Read Waray Samarenyo Meaning Based Ester 1 Bible Online

Ester 1 - Waray Samarenyo Meaning Based bible

Ester 1

¹Tikang han iya hadianon nga trono didto ha Susa nga kapital nga syudad han Persia naghadi hi Asuero hin 127 nga mga lalawigan, tikang ha India ngadto ha Sudan.

³Dida han ikatulo ka tuig nga iya pagkahadi, nagbangkite hiya para han ngatanan niya nga mga opisyal ngan mga punoan. Nagtambong hini an mga labaw han kasondalohan han Persia ug Media, sugad man an mga gobernador ngan harangdon nga mga tawo han mga lalawigan.

⁴Sulod hin unom ka bulan iginpakita niya an mga manggad han hadianon nga palasyo ha pagpakita han iya pagkagamhanan ug pagkaharangdon.

⁵Naghatag liwat hin bangkite an hadi para han ngatanan nga mga tawo, riko ngan pobre, didto han kapital nga syudad han Susa. Inmabot ini hin usa ka semana ngan ginbuhat ini didto han mga tanaman han hadianon nga palasyo.

⁶Gin-adornohan an bungsaran hin busag ngan asul nga mga biray nga kotoniya, nga tinaod hin mga lubid nga pino nga granate nga lino ngada hin mga singsing nga salapi dida hin mga harigi nga marmol. Iginbutang in mga sarandigan nga bulawan ug salapi didto han bungsaran nga sinalogan hin busag nga marmol, pula nga mainggat nga perlas, ngan mahal nga mga bato.

⁷Igindurot in mga irimnon dida hin magkalainlain nga bulawan nga mga kopa, ngan ginpatakasan hira han hadi hin irimnon.

⁸Waray katubtoban an paghatag han mga irimnon; nagsugo an hadi ngadto han mga surugoon han palasyo nga paimnon an ngatanan sugad han ira karuyag.[1]

⁹Hito liwat nga takna nagpabangkite hi Rayna Vasti para han kababayen-an didto ha sakob han hadianon nga palasyo.

¹⁰Dida han ikapito ka adlaw han kanan hadi bangkite nag-ininom ngan malipayon gayud an hadi, sanglit ginpasulod niya an pito nga mga yunuko nga iya kalugaringon nga mga surugoon: hira Maumam, Basata, Harbona, Bagata, Abgata, Zetar, ug Carcas.

¹¹Iya ginsugo hira nga dad-on ha atubangan niya hi Rayna Vasti, nga nakakasul-ot han iya hadianon nga korona. Mahusay nga babaye an rayna, ngan karuyag han hadi iparayaw an iya katahom ngadto han mga opisyal ngan han ngatanan nga iya mga dinapit.

¹²Kundi han pagsumati han mga surugoon kan Rayna Vasti hiunong han sugo han hadi, dinmiri hiya hin pagkadto. Nasina hin duro an hadi.

¹³Niyan nabatasan han hadi an pangaro hin sagdon hiunong hin balaod ngan paghukom, sanglit gintawag niya an iya mga batid nga magsaragdon nga maaram kon ano an angay buhaton.

¹⁴Adton agsob niya pangaroan hin sagdon amo hira Carsena, Zetar, Admata, Tarsis, Mares, Marsana, ug Mamucan—pito nga mga opisyal han Persia ug Media nga nagkapot han gihahataasi nga mga katungdanan didto han ginhadian.

¹⁵Ginsiring niya ini nga mga tawo, “Nagsugo ako, hi Asuero, han akon mga surugoon ngadto kan Rayna Vasti hin pagpakanhi ha iya ha akon, ngan dinmiri hiya hin pagsugot ha akon! Ano an siring han balaod nga angay naton buhaton ha iya?”

¹⁶Niyan nagpahayag hi Mamucan ngadto han hadi ngan han iya mga opisyal: “Ginpakaalohan ni Rayna Vasti diri la an hadi, kundi hasta liwat an iya mga opisyal—ha kamatuoran, hasta an tagsa nga lalake han ginhadian!

¹⁷Matikang hin pagtamay han iya bana an tagsa nga babaye dinhe han ginhadian ha takna nga hibatian niya an ginbuhat han rayna. Masiring hira, ‘Ginsugo ni Hadi Asuero hi Rayna Vasti hin pagkadto ha iya ngan dinmiri hiya.’

¹⁸Kon makabati an mga asawa han hadianon nga mga opisyal han Persia ug Media hiunong han ginawian han rayna, igsisinumat ini nira ngadto han ira mga bana ha diri pa matutunod an adlaw. Mawawaray pagtahod an mga asawa han ira mga bana ha ngatanan nga dapit, ngan masisina han ira mga asawa an mga bana.

¹⁹Kon maruruyag ka, Harangdon nga Hadi, pagpagawas hin hadianon nga sugo nga diri na gud hi Vasti pumakita ha atubangan han hadi. Ipasurat ini dida han mga balaod han Persia ug Media, basi diri na gud ini pagliwaton. Niyan ihatag an iya pagkarayna ngadto hin mauruupay nga babaye.

²⁰Kon hibaroan na an imo sugo ha bug-os hini nga haluag nga ginhadian, ihahatag na han tagsa nga babaye an angay nga pagtahod han iya bana, ma riko o pobre hiya.”

²¹Naruyagan han hadi ngan han iya mga opisyal ini nga hunahuna, ngan ginbuhat han hadi an ginlarang ni Mamucan.

²²Nagpadara hiya hin mensahe ngadto han tagsa nga lalawigan ha pinulongan ngan paagi hin pagsurat hito nga lalawigan, nga nagsusugo[2] nga kinahanglan an tagsa nga bana amo an magin agaron ngan magburuot han iya panimalay.