Read Waray Samarenyo Meaning Based Ester 9 Bible Online

Ester 9 - Waray Samarenyo Meaning Based bible

Ester 9

¹Inmabot an ika-13 nga adlaw han Adar nga amo an adlaw nga igintalaan hin pagtuman han hadianon nga pasangyaw, an adlaw nga ginlaoman han mga kaaway han mga Judiyo nga maooripon na nira an mga Judiyo. Kundi gindaog lugod hira han mga Judiyo.

²Didto han bahin han tagsa nga syudad[8] han ginhadian diin nag-uokoy an mga Judiyo, nagtitirok an mga Judiyo hin pagsulong han bisan hin-o nga nagpasipara hin pagdaot ha ira. Nahadlok ha ira an mga tawo ha ngatanan nga dapit ngan waray gud may naato ha ira.

³Ha kamatuoran, ginbuligan an mga Judiyo han ngatanan nga mga opisyal han lalawigan—mga gobernador, mga punoan, ngan mga tumindog han hadi, kay nahadlok hira ngatanan kan Mardoqueo.

⁴Nahibantog na ha bug-os nga ginhadian nga gamhanan na hi Mardoqueo didto han palasyo ngan nagtitikadako an iya kagamhanan.

⁵Sanglit nakagbuhat an mga Judiyo han ira karuyag buhaton han ira mga kaaway. Ira ginsulong an ira mga kaaway pinaagi hin mga espada ngan pinanmatay hira.

⁶Didto ha Susa nga kapital nga syudad pinamatay han mga Judiyo in 500 nga mga tawo.

⁷Upod ha ira an napulo nga mga anak nga kalalaken-an ni Aman nga anak ni Hamedata, an kaaway han mga Judiyo: hira Farsandata, Dalfon, Esfata, Porata, Adalia, Aridata, Fermesta, Arisai, Aridai, ug Jezata. Kundi waray hira manikas.

¹¹Hito manta nga adlaw iginsumat ngadto han hadi an kadamo han mga tawo nga pinamatay didto ha Susa.

¹²Niyan nagsiring kan Rayna Ester an hadi, “Didto la ha Susa pinamatay han mga Judiyo in 500 nga mga tawo lakip an napulo nga mga anak ni Aman. Ano daw an ira ginbuhat didto han mga lalawigan! Ano pa an imo karuyag yana? Ihahatag ini ha imo. Sumati ako kon ano pa an imo karuyag, ngan ihahatag ini ha imo.”

¹³Binmaton hi Ester, “Kon maruruyag ka, Harangdon nga Hadi, itugot nga buhaton buwas nga adlaw han mga Judiyo didto ha Susa an itinugot mo ha ira hin pagbuhat yana nga adlaw. Ngan ipabitay didto han biritayan an mga lawas han napulo nga mga anak ni Aman.”

¹⁴Nagsugo an hadi nga buhaton ini ngan iginpagawas didto ha Susa an pasangyaw. Ginpadayag ha ngatanan nga mga tawo an mga lawas han napulo nga mga anak ni Aman.

¹⁵Dida han ika-14 nga adlaw han Adar, nagtitirok ngahaw an mga Judiyo han Susa ngan pinamatay in 300 pa nga mga tawo didto han syudad. Kundi waray gihapon hira manikas.

¹⁶Nagtitirok liwat an mga Judiyo didto han mga lalawigan hin pagpanalipod han ira kalugaringon. Ginbulos nira an ira mga kaaway pinaagi hin pagpatay hin 75,000 nga mga tawo nga nagdumot ha ira. Kundi waray hira manikas.

¹⁷Dida ini han ika-13 nga adlaw han Adar. Dida han pagkabuwas nga ika-14 nga adlaw, waray na hira panmatay, ngan ginhimo nira ini nga malipayon nga adlaw hin pagkombite.

¹⁸Kundi ginhimo han mga Judiyo han Susa nga pyesta opisyal an ika-15 nga adlaw, tungod nga pinamatay nira an ira mga kaaway dida han ika-13 ngan ika-14 nga mga adlaw, ngan pinmahuway hira hin panmatay dida han ika-15.

