Read Waray Samarenyo Meaning Based Judit 3 Bible Online

Judit 3 - Waray Samarenyo Meaning Based bible

Judit 3

¹Nagpadara ini ngatanan nga mga nasod hin usa nga hugpo para pakigsabot hin kalinaw kan Hadi Nabucodonosor upod ini nga mensahe:

²“Magpapabilin kami nga mainugopon ha imo, harangdon nga Hadi Nabucodonosor; andam kami hin pag-alagad ha imo ngan pagsugot hin bisan ano nga imo karuyag igsugo ha amon.

³An amon kabalayan, an bug-os namon nga tuna, an amon kaumhan hin trigo, an amon kahayopan, ngan an amon mga tulda itinutubyan namon ha imo; gamita ini; ikaw an magburuot han ngatanan.

⁴Magigin imo mga oripon an amon mga tawo, ngan ikaw an labi nga maaram kon aanhon mo an amon mga bungto.”

⁵Katapos paghatag han hugpo hin pakasabot hin kalinaw hini nga mensahe,

⁶gin-unhan ni Holofernes an kasondalohan ni Nabucodonosor hin paglugsong ngadto han baybayon han Mediteraneo. Binutangan niya hin mga gwardya an ngatanan nga pinaderan nga mga bungto ngan nagpili hiya hin pira nga mga taga bungto nga kalalaken-an ha kada bungto sugad hin reserba nga kasondalohan.

⁷An mga tawo didto han mga bungto ngan didto han hagraniay nga mga kaumhan kinmarawat kan Holofernes pinaagi hin pagsul-ot hin mga korona hin mga bukad ngan hin pagsayaw duyog han tunog han mga gimbal.

⁸Kundi ginbungkag ni Holofernes an ngatanan nira nga mga dapit hin pagsingba[1] ngan ginpulod niya an ira mga baraan nga kahoy. Ginsugo hiya hin pagbungkag han ngatanan nga kadiyosan han tuna basi asay la pagsingbahon han ngatanan nga mga nasod ngan mga tribo hi Nabucodonosor ngan pag-ampoan hiya sugad nga usa hiya nga diyos.

⁹Niyan nag-agi hi Holofernes ha Kahamub-an han Jezrael nga hirani han Dotan, nga naatubang han kadak-an nga mga tayod han kabukiran han Juda,

¹⁰ngan nagkampo hira ha butnga han Geba ug Sitopolis. Nagpabilin hiya didto sulod hin usa ka bulan basi makakuha hin sadang gamiton han iya kasondalohan.