Read Waray Samarenyo Meaning Based Job 1 Bible Online

Job 1 - Waray Samarenyo Meaning Based bible

Job 1

¹May hadto tawo nga Job an ngaran, nga nag-ukoy didto han tuna han Uza.[1] Matadong an iya kinabuhi ug ginsingba niya an Dyos. Waray gud may nakakasoson han iya kinabuhi ngan mahirot hiya basi diri hiya makabuhat hin bisan ano nga maraot.

²May niya pito nga anak nga kalalaken-an ngan tulo nga anak nga kababayen-an.

³May-ada niya 7,000 nga mga karnero, 3,000 nga mga kamelyo, 1,000 nga mga baka, ngan 500 nga mga asno. Damo an iya mga surugoon, ngan hiya an giririkohi nga tawo didto ha sinirangan.

⁴Nabatasan han iya anak nga kalalaken-an an pagsarusaliwan hin pagkombite nga tinambogan nira ngatanan, ngan dayuday ginpapatampo nira an tulo nga ira kabugtoan nga kababayen-an.

⁵Ikinaaga kahuman han kada kombite, sayo pa nabangon hi Job ngan magtubod hiya hin mga halad ha paglinis han tagsa niya nga mga anak. Dayuday niya ini ginbubuhat kay naghunahuna hiya nga bangin la nakasala in usa ha ira hin pagpakaraot han Dyos, nga diri nira tinuyo.

⁶Han pag-abot han adlaw nga mapakita an langitnon nga mga binuhat[2] ha atubangan han GINOO, nakadto, upod ha ira hi Satanas.[3]

⁷Nagpakiana ha iya an GINOO, “Nag-inano ka la?” Binmaton hi Satanas, “Nagsinudoysudoy ako ngadto nganhi ngan naglinayawlayaw ako ha bug-os nga tuna.”

⁸Nagpakiana an GINOO, “Hinkit-an mo ba hi Job nga akon surugoon? Waray gud usa dida ha tuna nga makakasugad ha iya hin kamatinumanon ngan kamaupay. Masingbahon hiya ha akon ngan mahirot hiya basi diri hiya makabuhat hin bisan ano nga maraot.”

⁹Binmaton hi Satanas, “Magsisingba ba hi Job ha imo kon waray niya sadang makuha hini nga buhat?

¹⁰Dayuday ginpanalipdan mo hiya ngan an iya panimalay ngan an ngatanan nga iya gintatag-iya. Ginbendisyonan mo an ngatanan nga iya ginbubuhat, ngan tinagan mo hiya hin mga baka nga nakakaluob han bug-os nga tuna.

¹¹Kundi kon pananglit kuhaon mo ini ngatanan nga imo hatag ha iya, waray ruhaduha pagmamaldisyonon ka niya hin tinuod.”

¹²Nagsiring kan Satanas an GINOO, “Sigi, aada ha imo gahom an ngatanan nga gintatag-iya niya, kundi ayaw gud paglabti hi Job.” Sanglit linmakat hi Satanas.

¹³Usa ka adlaw han nagkokombite an mga anak ni Job didto han balay han ira gimamagurangi nga bugto nga lalake,

¹⁴inmabot ngadto kan Job in usa nga surugoon nga nagdadalagan. Nagsiring hiya, “Nag-aarado kami han kaumhan upod an mga baka ngan nakadto an mga asno hin hirani nga toril.

¹⁵Tigda la nga sinmulong an mga Sabiyanhon[4] ngan pinanikas ini ngatanan. Pinamatay nira an ngatanan nimo nga mga surugoon labot ha akon. Ako gudla an nakapalagiw hin pagsumat ha imo.”

¹⁶Waray pa hiya katatapos hin pagyakan, inmabot liwat in lain nga surugoon ngan nagsiring, “Ginlintian an mga karnero ngan an mga paramangno ngan nagkamatay hira ngatanan. Ako gudla an nakapalagiw hin pagsumat ha imo.”

¹⁷Samtang nagyiyinakan pa hiya, inmabot liwat in lain nga surugoon ngan nagsiring, “Ginrikopohan kami hin tulo nga hugpo hin mga parasulong nga Caldiyanhon,[5] gindara an mga kamelyo, ngan pinamatay an ngatanan nimo nga mga surugoon labot ha akon. Ako gudla an nakapalagiw hin pagsumat ha imo.”

¹⁸Waray pa hiya katatapos hin pagyakan, inmabot na liwat in lain nga surugoon ngan nagsiring, “Nagkokombite an imo mga anak didto han balay han imo suhag nga lalake,

¹⁹han pag-abot hin alipuros tikang ha kamingawan. Ginpukan an balay ngan namatay hira ngatanan. Ako gudla an nakapalagiw hin pagsumat ha imo.”

²⁰Niyan tinmindog hi Job ngan ginggisi an iya panapton tungod hin kabido. Ginkiskisan niya an iya ulo ngan kinmulob hiya ha tuna.

²¹Nagsiring hiya, “Natawo ako nga waray bisan ano, ngan mapatay ako nga waray bisan ano. Naghatag an GINOO, ngan yana ginbawi niya. Dayawon unta an iya ngaran!”

²²Bisan pa kon nahinabo ini ngatanan, waray hi Job magmahay ngan magbasol han Dyos; sanglit waray hiya makasala.