Read Waray Samarenyo Meaning Based Exodo 24 Bible Online

Exodo 24 - Waray Samarenyo Meaning Based bible

Exodo 24

¹Nagsiring kan Moises an GINOO, “Sagka han bukid ngadi ha akon, ikaw ngan hira Aaron, Nadab, Abiu, ngan hin 70 han mga pangulo han Israel; ngan yukbo kamo hin pagsingba samtang antaw pa kamo ha akon.

²Ikaw la an mahirani ha akon, an iba diri maupod ha imo. Diri ngani angay sumagka han bukid an mga tawo.”

³Ginkadto ni Moises an mga tawo ngan ginsumatan niya han ngatanan nga mga sugo han GINOO ngan han ngatanan nga mga turumanon. Nagdurungan hin pagbaton an mga tawo, “Pagtutumanon namon an ngatanan nga iginsiring han GINOO.”

⁴Iginsurat ni Moises an ngatanan nga mga sugo han GINOO. Temprano pa han pagkaaga nagtindog hiya hin usa nga altar didto ha ubos han bukid ngan nagbutang hin 12 nga mga bato, nga natindog han 12 nga mga tribo han Israel.

⁵Niyan nagsugo hiya hin batan-on nga kalalaken-an, basi maghalad han GINOO hin mga hayop nga tutuboron ngan hin mga tudo nga baka nga ighahalad para hin pagkaurosa.

⁶Kinuha ni Moises an katunga han dugo han mga hayop ngan iginsulod ini dida han mga makaong; ngan an nahisalin nga katunga iginsablig niya ngada han altar.

⁷Niyan kinuha niya an basahan han ginsaaran, diin nahisurat an mga sugo han GINOO, ngan ginbasa ini niya hin dako nga tingog basi hinbatian han mga tawo. Nagsiring hira, “Pagsusugton namon an GINOO ngan pagtutumanon namon an ngatanan nga iya iginsugo.”

⁸Niyan kinuha ni Moises an dugo dida han mga makaong ngan iginsablig ini ngadto han mga tawo. Nagsiring hiya, “Amo ini an dugo nga nagparig-on han ginsaaran nga ginhimo han GINOO ha iyo dida han paghatag niya ha iyo hini ngatanan nga mga sugo.”

⁹Sinmagka han bukid hira Moises, Aaron, Nadab, Abiu, ngan an 70 nga mga pangulo han Israel,

¹⁰ngan hinkit-an nira an Dyos han Israel. Ha ubos han iya mga tiil hinkit-an nira in sugad hin safiro nga taramakan nga maasol sugad han mahayag nga langit.

¹¹Waray paglabti han Dyos ini nga mga pangulo han Israel; hinkit-an nira an Dyos, ngan kahuman nangaon ngan nag-irignom hira.

¹²Nagsiring kan Moises an GINOO, “Sagka han bukid ngadi ha akon ngan samtang aadi ka, ighahatag ko ha imo in duha nga mga papan nga bato nga ginsuratan ko han ngatanan nga mga balaod nga igtututdo mo han mga tawo.”

¹³Nag-andam hira Moises ug Josue nga iya kabulig ngan nagtikang hi Moises[24] hin pagsagka han baraan nga bukid.

¹⁴Ginsiring ni Moises an mga pangulo, “Hulata kami dinhe ha kampo tubtob han amon pagbalik. Aanhi man ha iyo hira Aaron ug Ur; makakahimo hin pagdangop ha ira an bisan hin-o nga may turuhayon nga sumbong.”

¹⁵Sinmagka hi Moises han Bukid Sinai ngan natahoban an bukid hin dampog.

¹⁶Hinmugdon ha bukid an himaya han GINOO. Hinkit-an han mga Israelita an himaya han GINOO nga sugad hin naglalahinggab nga kalayo didto ha bawbaw han bukid. Natahoban han dampog an bukid sulod hin unom ka adlaw, ngan dida han ikapito ka adlaw, nagtawag an GINOO kan Moises tikang han dampog.

¹⁸Nagtipaunhan hi Moises hin pagsagka han bukid ngadto han dampog. Didto nagpabilin hiya sulod hin 40 ka adlaw ug gab-i.