holofernes, ngan nag-ampo, “O Ginoo nga Dyos han Israel, tagi ako yana hin kusog.”

⁸Niyan gin-alsa ni Judit an espada ngan iya gintigbas hi Holofernes makaduha dida ha liog, ngan napugot an iya ulo.

⁹Iya ginpulilid an lawas ni Holofernes tikang han kama ngan ginpalos an moskitero. Niyan ginmawas hiya ngan iginhatag an ulo ni Holofernes ngadto han iya oripon,

¹⁰ngan ginsulod an ulo didto han supot nga surudlan hin pagkaon. Ngan nagkalakat an duha nga kababayen-an, sugad han ira agsob pagbuhaton kon nakadto hira hin pag-ampo. Katapos nira maglatas han Asiriahanon nga kampo, tinmabok hira han kahamub-an ngan sinmagka han ligid han bukid tubtob han pag-abot nira ngadto han ganghaan han Betulia.

¹¹Han hirani na hira ginoliatan ni Judit an mga gwardya han ganghaan, “Abrehi an ganghaan! Abrehi an ganghaan! Ugop pa ha aton an aton Dyos. Yana nga adlaw iginpakita na liwat niya an iya kusog ha Israel ngan gingamit an iya gahom kontra han aton mga kaaway.”

¹²Han pakabati han mga tawo han iya tingog, nagdagmit hira paglusad ngadto han mga ganghaan ngan gintawag an mga opisyal han bungto.

¹³Nagburunyog pagdadlagan an ngatanan nga mga tawo, mga batan-on ngan mga tigurang ngadto han ganghaan. Waray gud may tinmoo nga binmalik na hi Judit. Ginbuksan nira an ganghaan para ha iya ngan han iya oripon ngan maupay an ira pagkarawat ha iya. Niyan, han pagharing nira hin kalayo basi magmapawa, ngan nag-alirong hira han duha nga kababayen-an,

¹⁴ginmoliat hi Judit, “Pagdayawon an Dyos, pagdayawon hiya! Pagdayawon an Dyos nga nagpakita han iya pagkalooy han mga tawo han Israel. Yana nga gab-i ginggamit ako niya hin pagpuo han aton mga kaaway.”

¹⁵Niyan kinuha niya an ulo tikang han supot nga surudlan hin pagkaon ngan iginpakita ini han mga tawo. Nagsiring hiya, “Iini an ulo ni Holofernes nga heneral han Asiriahanon nga kasondalohan, ngan iini an moskitero tikang han iya kama diin naghigda hiya nga duro hin kahubog. Ginmamit an Ginoo hin usa nga babaye hin pagpatay ha iya.

¹⁶Samtang nga buhi an Ginoo, nagsusumpa ako nga waray gud maglabot ha akon hi Holofernes, bisan kon nalukmay hiya han akon kamahusay ngan amo an nagdara ha iya ngadto han iya kapakyasan. Waray ako mahugawi o maalohi; ginmangnoan ako han Ginoo dida hini ngatanan.”

¹⁷Nahiburong kaupay an ngatanan didto han syudad. Yinmukbo hira ngan nagsingba han Dyos, ngan nag-ampo hin durungan, “O amon Dyos, takos ka hin dako nga pagdayaw. Yana nga adlaw nagdaog ka kontra han mga kaaway han imo mga tawo.”

¹⁸Niyan nagsiring hi Uzias, “Minahal ko nga Judit, ginpakaupay ka han Gilalabawi nga Dyos labaw han bisan hin-o nga babaye ha tuna. Angay pagdayawon an Ginoo nga Dyos nga nagtuha han langit han tuna! Gin-unhan ka niya han pagpugoti mo han aton gidadakoi nga kaaway.

¹⁹An imo pagsarig han Dyos diri gud hingangalimtan hadton magpasangyaw han gahom han Dyos.

²⁰Tagan ka unta han Dyos hin waray kataposan nga kadungganan tungod han imo ginbuhat. Pagbaloson ka unta niya hin kaupayan, kay nagpabilin ka nga matinumanon ha iya ngan waray ka mag-alang hin pag-unong han imo kalugaringon nga kinabuhi hin pagpagaan han kakurian han imo mga tawo.” Binmaton an ngatanan nga mga tawo, “Amen, amen!”