Read Waray Samarenyo Meaning Based Exodo 33 Bible Online

Exodo 33 - Waray Samarenyo Meaning Based bible

Exodo 33

¹Nagsiring kan Moises an GINOO, “Bayai ini nga dapit, ikaw ngan an mga tawo nga imo gindara tikang ha Ehipto, ngan kadto kamo han tuna nga iginsumpa ko hin paghatag kanda Abraham, Isaac, ug Jacob, ngan han ira mga tulin.

²Magpapadara ako hin usa nga anghel nga magtututdo ha iyo, ngan paiiwason ko an mga Canaanhon, an mga Amoreohanon, an mga Hiteohanon, an mga Pariseohanon, an mga Hibeohanon ngan an mga Jebuseohanon.

³Makadto kamo hin usa nga hura ngan matambok nga tuna. Kundi diri ako ngahaw maupod ha iyo, kay mga tawo kamo nga magtig-a an mga ulo ngan bangin puohon ko kamo dida ha dalan.”

⁴Han pakabati la hini han mga tawo, nagmabidoon hira, ngan waray na hira magsul-ot hin mga alahas,

⁵kay nagsugo an GINOO kan Moises hin pagsumat ha ira, “Mga tawo kamo nga magtig-a an mga ulo. Kon umupod ako ha iyo bisan hin madaliay la, pagpupuohon ko kamo. Yana, kuhaa an iyo mga alahas, ngan ako an labi nga maaram kon ano an akon pagbubuhaton ha iyo.”

⁶Sanglit waray na magsul-ot hin mga alahas an mga tawo han Israel tikang hira bumaya han Bukid Sinai.

⁷Nabatasan ni Moises an pagdara han Tulda ngan pagtindog hini ha dapit nga hirayo ngan gawas han kampo han mga Israelita. Ginngaranan ini nga Tulda han GINOO. Adton karuyag makighimangraw ngan manginsayod han GINOO, napakadto la hini nga Tulda.

⁸Ha kada pagkakadto ni Moises, natindog an mga tawo dida han porta han ira mga tulda ngan ira gin-iininaw hi Moises tubtob han iya pagsulod hini nga Tulda han GINOO.

⁹Kon nakakasulod na hi Moises, nahugdon an harigi nga dampog ngan nagpapabilin ini dida ha porta han Tulda, ngan nakikighimangraw kan Moises an GINOO tikang han dampog.

¹⁰Kon nakita an mga tawo han harigi nga dampog didto han porta han Tulda nayukbo hira.

¹¹Nag-aatubang hin paghimangraw hira Moises ngan an GINOO, sugad gud hin usa ka tawo nga nakikighimangraw hin iya sangkay. Katapos, nabalik hi Moises ngadto han kampo, samtang nagpabilin didto han Tulda an batan-on nga iya kabulig, hi Josue nga anak ni Nun.

¹²Nagsiring hi Moises ha GINOO, “Matuod gad nga ginsiring mo ako nga ako an magmamando hini nga mga tawo ngadto hito nga tuna, kundi waray mo ako pagsumati kon hin-o an imo paupdon ha akon. Nagsiring ka nga nakilala ka ha akon hin maupay ngan nalilipay ka ha akon.

¹³Yana, kon nalilipay ka ha akon, pagsumati ako han imo mga nahuhunahunaan, basi makag-alagad ako ha imo ngan magpadayon hin pagpahalipay ha imo. Hinumdomi liwat nga ginpili mo na ini nga nasod nga imo kalugaringon.”

¹⁴Nagsiring an GINOO, “Maupod ako ha imo ngan ihahatag ko ha imo an pagdarag-an.”

¹⁵Binmaton hi Moises, “Kon diri ka umupod ha amon, ayaw kami pabayaa hini nga dapit.

¹⁶Uunanhon hin pakasabot namon nga nalilipay ka han imo mga tawo ngan ha akon, kon diri ka umupod ha amon? Diri ba an imo pag-upod ha amon amo an magpapakilala nga linain mo kami nga mga tawo kay han iba nga mga tawo han tuna?”

¹⁷Nagsiring kan Moises an GINOO, “Pagbubuhaton ko sumala han imo pinangaro, kay nakilala ako hin maupay ha imo ngan nalilipay ako ha imo.”

¹⁸Niyan naghangyo hi Moises, “Pakitaa gad ako han imo himaya.”

¹⁹Binmaton an GINOO, “Ipapakita ko ha imo atubangan an bug-os ko nga kahayag ngan igsusumat ko ha imo an akon baraan nga ngaran. Ako amo an GINOO, ngan may-ada ko pagpaid ngan pagkalooy hadton mga nakakalipay ha akon.

²⁰Diri ko ikaw pakikitaon han akon bayhon, kay waray tawo nga makakakita ha akon ngan magpapabilin nga buhi,

²¹kundi iini in dapit nga sapit ha akon diin makakatukdaw ka dida hin usa nga bato.

²²Kon lumabay an akon himaya igbubutang ko ikaw dida hin usa nga kagutakan han bato ngan tatahoban ko ikaw han akon kamot ngada han akon pakalabay.

²³Niyan kukuhaon ko an akon kamot, ngan hikikit-an mo an akon talikoran, kundi diri ka makita han akon bayhon.”