Read Waray Samarenyo Meaning Based Ester 4 Bible Online

Ester 4 - Waray Samarenyo Meaning Based bible

Ester 4

¹Han paghibaro la ni Mardoqueo han ngatanan nga ginbuhat, ginggisi niya an iya panapton tungod hin kabido. Niyan nagbado hiya hin sako, ginluob niya hin agbon an iya ulo, ngan naglinakat hiya ha sakob han syudad, ngan nagngunguyngoy ha dako nga tingog tungod han iya kagul-anan,

²tubtob nga inmabot hiya ngadto han aragian han palasyo. Waray hiya sumulod kay igindidiri man hin pagsakob an may bado nga sako.

³Ha ngatanan nga mga lalawigan, diin iginpahibaro an pasangyaw han hadi dako an pagkasubo han mga Judiyo. Nagpuasa hira, nagtangis, nagnguyngoy, ngan kadam-an ha ira in nagbado hin sako ngan nanhigda ha mga agbon.

⁴Han pagsumati kan Ester han iya mga surugoon nga kababayen-an ngan han mga yunuko han ginbuhat ni Mardoqueo, naguol gud hiya. Ginpadad-an niya hi Mardoqueo hin mga panapton nga iya igsusul-ot liwan han bado nga sako, kundi waray hiya kumarawat hini.

⁵Niyan gintawag niya hi Hatac nga usa han mga yunuko han palasyo nga gintudlok han hadi sugad nga surugoon ni Ester, ngan ginsugo niya hi Ester hin pagkadto kan Mardoqueo hin pag-usisa kon ano an hinungdan han iya ginbuhat.

⁶Kinmadto kan Mardoqueo hi Hatac didto han plasa han syudad dida han aragian han palasyo.

⁷Ginsumatan hiya ni Mardoqueo han ngatanan nga nahinabo ha iya ngan kon pira gud nga kwarta an iginsaad ni Aman nga ibubutang ngadto han hadianon nga hirimosan hin manggad kon pamatayon an ngatanan nga mga Judiyo.

⁸Gintagan ni Mardoqueo hi Hatac hin kopya han pasangyaw nga iginpagawas didto ha Susa, nga nagsusugo hin pamatay han mga Judiyo. Ginpadara ini ni Mardoqueo ngadto kan Ester, ginsaysayan niya an kahimtang, ngan naghangyo hiya nga kadtoon niya hin pakimalooy an hadi ngan hangyoon an hadi nga kalooyan an iya mga tawo.

⁹Gintuman ini ni Hatac.

¹⁰Gintagan hiya ni Ester hini nga mensahe ngan pinabalik hiya ngadto kan Mardoqueo:

¹¹“Kon may bisan hin-o, ma lalake o babaye, nga kumadto han sakob nga bungsaran han palasyo ngan makigkita han hadi hin waray man hiya ipatawag, kinahanglan patayon ito nga tawo. Amo ini an balaod; maaram hini an ngatanan, tikang han mga magsaragdon han hadi ngadto han mga tawo ha mga lalawigan. May usa la nga paagi hin paglikay hini nga balaod: kon ipaabot han hadi ngadto han tawo an iya bulawan nga baston, diri papatayon ito nga tawo. Kundi usa na ka bulan tikang ako ipatawag han hadi.”

¹²Han pakakarawat ni Mardoqueo han mensahe ni Ester,

¹³iya ginpadad-an hi Ester hini nga pahimatngon: “Ayaw pakasiring nga makakalikay ka kay han iba nga mga Judiyo tungod la nga aada ka han hadianon nga palasyo.

¹⁴Kon humilom ka la dida hin sugad hini nga panahon, maabot ngadto han mga Judiyo in bulig nga tikang ha langit ngan matatalwas hira, kundi mamamatay ka ngan mapupuo an panimalay han imo ginikanan. Kundi hin-o man ngani in maaram—bangin ginhimo ka nga rayna para hin sugad hini nga panahon!”

¹⁵Ginpadad-an ni Ester hi Mardoqueo hini nga baton:

¹⁶“Kadto na ngan tiroka an ngatanan nga mga Judiyo didto ha Susa; pagpuasa ngan pag-ampo kamo para ha akon. Ayaw kamo pagkaon o pag-inom hin bisan ano sulod hin tulo ka adlaw ngan tulo ka gab-i. Amo gihapon an bubuhaton nakon ngan han akon mga surugoon nga kababayen-an. Kahuman makadto ako han hadi bisan kon supak ini han balaod. Waray sapayan kon mamatay ako tungod hin pagbuhat hini.”

¹⁷Sanglit linmakat hi Mardoqueo ngan gintuman niya an ngatanan nga iginpabuhat ha iya ni Ester.