Read Waray Samarenyo Meaning Based Ester 6 Bible Online

Ester 6 - Waray Samarenyo Meaning Based bible

Ester 6

¹Hito manta nga gab-i waray higangaturog an hadi, sanglit iya iginpakuha an opisyal nga mga sinurat han ginhadian ngan iginpabasa ngadto ha iya.

²Nahiupod an bahin nga ira ginbasa an kasaysayan hiunong han paghibaroi ni Mardoqueo han malingoon nga plano hin pag-iparatay han hadi—malingoon nga plano nga ginhimo nira Bagatan ug Tares nga duha nga mga yunuko han palasyo nga nagbantay han mga kwarto han hadi.

³Pinmakiana an hadi, “Ano an aton nabuhat hin pagpasidungog ngan pagbalos kan Mardoqueo tungod hini?” Binmaton an iya surugoon, “Waray naton nabuhat para ha iya.”

⁴“Hin-o han akon mga opisyal an aanhi ha palasyo?” nagpakiana an hadi. Nasakob pa gudla han bungsaran hi Aman; inmabot hiya hin paghangyo han hadi nga bitayon hi Mardoqueo didto han biritayan nga gin-andam na.

⁵Sanglit binmaton an mga surugoon, “Aadi hi Aman nga naghuhulat hin pakigkita ha imo.” “Pasudla hiya,” nagsiring an hadi.

⁶Sanglit sinmulod hi Aman ngan nagsiring ha iya an hadi, “May-ada usa ka tawo nga karuyag ko gud pagpasidunggan. Ano an angay ko pagbuhaton para hini nga tawo?” Naghunahuna hi Aman ha iya ngahaw, “Yana, hin-o pa man an karuyag pagpasidunggan han hadi? Ako gud ini, waray iba.”

⁷Sanglit ginbaton niya an hadi, “Ipakuha an hadianon nga panapton para hini nga tawo—mga panapton nga imo ngahaw ginbabado. Sabongi hin hadianon nga adorno[5] an imo kalugaringon nga kabayo.

⁹Niyan sugoa in usa han imo gilalabawi nga mga opisyal hin pagbado han tawo hini nga mga panapton, ngan papagtugwaya hiya han kabayo nga sinasakyan han tawo ha paglatas han plasa han syudad. Papagsangyawa an opisyal samtang naglalakat hira: ‘Kitaa niyo kon inuunan-o han hadi hin pagbalos hin usa nga tawo nga karuyag niya pagpasidunggan!’”

¹⁰Niyan nagsiring kan Aman an hadi, “Pagdali ngan kuhaa an panapton ngan an kabayo, ngan ihatag ini nga mga pagpasidungog para kan Mardoqueo nga Judiyo. Buhata para ha iya an ngatanan nga imo iginsiring. Hiaagian mo hiya nga nalingkod didto han aragian han palasyo.”

¹¹Sanglit kinuha ni Aman an mga panapton ngan an kabayo, ngan iginsul-ot niya kan Mardoqueo an mga panapton. Sinmakay han kabayo hi Mardoqueo ngan gintugwayan ini ni Aman hin paglatas han plasa han syudad, nga nagsasangyaw ngadto han mga tawo samtang naglalakat hira, “Kitaa niyo kon gin-uunan-o han hadi hin pagbalos hin usa nga tawo nga karuyag niya pagpasidunggan!”

¹²Niyan binmalik hi Mardoqueo ngadto han aragian han palasyo, samtang nagdagmit pag-uli hi Aman nga nagtatahob han iya bayhon tungod hin kaawod.

¹³Ginsumatan niya an iya asawa ngan an ngatanan niya nga kasangkayan han ngatanan nga nahinabo ha iya. Niyan ginsiring hiya han iya asawa ngan han mga mag-aram nga kasangkayan niya, “Nagtitikang na nga lulupigan ka ni Mardoqueo. Usa hiya nga Judiyo ngan diri ka gud makakadaog ha iya. Lulupigan ka gud niya.”

¹⁴Samtang nagkakarukayakan pa hira nagkaabot an mga yunuko han palasyo nga nagdadagmit hin pagdara kan Aman ngadto han bangkite ni Ester.