Read Waray Samarenyo Meaning Based Exodo 35 Bible Online

Exodo 35 - Waray Samarenyo Meaning Based bible

Exodo 35

¹Gintirok ni Moises an bug-os nga bungto han Israel ngan nagsiring ha ira, “Amo ini an iginsugo han GINOO nga pagtutumanon niyo:

²May-ada niyo unom ka adlaw nga pagtuman han iyo buruhaton, kundi baraan an ikapito ka adlaw, usa nga baraan nga adlaw hin pagpahuway nga iginhalad para ha akon, an GINOO. Kinahanglan patayon an bisan hin-o nga magbuhat hin bisan ano nga buruhaton dida hito nga adlaw.

³Igindidiri bisan pagdagkot hin kalayo didto han iyo mga balay kon Adlaw nga Igparahuway.”

⁴Ginsiring ni Moises an ngatanan nga mga tawo han Israel, “Amo ini an iginsugo han GINOO:

⁵Paghalad kamo ha GINOO. An tagsatagsa nga karuyag maghalad, kinahanglan magdara hin mga halad nga bulawan, salapi, o bronse;

⁶lino nga pino; delana nga asul, granate, ug pula; dugnit nga hinimo hin barahibo hin kanding;

⁷anit hin karnero nga lalaki nga tinina hin pula; anit hin kanding; kahoy nga akasya;

⁸lana para han mga lampara, mga pahamot para han lana nga igdirihog ngan pahamot para han insyenso;

⁹mga kornalina ngan iba pa nga mga alahas nga igburutang dida han efod ngan dida han tahob ha dughan han Labaw nga Padi.

¹⁰“Kinahanglan kumanhi an ngatanan nga batid nga trabahador dida ha iyo basi himoon an ngatanan nga iginsugo han GINOO:

¹¹an Tulda han GINOO, an tahob hini ha sakob ngan ha gawas, an mga sab-itan ngan an mga balayan hini, an mga palhog, an mga harigi, ngan an mga tungtongan;

¹²an Kahon han Ginsaaran, ngan an mga kasangkapan hini: an mga parasgan, an takop, ngan an biray nga salipod hini;

¹³an lamesa upod an mga parasgan ngan an ngatanan nga kasangkapan hini; an tinapay nga igharalad ngadto sa Dyos;

¹⁴an kandilero para han suga ngan an kasangkapan hini; an mga lampara upod an mga lana hini;

¹⁵an altar nga surunogan hin insyenso ngan an mga parasgan hini; an lana nga igdirihog; an mahamot nga insyenso; an biray para han agian han Tulda;

¹⁶an altar nga surunogon han mga halad, upod hini an isinusumpay nga rehas nga bronse, an mga parasgan ngan an ngatanan nga kasangkapan hini; an palanggana nga hurunawan ngan an tungtongan hini;

¹⁷an mga biray para han alad, an mga harigi ngan mga tungtongan hini; an biray para han agian han alad;

¹⁸an mga usok ngan an pisi para han Tulda ngan han alad;

¹⁹ngan an magtahom nga mga biste nga sinusul-ot han kapadian kon nag-aalagad hira didto han Baraan nga Dapit—an baraan nga mga biste nira Aaron nga padi, ngan han iya mga anak nga kalalaken-an.”

²⁰Nanguli an ngatanan nga mga tawo han Israel,

²¹ngan an tagsatagsa nga naruyag hin paghalad nagdara hin halad ngadto han GINOO para hin paghimo han Tulda han GINOO. Gindara nira an ngatanan nga ginkikinahanglan para hin pagsingba ngan para hin paghimo han padianon nga mga biste.

²²An ngatanan nga kalalaken-an ug kababayen-an nga karuyag maghatag hin mga sabong nagdara hin mga alpiler nga isarabong mga ariyos, mga singsing, mga kwentas, ngan nagkadirodilain nga mga alahas nga bulawan, ngan iginhalad nira ini ngadto han GINOO.

²³Nagdara an iba hin magkalainlain nga tela: lino nga pino; delana nga asul, granate, o pula; dugnit nga barahibo hin kanding; anit hin karnero nga lalaki nga tinina hin pula; o anit hin kanding.

²⁴Nagdara han ira halad ngadto ha GINOO an iba nga may-ada salapi o bronse, ngan an iba nga may-ada kahoy nga akasya mga magagamit hin bisan ano nga buruhaton.

²⁵Gindara han ngatanan nga batid nga parahablon nga kababayen-an in tingkal nga lino nga pino ngan tingkal nga delana nga asul, granate ug pula nga ira ginhimo.

²⁶Naghimo liwat hira hin tingkal nga barahibo hin kanding.

²⁷Nagdara an mga pangulo hin mga kornalina ngan iba pa nga mga alahas nga igburutang dida han efod ngan dida han tahob ha dughan,

²⁸ngan mga pahamot ug lana para han mga lampara, para han lana nga igdirihog, ngan pahamot para han insyenso.

²⁹An ngatanan nga mga tawo han Israel nga naruyag hin paghatag, nagdara han ira halad ngadto han GINOO, para han buruhaton nga iya iginsugo kan Moises.

³⁰Nagsiring hi Moises ha mga Israelita, “Ginpili han GINOO hi Bezalel nga anak ni Uri ngan apo ni Hur, nga sakop han tribo ni Juda.

³¹Ginpuno hiya han Dyos han iya gahom[36] ngan gintagan hiya hin kabatiran, hibaro ngan sarabotan para han bisan ano nga de arte nga buhat,

³²para hin paghimo hin mga debuho nga magtahom nga magamit hiya hin bulawan, salapi, ug bronse;

³³para hin pagtabas hin mga mahal nga bato; para hin pagguhit hin kahoy; ngan para han iba pa nga de arte nga buhat.

³⁴Iginhatag han GINOO ha iya ngan kan Aholiab nga anak ni Ahisamac, nga sakop han tribo ni Dan, an hibaro hin pagtutdo han iba han ira buruhaton.

³⁵Iya iginhatag ha ira an kabatiran para han ngatanan nga buruhaton: ngadto han mga paradibuho, mga paraadorno, ngan mga parahablon hin lino nga pino; delana nga asul, granate, ug pula; ngan iba pa nga dugnit. Nakakahimo hira han ngatanan nga mga buruhaton, ngan mga batid hira nga mga paradebuho.