Read Waray Samarenyo Meaning Based Exodo 34 Bible Online

Exodo 34 - Waray Samarenyo Meaning Based bible

Exodo 34

¹Nagsiring kan Moises an GINOO, “Pagtabas hin duha nga mga papan nga bato nga sugad han una, ngan pagsusuratan ko ini han mga pulong nga nakada han una nga mga papan nga imo ginpusak.

²Pag-andam buwas han aga, ngan sagka han Bukid Sinai ngan pakigkita ha akon didto ha bawbaw han bukid.

³Kinahanglan waray maupod ha imo; kinahanglan waray tawo nga hikit-an ha bisan diin nga dapit han bukid; ngan waray mga karnero o mga baka nga mananabsab didto ha ubos han bukid.”

⁴Sanglit nagtabas hi Moises hin duha pa nga mga papan nga bato, ngan temprano pa han pagkaaga gindara ini niya ngadto ha igbaw han Bukid Sinai, sumala han iginsugo han GINOO.

⁵Linmusad an GINOO dida hin usa nga dampog, tinmindog didto sapit ha iya, ngan iginpabati an iya baraan nga ngaran, an GINOO.[34]

⁶Niyan linmabay an GINOO ha iya atubangan ngan nagsiring, “Ako, an GINOO, an Dyos nga tugob hin kalooy ngan hin pagpaid, diri madali masina, ngan nagpapakita hin dako nga paghigugma ngan pagkamatinumanon.

⁷Gintutuman ko an akon saad ha yinukot nga mga katulinan[35] ngan ginpapasaylo ko an karat-an ngan sala; kundi diri ako magpapasibaya hin pagkastigo hin mga anak ngan mga apo ngadto han ikatulo ngan ikaupat nga katulinanan tungod han mga sala han ira mga ginikanan.”

⁸Hinmapa dayon hi Moises ha tuna ngan nagsingba.

⁹Nagsiring hiya, “O GINOO, kon nalilipay ka ha akon, nahangyo ako nga umupod ka ha amon. Magtig-a an mga ulo hini nga mga tawo, kundi pasayloa an amon karat-an ngan an amon sala, ngan karawata kami nga imo kalugaringon nga mga tawo.”

¹⁰Nagsiring kan Moises an GINOO, “Nakikigsabot ako yana han mga tawo han Israel. Ha ira atubangan pagbubuhaton ko in dagko nga mga butang nga waray pa gud pagbuhata ha bisan diin nga tuna o ha bisan diin nga nasod. Hikikit-an han ngatanan nga mga tawo an dagko nga mga butang nga nahihimo nakon nga GINOO, kay pagbubuhaton ko para ha imo in makaaramdok nga butang.

¹¹Sugta niyo an mga balaod nga ighahatag ko ha iyo yana nga adlaw. Paiiwason ko an mga Amoreohanon, an mga Canaanhon, an mga Hiteohann, an mga Perizeohanon, an mga Hibeohanon, ngan an mga Jebuseohanon, samtang nasulong kamo.

¹²Ayaw kamo pakigsabot han mga tawo han nasod nga iyo kakadtoan, kay makamaratay ini nga bitik para ha iyo.

¹³Rub-a lugod niyo an ira mga altar, bungkaga an ira baraan nga mga harigi, ngan gun-oba an ira mga ladawan han diyosa Asera.

¹⁴“Ayaw kamo pagsingba hin lain nga diyos, kay maabugho ako nga GINOO.

¹⁵Ayaw kamo pakigsabot hin kalinaw han mga tawo han nasod, kay dadapiton kamo nira hin pagtampo ha ira kon magsisingba ngan maghahalad hira ha ira pagano nga kadiyosan, ngan masusulay kamo hin pagkaon han karaonon nga iginhahalad nira ha ira kadiyosan.

¹⁶Bangin mangasawa an iyo mga anak nga kalalaken-an hito nga mga langyaw nga kababayen-an, ngan pagtutdoan an iyo mga anak hin diri na pagmatinumanon ha akon ngan hin pagsingba lugod han ira pagano nga kadiyosan.

¹⁷“Ayaw kamo paghimo ngan pagsingba hin kadiyosan nga metal.

