Read Waray Samarenyo Meaning Based Exodo 16 Bible Online

Exodo 16 - Waray Samarenyo Meaning Based bible

Exodo 16

¹Nagkalakat tikang ha Elim an bug-os nga bungto han mga Israelita ngan inmabot hira ngadto han kamingawan han Sin nga butnga han Elim ug Sinai dida han ika-15 nga adlaw han ikaduha nga bulan katapos nira bumaya han Ehipto.

²Didto han kamingawan nagngurutob hira ngatanan kontra kanda Moises ug Aaron

³ngan nagsiring hira, “Maupay pa kon ginpatay nala kami han GINOO didto ha Ehipto. Didto nakakalingkod ngan nakakakaon pa kami hin karne ngan hin iba nga pagkaon sugad han amon karuyag. Kundi ginpagawas mo kami nganhi hini nga kamingawan basi mamatay kami ngatanan hin gutom.”

⁴Nagsiring kan Moises an GINOO, “Yana pauuranon ko tikang ha langit in pagkaon para ha iyo ngatanan. Kinahanglan gumawas kada adlaw an mga tawo ngan magtirok hira hin igo nga pagkaon para hito nga adlaw. Pinaagi hini, makakasabot na ako kon magsusunod ba hira han akon mga tugon.

⁵Dida han ikaunom nga adlaw, kinahanglan doblehon an ira pagtirok hin pagkaon, ngan andamon ini.”

⁶Sanglit nagsiring hira Moises ug Aaron ha ngatanan nga mga Israelita, “Yana nga gab-i mahibabaro kamo nga an GINOO amo an nagdara ha iyo tikang ha Ehipto.

⁷Ha pagkaaga hikikit-an niyo an himaya han GINOO. Hinbatian niya an iyo mga pagngurutob kontra ha iya—tinuod, kontra ha iya, kay nagtutuman la kami han iya mga tugon.”

⁸Niyan nagsiring hi Moises, “An GINOO amo an maghahatag ha iyo hin karne nga pagkaon ha gab-i ngan hin tinapay tubtob han iyo karuyag ha aga, kay hinbatian niya an duro na nga iyo pagngurutob kontra ha iya. Kon nagngungurutob kamo kontra ha amon, ha tinuod, an GINOO amo an iyo ginngungurutoban.”

⁹Nagsiring kan Aaron hi Moises, “Pakanhia an bug-os nga bungto ngan patindoga hira ha atubangan han GINOO, kay hinbatian niya an ira mga pagngurutob.”

¹⁰Han naghihimangraw hi Aaron ngadto han bug-os nga katilingban, inmatubang hira ngadto han kamingawan, ngan ha gilayon pinmakita didto hin usa nga dampog an himaya han GINOO.

¹¹Nagsiring an GINOO,

¹²“Hinbatian ko an mga pagngurutob han mga Israelita. Sumati hira nga ha pagkakulopay magkakamay-ada hira karne nga kakaonon, ngan ha pagkaaga magkakamay-ada hira han ngatanan nga tinapay nga ira karuyag. Niyan mahibabaro hira nga ako amo an GINOO nga ira Dyos.”

¹³Dida han pagkagab-i nagkaabot in dako nga panon hin katamsihan nga sugad hin mga tukmo nga nakalukop han kampo, ngan han pagkaaga may-ada yamog nga nakaluob han kampo.

¹⁴Han kapara na han tun-og, nahibilin dida ha bawbaw han tuna in magnipis, magbusag, ngan mahumok nga butang nga sugad hin matapok nga bagtik nga yamog.

¹⁵Han paghikit-i la hini han mga Israelita, waray hira pakasabot kon ano ini, ngan may hinparupakiana ha hira, “Ano ini?” Nagsiring ha ira hi Moises, “Amo ini an pagkaon nga iginhatag ha iyo han GINOO.

¹⁶Nagsugo an GINOO nga magtirok hini an kada usa ha iyo sumala han iya ginkikinahanglan, duha ka litro an kada sakop han iya panimalay.”

¹⁷Ginbuhat ini han mga Israelita. May-ada ha ira nagtirok hin damo, ngan an iba gutiay la.

