Read Waray Samarenyo Meaning Based Exodo 38 Bible Online

Exodo 38 - Waray Samarenyo Meaning Based bible

Exodo 38

¹Ginhimo niya in usa nga altar nga akasya nga surunogan han mga halad. Kwadrado ini nga 2.2 ka metros an kahilaba ngan an kahilapad, ngan 1.3 ka metros an kahitaas.

²Ginhimo niya nga unay han altar an mga sungaysungay ha bawbaw han upat nga mga kanto hini. Ginputos niya hin bronse ini ngatanan.

³Ginhimo liwat niya an ngatanan nga kasangkapan para han altar: an mga surudlan hin agbon, an mga sakwat, an mga palanggana, an mga iturugsok, ngan an mga sangga hin mga baga hin kalayo. Bronse ini ngatanan nga kasangkapan.

⁴Naghimo hiya hin usa nga rehas, hinukot nga bronse ngan iginbutang ini ha ubos han sidsid han altar, basi makaabot ini ha katungatunga han kahitaas han altar.

⁵Naghimo hiya hin upat nga mga maglidong nga sulpotan ngan igintaod ini dida han upat nga mga kanto.

⁶Ginhimo niya in mga parasgan nga akasya, ginputos ini hin bronse,

⁷ngan iginsul-ot dida han mga maglidong nga sulpotan ha kada ligid han altar. Ginhimo niya an altar hin mga tabla ngan lungag ini nga altar.

⁸Ginhimo niya an palanggana nga bronse ngan an bronse nga tungtongan hini tikang han mga salaming han kababayen-an nga nag-aataman didto han agian han Tulda han GINOO.

⁹Para han alad han Tulda han GINOO ginhimo niya in mga biray ngalino nga pino. Didto han timogan nga ligid han Tulda, 44 ka metros an kahilaba han mga biray,

¹⁰nga tinukod hin 20 nga mga usok nga bronse dida hin 20 nga mga tungtongan nga bronse, upod in mga sab-itan ngan mga tuko nga hinimo hin salapi.

¹¹Amo ngahaw an alad didto han amihanan nga ligid.

¹²Didto han katundan nga ligid, may-ada mga biray nga 22 ka metros an kahilaba upod an napulo nga mga usok ngan napulo nga mga tungtongan, ngan upod an mga sab-itan ngan mga tuko nga salapi.

¹³Didto han sinirangan nga ligid, diin nakadto an agian, 22 ka metros liwat an kahaluag han alad.

¹⁴Dida han kada ligid han alad may-ada 6.6 ka metros nga mga biray, upod in tulo nga mga usok ngan tulo nga mga tungtongan.

¹⁶Hinimo hin lino nga pino an ngatanan nga mga biray palibot han alad.

¹⁷Hinimo hin bronse an mga tungtongan han mga usok, ngan hin salapi an mga sab-itan, an mga tuko, ngan an putos han mga uloulo han mga usok. Gindurudugtong pinaagi hin mga kable nga salapi an ngatanan nga mga usok palibot han alad.

¹⁸Hinimo hin lino nga pino an biray han agian han alad nga hinablonan hin asul, granate, ug pula nga delana, ngan binordahan. Siyam ka metros an kahilaba hini, ngan 2.2 ka metros an kahitaas, sugad han mga biray han alad.

¹⁹Tinukod ini hin upat nga mga usok dida hin upat nga mga tungtongan nga bronse. Hinimo hin salapi an mga sab-itan hini, an putos han mga uloulo hini, ngan an mga tuko hini.

²⁰Hinimo hin bronse an ngatanan nga mga talibugsok han Tulda ngan han nagpapalibot nga alad.

²¹Iini an lista han kadamo han mga metal nga nagamit didto han Tulda han GINOO nga ginhimosan han duha nga mga papan nga bato nga ginsuratan han Napulo nga Sugo. Sumala han sugo ni Moises ginlista ini han mga Levita nga nagbuhat ha ubos han pagdumara ni Itamar nga anak ni Aaron nga padi.

²²Ginhimo ni Bezalel nga anak ni Uri ngan apo ni Hur, nga sakop han tribo ni Juda, an ngatanan nga iginsugo han GINOO.

²³An iya kabulig nga hi Aholiab nga anak ni Ahisamac, nga sakop han tribo ni Dan, usa nga paraguhit, paradebuho, ngan parahablon hin lino nga pino, ngan hin delana nga asul, granate, ug pula.

²⁴May kabug-aton nga 1,000 ka kilo sumala han timbangan nga opisyal an ngatanan nga bulawan nga iginhalad ngadto han GINOO para han baraan nga Tulda.

²⁵Tinmimbang hin 3,430 ka kilo sumala han timbangan nga opisyal an salapi tikang han ginsensos nga bungto.

²⁶Amo ini nga kadamo han ngatanan nga iginbayad han ngatanan nga mga tawo nga ginsensos, nga an kada usa nagbayad han ginkikinahanglan nga kantidad, nga gintimbang sumala han timbangan nga opisyal. May 603,550 nga kalalaken-an nga 20 ka tuig ngadto ha igbaw an panuigon nga ginsensos.

²⁷Tikang han salapi nagamit in 3,400 ka kilo hin paghimo han 100 nga mga tungtongan nga 34 ka kilo an kada usa para han baraan nga Tulda ngan biray.

²⁸Ginhimo niya an nahisalin pa nga 24 ka kilo nga salapi nga mga tuko, mga sab-itan han mga usok, ngan an putos han mga uloulo hini.

²⁹Inmabot hin 2,425 ka kilo an bronse nga iginhalad ngadto han GINOO.

³⁰Tikang hini ginhimo niya an mga tungtongan han agian han Tulda han GINOO, an altar nga bronse upod an rehas hini nga bronse, an ngatanan nga kasangkapan han altar,

³¹an mga tungtongan para han palibot nga alad ngan para han agian han alad, ngan an ngatanan nga mga talibugsok para han Tulda ngan han palibot nga alad.