¹⁸“Sauroga an Pyesta han Tinapay nga Waray Patubo. Sumala han iginsugo ko ha iyo, kaon kamo hin tinapay nga waray patubo sulod hin pito ka adlaw dida han bulan han Abib, kay ginmawas kamo ha Ehipto hito nga bulan.

¹⁹“Akon an kada suhag nga anak nga lalake ngan kada suhag nga lalaki nga hayop,

²⁰kundi tutubson niyo an kada suhag nga asno pinaagi hin paghalad hin usa nga nati nga karnero. Kon diri niyo pagtubson ini, baria an liog hini. Tubsa niyo an kada suhag nga anak nga lalake. “Kinahanglan diri pumakita ha akon atubangan an waray iharalad.

²¹“May-ada niyo unom ka adlaw nga igtutuman han iyo buruhaton; ayaw kamo pagbuhat dida han ikapito ka adlaw, ayaw bisan ha panahon hin pag-arado o hin pag-ani.

²²“Sauroga niyo an Pyesta han Pag-ani kon magtikang na kamo hin pag-ani han syahan nga mga abot han iyo trigo, ngan sauroga niyo an Pyesta han mga Payagpayag dida han tikatarapos na an kathuraw, kon nangunguha na kamo han mga bunga han iyo gintanom nga mga kahoy.

²³“Kinahanglan makanhi makatulo ha kada tuig an ngatanan niyo nga kalalaken-an basi magsingba ha akon nga GINOO, an Dyos han Israel.

²⁴Katapos ko paiwasa an mga nasod ha iyo atubangan, ngan pahiluaga an iyo katunaan, waray na magpapasipara hin pag-agaw han iyo nasod sulod han panahon han tulo nga mga pyesta.

²⁵“Ayaw kamo paghalad hin tinapay nga may patubo kon maghahalad kamo ha akon hin hayop. Ayaw kamo pagsalin tubtob han pagkaaga hin bisan ano nga bahin han hayop nga gin-ihaw dida han Pyesta han Paglabay.

²⁶“Ha kada tuig dad-a niyo ngadto han balay han GINOO an syahan nga mga gin-ani niyo. “Ayaw niyo paglutoa in nati nga karnero o kanding dida han gatas han iroy hini.”

²⁷Nagsiring kan Moises an GINOO, “Igsurat ini nga mga pulong, kay pinasikad dida hini nga mga pulong naghihimo ako hin usa nga ginsaaran ha imo ngan han Israel.”

²⁸Nagpabilin didto hi Moises sulod hin kwarenta ka adlaw ug gab-i upod han GINOO, ngan waray hiya kumaon o uminom hin bisan ano. Iginsurat niya dida han mga papan nga bato an mga pulong han ginsaaran—an Napulo nga mga Sugo.

²⁹Han paglugsong ni Moises han Bukid Sinai nga nakakadara han Napulo nga mga Sugo, waray hiya kalibutan nga nagmalamrag an iya bayhon tungod han iya pakighinimangraw han GINOO.

³⁰Tinman-aw kan Moises hi Aaron ngan an ngatanan nga mga tawo ngan hinkit-an nira nga malamrag an iya bayhon, ngan nahadlok hira hin paghirani ha iya.

³¹Kundi gintawag hira ni Moises, ngan dinmaop ha iya hi Aaron ngan an ngatanan nga mga pangulo han bungto, ngan nakighimangraw ha ira hi Moises.

³²Katapos, nag-alirong ha iya an ngatanan nga mga tawo han Israel, ngan iginsumat ha ira ni Moises an ngatanan nga balaod nga iginhatag ha iya han GINOO didto han Bukid han Sinai.

³³Han katapos ni Moises makighimangraw ha ira, gintahoban niya hin bilo an iya bayhon.

³⁴Ha kada pagkakadto ni Moises han Tulda han GINOO hin pakighimangraw han GINOO, kinukuha niya an tahob nga bilo. Kon nagawas na hiya, sinusumatan niya an mga tawo han Israel han ngatanan nga ipinapagsumat ha iya,

³⁵ngan hinkikit-an nira nga malamrag an iya bayhon. Katapos tinatahoban ni Moises an iya bayhon ngada han sunod nga pakighimangraw liwat niya han GINOO.