¹⁸Han pagtaksa na nira hini, waray man magsobra adton nagtirok hin damo ngan waray man magkulang an nagtirok hin gutiay la. Nagtirok an kada usa sugad gudla han iya kinahanglan.

¹⁹Nagsiring ha ira hi Moises, “Kinahanglan waray maghimos hin bisan ano hini para buwas.”

²⁰Kundi waray bumali kan Moises an iba ha ira, ngan nagsalin hira. Han pagkaaga, uloron ngan mabaho na ini, sanglit nasina ha ira hi Moises.

²¹Ikinaaga nangunguha an kada usa sugad la han iya kinahanglan; ngan kon mapaso na an adlaw, natunaw adton nahibibilin ha tuna.

²²Dida han ikaunom nga adlaw, nanguha hira hin doble nga pagkaon, tag-upat ka litro para han kada tawo. Nagkaabot an ngatanan nga mga pangulo han bungto, ngan ginsumatan nira hi Moises hiunong hini.

²³Ngan nagsiring hiya ha ira, “Nagsugo an GINOO nga baraan nga adlaw hin pagpahuway buwas, ngan ighahalad ha iya ini nga adlaw. Lutoa yana nga adlaw an karuyag niyo paglutoon, ngan lagaa an karuyag niyo paglagaon. Kinahanglan isalin ngan himoson para buwas an bisan ano nga nahisalin.”

²⁴Sumala han iginsugo ni Moises, ginhimos nira ngada han pagkabuwas an nahisalin; waray ini pagbaho o pag-ulora.

²⁵Nagsiring hi Moises, “Kaona niyo ini yana nga adlaw, kay adlaw yana hin pagpahuway nga iginhalad ngadto han GINOO, ngan diri kamo makakaagi hin pagkaon ha gawas han kampo.

²⁶Kinahanglan manguha kamo hin pagkaon sulod hin unom ka adlaw, kundi waray pagkaon nga iyo hiaagian dida han ikapito nga adlaw, an adlaw hin pagpahuway.”

²⁷Dida han ikapito nga adlaw ginmawas in pipira han mga tawo basi manguha hin mga pagkaon, kundi waray hira makaagi.

²⁸Niyan nagsiring kan Moises an GINOO, “Tubtob san-o an diri niyo pagsugot han akon mga sugo?

²⁹Hinumdomi nga ako nga GINOO naghatag ha iyo hin usa nga adlaw hin pagpahuway. Sanglit dida han ikaunom nga adlaw mahatag ako ha iyo hin pagkaon nga igo hin kanan duha ka adlaw. Dida han ikapito nga adlaw kinahanglan magpabilin an tagsatagsa dida han iya hinmumutangan ngan diri hiya bumaya han iya balay.”

³⁰Sanglit waray magtrabaho an mga tawo dida han ikapito nga adlaw.

³¹Ginngaranan han mga tawo han Israel nga mana[15] an pagkaon. Sugad ini hin gutiay ngan mabusag nga liso, ngan sugad an rasa hini hin magnipis nga mga bibingka nga sinaktan hin dugos.

³²Nagsiring hi Moises, “Nagsugo ha aton an GINOO hin pagtipig hin mana para han aton mga tulin, basi makakita hira han kaon nga iginhatag han Dyos hin pagpakaon ha aton dinhe han kamingawan han pagdad-a niya ha aton tikang ha Ehipto.”

³³Nagsiring kan Aaron hi Moises, “Kuha hin usa nga tibod, sudli ini hin duha ka litro nga mana, ngan igbutang ini didto ha atubangan han GINOO, basi paghimoson ini para han aton mga tulin.”

³⁴Sumala han iginsugo han GINOO kan Moises, iginbutang ini ni Aaron ha atubangan han Kahon han Ginsaaran basi mahimos ini hin maupay.

³⁵Mana an pagkaon han mga Israelita sulod han 40 ka tuig, tubtob han pag-abot nira ha tuna han Canaan nga ira gin-ukyan. (

³⁶Baynte ka litro an hin-aaraan nga taraksan nga ginggamit hadto nga panahon.)