¹⁹Amo ini nga ginsasaurog han mga Judiyo nga nag-uokoy didto han gutiay nga mga bungto an ika-14 nga adlaw han bulan han Adar, usa nga malipayon nga pyesta opisyal, nga panahon hin pagkombite ngan paghinatagay hin mga regalo nga pagkaon.

²⁰Iginpasurat ni Mardoqueo ini nga mga hinabo ngan nagpadara hiya hin mga surat ha ngatanan nga mga Judiyo nga higrani ngan higrayo ha bug-os nga Ginhadian han Persia,

²¹nga nagpapahimangno ha ira hin pagsaurog han ika-14 ngan ika-15 nga mga adlaw han Adar sugad nga mga pyesta opisyal ha kada tuig.

²²Amo ini an mga adlaw diin natalwas an mga Judiyo tikang han ira mga kaaway; amo ini an bulan nga an ira panahon hin kabidoan ngan pagturaw naliwanan hin panahon hin pagrayhak ngan pagkalipay. Gin-aghat hira hin pagsaurog hini nga mga adlaw upod in mga kombite ngan mga panagtawo, paghinatagay hin mga regalo nga pagkaon, ngan maghatag liwat han mga kablas.

²³Sanglit ginsunod han mga Judiyo an kan Mardoqueo mga tugon, ngan nahimo na nga batasan an tinuig nga pagsaurog.

²⁴Ginhimo ni Aman nga anak ni Hamedata nga tulin ni Agag, nga kaaway han ngatanan nga mga Judiyo, in mga ripa (“purim” an tawag hini) hin pagtalaan han adlaw hin pagpuo han mga Judiyo; naglarang hiya hin pagpuo ha ira.

²⁵Kundi kinmadto han hadi hi Ester, ngan nagpagawas an hadi hin sinurat nga mga sugo nga tungod hini nag-antos hi Aman kay asay lugod an namatay, diri an mga Judiyo—ginbitay hiya ngan an iya mga anak didto han biritayan.

²⁶Amo ito nga tinatawag an mga pyesta opisyal nga Purim, an pulong para hin “ripa”. Tungod han surat ni Mardoqueo ngan tungod han ngatanan nga nanhinabo ha ira,

²⁷ginhimo ini han mga Judiyo nga turumanon nira, han ira mga tulin, ngan bisan hin-o nga magigin Judiyo, nga dida han angay nga panahon ha kada tuig dayuday pagsasaurogon ini nga duha ka adlaw sumala han mga tugon ni Mardoqueo.

²⁸Ginkaurosaan ini nga an tagsa nga panimalay nga Judiyo han kada tiarabot nga katulinan, didto han tagsa nga lalawigan ngan tagsa nga syudad kinahanglan mahinumdom ngan magsaurog han mga adlaw han Purim ha ngatanan nga panahon nga tiarabot.

²⁹Niyan nagsurat liwat hi Rayna Ester nga anak ni Abihail, upod kan Mardoqueo, hin paghatag han iya bug-os nga pagburot-an hin pagparig-on han surat hiunong han Purim nga ginsurat hin uruuna pa ni Mardoqueo.

³⁰Ginpadara ini nga surat ngadto han ngatanan nga mga Judiyo, ngan ginpadad-an hin mga kopya an ngatanan nga 127 nga mga lalawigan han Ginhadian han Persia, basi makab-ot in kalinaw ngan kahimyangan han mga Judiyo,

³¹ngan nag-aghat ha ira ngan han ira mga tulin, hin pagsaurog han mga adlaw han Purim dida han angay nga panahon, sugad han ira paghimo hin mga turumanon para han pagsaurog hin mga pagpuasa ngan mga panahon hin pagkamasulob-on. Iginsugo ini nira Mardoqueo ug Rayna Ester.

³²Iginsurat dida hin linikid nga basahan an sugo ni Ester hin pagparig-on han mga turumanon para han Purim.