Read Waray Samarenyo Meaning Based Exodo 17 Bible Online

Exodo 17 - Waray Samarenyo Meaning Based bible

Exodo 17

¹Binmaya han kamingawan han Sin an bug-os nga katilingban nga Israelita, ngan nagbinurubalhin hira hin dapit sumala han sugo ha ira han GINOO. Nagkampo hira didto ha Refidim, kundi waray didto tubig nga irimnon.

²Nagngurutob hira kan Moises, ngan nagsiring, “Tagi kami hin tubig nga irimnon.” Binmaton hi Moises, “Kay ano nga nagnginginurutob kamo? Kay ano nga ginsasarihan man niyo an GINOO?”

³Kundi inuuhaw na hin duro an mga tawo ngan nagpadayon hira hin pagngurutob kan Moises. Nagsiring hira, “Kay ano nga ginpagawas mo kami ha Ehipto? Pagpatay ba hin uhaw ha amon, han amon mga anak, ngan han amon kabakahan?”

⁴Nag-ampo hi Moises hin kinasingkasing ha GINOO ngan nagsiring, “Ano an akon sadang pagbuhaton hini nga mga tawo? Andam na hira hin pagbato ha akon.”

⁵Nagsiring kan Moises an GINOO, “Paupda ha imo in pira han mga pangulo han Israel ngan pag-una kamo han mga tawo. Dad-a an tungkod nga imo iginbalbag han Nilo.

⁶Matindog ako ha imo atubangan dida hin usa nga bato didto ha Bukid Sinai. Balbaga an bato ngan maawas tikang hini in tubig nga irimnon para han mga tawo.” Ginbuhat ini ni Moises ha atubangan han mga pangulo han Israel.

⁷Ginngaranan niya nga Masa ug Meriba[16] an dapit, kay nagngurutob an mga Israelita ngan ginsarihan nira an GINOO han pagpakiana nira, “Kaupod ba naton an GINOO o diri?”

⁸Nagkaabot an mga Amalekanhon ngan ginsulong nira an mga Israelita didto ha Refidim.

⁹Nagsiring kan Josue hi Moises, “Pagpili hin kalalaken-an nga makadto buwas hin pakig-away han mga Amalekanhon. Matindog ako ha bawbaw han pungtod ngan kakaptan ko an tungkod nga iginpadara ha akon han Dyos.”

¹⁰Ginbuhat ni Josue sumala han iginsugo ha iya ni Moises ngan ginmawas hi Josue hin pakig-away han mga Amalekanhon, samtang sinmagka hira Moises, Aaron ug Hur ngadto ha bawbaw han pungtod.

¹¹Nakakadaog an mga Israelita kon binabayaw ni Moises an iya mga butkon, kundi nakakadaog an mga Amalekanhon kon ipinapaubos niya an iya mga butkon.

¹²Han pagbutlawa na han mga butkon ni Moises, kinmuha hira Aaron ug Hur hin usa nga bato nga ginpalingkuran kan Moises, samtang nagtindog hira sapit kan Moises ngan gin-alsa nira an mga butkon ni Moises nga diri magtipaubos, tubtob han katunod han adlaw.

¹³Hini nga paagi ginpirde ni Josue an mga Amalekanhon.

¹⁴Niyan nagsiring kan Moises an GINOO, “Igsurat an kasaysayan hiunong hini nga pagdarag-an basi mahinumdoman ini. Sumati hi Josue nga pagpupuohon ko an mga Amalekanhon.”

¹⁵Nagtindog hi Moises hin usa nga altar ngan ginngaranan ini nga “An GINOO amo an akon Bandera.”

¹⁶Nagsiring hiya, “Alsaha hin hitaas an bandera han GINOO![17] Magpapadayon an GINOO hin pakig-away han mga Amalekanhon ha dayon nga katuigan!”