Read Waray Samarenyo Meaning Based Exodo 15 Bible Online

Exodo 15 - Waray Samarenyo Meaning Based bible

Exodo 15

¹Niyan nagkanta hi Moises ngan an mga Israelita ngadto han GINOO hini nga kanta: “Magkakanta ako han GINOO tungod han iya mahimayaon nga pagdarag-an; gintabog niya an mga kabayo ug an mga dikabayo ngadto ha kadagatan.

²An GINOO amo an akon kusog ngan akon kalipay; amo hiya an nagtalwas ha akon. Amo hiya an akon Dyos, ngan pagdadayawon ko hiya, hiya an Dyos han akon amay, ngan kakantahan ko an iya pagkagamhanan.

³Usa nga paraaway an GINOO; an GINOO amo an iya ngaran.

⁴“Iginlabog niya ha dagat an kasondalohan han Ehipto ngan an ira mga karuwahe; nagkalulumos didto han Dagat Pula an gimamag-upayi nga mga opisyal.

⁵Ginlapwasan hira han hilarom nga dagat; linmunod hira ha kahiladman sugad hin bato.

⁶“Makaaramdok an imo tuo nga kamot tungod han imo gahom, O GINOO; gindudugmok hini an kaaway.

⁷Ginpupukan mo an imo mga kaaway tungod han imo kagamhanan; naglalaga an imo kasina, ngan inuugtang mo hira sugad hin uhot.

⁸Ginhuyop mo an dagat ngan nagpundok hin hitaas an tubig; tinmindog ini sugad hin pader; ngan nagmara an salad han dagat.

⁹Nagsiring an kaaway, ‘Lalanaton ngan dadakpon ko hira; pagbabahinbahinon ko an ira manggad ngan titikason ko an ngatanan nga akon naruruyagan. Huhulboton ko an akon espada, ngan aagawon ko an ngatanan nga ira mga butang.’

¹⁰Kundi usa la nga huyop tikang ha imo, O GINOO, nagkalulumos an mga Ehiptohanon; linmunod hira sugad hin timga didto han masulog nga tubig.

¹¹“O GINOO, hin-o han kadiyosan in sugad ha imo? Hin-o in sugad ha imo nga urosahon an pagkabaraan? Hin-o in nakakagbuhat hin mga milagro ngan gamhanan nga mga buhat sugad han imo.

¹²Gin-unat mo an imo tuo nga kamot, ngan ginlam-oy han tuna an amon mga kaaway.

¹³Ha kamatinumanon mo han imo saad, gindara mo an mga tawo nga imo ginbawi; gindara mo hira pinaagi han imo kusog ngadto han imo baraan nga tuna.

¹⁴Hinbatian han kanasoran ngan nangungurog hira hin kahadlok; inaalpan hin duro nga kakulba an mga Filisteohanon

¹⁵Nalilisang an mga pangulo han Edumea; nangungurog an gamhanan nga mga tawo han Moab; nagmamatalaw an mga tawo han Canaan.

¹⁶Inaalpan hira hin kakulba ngan kahadlok. Nakita hira han imo kusog, O GINOO, ngan waray nira nahihimo tungod hin kahadlok, tubtob han pag-agi han imo mga tawo— an mga tawo nga imo gintalwas tikang hin pagkaoripon.

¹⁷Ginpasulod ngan ginpaukoy mo hira didto han imo bukid, an dapit nga imo ginpili, O GINOO, nga imo urokyan, an Templo nga ikaw ngahaw an nagtindog.

¹⁸Maghahadi ka ha kadayonan, O GINOO.”

¹⁹Nagtabok han dagat an mga Israelita dida hin mamara nga salad han dagat. Kundi han pagkadto na han dagat han mga karuwahe han mga taga-Ehipto upod an ira mga kabayo ngan mga dikabayo, ginpabalik han GINOO an tubig ngan ginlapwasan hira.

²⁰Ginkuha ni Miriam nga manaragna, nga bugto ni Aaron, an iya tamborin, ngan sinmunod ha iya an ngatanan nga kababayen-an nga nagtotokar hin mga tamborin ngan nagsasarayaw.

²¹Nagkanta hi Miriam para ha ira: “Pagkanta ha GINOO tungod han iya mahimayaon nga pagdarag-an; gintabog niya an mga kabayo ngan an ira mga dikabayo ngadto ha kadagatan.”

²²Niyan gindara ni Moises an mga tawo han Israel tikang han Dagat Pula ngadto ha kamingawan han Sur. Sulod hin tulo ka adlaw, ginlatas nira an kamingawan, kundi waray hira makaagi hin tubig.

²³Niyan inamabot hira ngadto hin usa nga dapit nga ginngaranan nga Mara, kundi mapait hin duro an tubig didto nga waray hira makainom. Amo ito nga ginngaranan nga Mara[14] ini nga dapit.

²⁴Nagsumbong kan Moises an mga tawo ngan nagpakiana, “Ano an aton iimnon?”

²⁵Nag-ampo hi Moises hin kinasingkasing ngadto han GINOO, ngan ginpakita hiya han GINOO hin lipak hin kahoy nga ipinilak niya ngadto han tubig, ngan waray na pagpait an tubig. Didto gintagan hira han GINOO hin mga balaod nga pagtutumanon nira, ngan iya liwat ginsarihan hira didto.

²⁶Nagsiring hiya, “Kon pagsugton ako niyo hin hingpit pinaagi hin pagbuhat han akon gin-iisip nga matadong, ngan pinaagi hin pagtuman han akon mga sugo, diri ko kamo kakastigohon hin bisan ano nga sakit nga gindara ko ngadto han mga Ehiptohanon. Ako amo an GINOO nga nagtatambal ha iyo.”

²⁷Sunod inmabot hira ngadto ha Elim, diin may-ada dose nga mga burabod ngan sitenta nga mga kahoy nga palmera; didto nagkampo hira ha ligid han tubig.