Read Waray Samarenyo Meaning Based Exodo 37 Bible Online

Exodo 37 - Waray Samarenyo Meaning Based bible

Exodo 37

¹Ginhimo ni Bezalel an Kahon han Ginsaaran tikang hin akasya, nga 110 ka sentimetros an kahilaba, 66 ka sentimetros an kahiluag, ngan 66 ka sentimetros an kahitaas.

²Ginhaklapan ini niya hin puraw nga bulawan ha sakob ngan ha gawas, ngan ginpalibotan niya hin ribite nga bulawan.

³Naghimo hiya hin upat nga mga maglidong nga sulpotan nga bulawan, ngan igintaod ini dida han upat nga mga tiiltiil han kahon, nga tag duha nga mga maglidong nga sulpotan ha kada ligid.

⁴Naghimo hiya hin mga parasgan nga akasya ngan ginputos ini hin bulawan,

⁵ngan iginsul-ot ini dida han mga maglidong nga sulpotan ha kada ligid han Kahon.

⁶Naghimo hiya hin takop nga puraw nga bulawan, nga 110 ka sentimetros an kahilaba ngan 66 ka sentimetros an kahilapad.

⁷Naghimo hiya hin duha nga mga kerubin tikang hin pinilpig nga bulawan,

⁸nga tag usa para han kada kataposan han takop. Ginhimo niya ini nga unay han takop.

⁹Nag-aatubang ha bawbaw han takop an mga kerubin, ngan nakakapandong han takop an ira binuklad nga mga pako.

¹⁰Ginhimo niya an lamesa nga akasya, nga 88 ka sentimetros an kahilaba, 44 ka sentimetros an kahilapad, ngan 66 ka sentimetros an kahitaas.

¹¹Ginputos ini niya hin puraw nga bulawan ngan ginpalibotan ini hin ribite nga bulawan.

¹²Ginpalibutan ini niya hin moldora nga 25 ka milimetros an kahilapad ngan ginpalibotan hin ribite nga bulawan an moldora.

¹³Ginhimoan ini niya hin upat nga maglidong nga mga sulpotan nga bulawan, ngan igintaod ini dida han upat nga mga kanto diin nakada an mga tiiltiil.

¹⁴Igintaod ha hirani han moldora an mga sulpotan nga para han mga parasgan han lamesa.

¹⁵Ginhimo niya an mga parasgan nga akasya ngan ginputos ini hin bulawan.

¹⁶Ginhimo niya hin puraw nga bulawan an mga garamiton para han lamesa: an mga plato, an mga tasa, an mga tibod, ngan an mga makaong nga ginagamit para han mga halad nga irimnon.

¹⁷Ginhimo niya an kandilero hin puraw nga bulawan. Ginhimo niya an tungtongan ngan an lawas hini hin pinilpig nga bulawan; ginhimo nga unay han lawas han kandilero an mga bukad nga adorno, lakip an mga biyuos ngan mga petalo.

¹⁸Naulbo in unom nga mga sanga tikang han mga kagiliran hini nga tagtulo paluyo.

¹⁹An kada usa han unom nga mga sanga may-ada adorno nga tagtulo nga mga bukad hin almendras, upod in mga biyuos ngan mga petalo.

²⁰May-ada upat nga adorno nga mga bukad an lawas han kandilero nga sugad hin mga bukad hin almendras, upod an mga biyuos ngan mga petalo.

²¹May tag usa nga biyuos ha ubos han kada usa han tulo ka padis nga mga sanga.

²²Usa la ka bug-os hin pinilpig nga puraw nga bulawan an mga biyuos, an mga sanga, ngan an kandilero.

²³Naghimo hiya hin pito nga mga lampara para han kandilero, ngan naghimo hiya hin puraw nga bulawan nga mga kimpit ngan mga saladang han suga.

²⁴Ginamit niya in 35 ka kilo nga puraw nga bulawan hin paghimo han kandilero ngan han ngatanan nga kasangkapan hini.

²⁵Ginhimo niya in usa nga altar nga akasya nga surunogan hin insyenso. Kwadrado ini nga 45 ka sentimetros an kahilaba ngan an kahilapad, ngan 90 ka sentimetros an kahitaas hini. Ginhimo nga unay han altar an mga sungaysungay hini dida han upat nga mga kanto.

²⁶Ginputos niya hin puraw nga bulawan an bawbaw han altar, an upat nga mga ligid, ngan an mga sungaysungay hini, ngan ginpalibutan ini hin ribite nga bulawan.

²⁷Ginhimoan ini niya hin duha nga mga maglidong nga sulpotan nga bulawan nga susuhotan han mga parasgan kon pagpasgon han altar ngan igintaod ini ha ubos han sidsid han duha nga kagiliran.

²⁸Ginhimo niya an mga parasgan nga akasya ngan ginputos ini hin bulawan.

²⁹Ginhimo liwat niya an baraan nga lana nga igdirihog ngan an puraw nga mahamot nga insyenso, nga ginsakot sugad han ginbubuhat han mga parahimo hin pahamot.