Read Waray Samarenyo Meaning Based Job 12 Bible Online

Job 12 - Waray Samarenyo Meaning Based bible

Job 12

¹Tinuod, amo kamo an tingog han mga tawo. Kon mamatay kamo, maupod an kinaadman ha iyo.

³Kundi may-ada ko man buot nga sugad nga may-ada niyo; diri gud ako ubos ha iyo; maaram an tagsatagsa han ngatanan nga iyo ginsiring.

⁴Gintataw-an na ako yana bisan han akon kasangkayan, nagtitinawa hira bisan kon matadong ako ngan waray ako sala; kundi may-ada hadto panahon nga ginbaton han Dyos an akon mga pag-ampo.

⁵Waray kamo mga kasamokan kundi gin-iintrimisan ako niyo; ginsusuntok niyo in tawo nga tikaturumba na.

⁶Kundi nag-uokoy ha kalinaw in mga kawatan ngan mga tawo nga diri nakilala hin Dyos, bisan kon an ira la diyos amo an kalugaringon nira nga kusog.

⁷Damo an igtututdo ha iyo han katamsihan ngan kamanampan;

⁸pakianhi an mga binuhat ha tuna ug ha dagat mahitungod han ira kinaadman.

⁹Maaram ini ngatanan nga ginhimo hira han kamot han GINOO.

¹⁰An Dyos amo an nagdudumara han kinabuhi han iya mga binuhat; aada ha iya gahom an kinabuhi han tagsa nga tawo.

¹¹Kundi sugad nga naruruyag an iyo dila hin pagtilaw hin pagkaon, naruruyag man an iyo mga durunggan hin pamati hin mga pulong.

¹²May kinaadman an mga kalagsan, kundi may kinaadman ngan gahom an Dyos. May pagsabot an mga kalagsan, kundi may pagsabot ngan gahom hin pagbuhat an Dyos.

¹⁴Kon nagbubungkag an Dyos, hin-o man in makakaayad? ngan hin-o an makakapagawas han tawo nga ginpripriso han Dyos?

¹⁵Naabot an huraw kon ginbubut-an han Dyos nga diri umuran; naabot an mga baha kon binubuhian niya an tubig.

¹⁶Makusog an Dyos ngan kanunay hiya madaogon, aada ha iya gahom an ginlilimbongan ngan an mga maglimbong.

¹⁷Binabawi niya an kinaadman hin mga punoan, ngan itinutugot niya nga masugad hin mga lurong an mga pangulo.

¹⁸Pinapalusad niya ha trono in kahadian ngan iya ini ginpripriso;

¹⁹ginpapaubos niya in kapadian ngan mga tawo nga gamhanan.

²⁰Pinapahilom niya in mga kasasarigan nga tawo, ngan kinukuha niya an kinaadman han mga kalagsan.

²¹Pinapakaalohan niya adton aada han kagamhanan, ngan hinuhukasan niya hin kusog in mga punoan.

²²Pinapawaan niya an mga dapit nga masirom sugad han kamatayon.

²³Ginhihimo niya nga makusog ug gamhanan in mga nasod, kundi katapos, iya gindadaog ngan ginpupukan liwat ini.

²⁴Hinihimo niya nga mga lurong an ira mga pangulo, ngan pinapagsudoysudoy hira nga nagugupong ngan nawawara;

²⁵nangangapkap hira ha kasisidman ngan nagruruogduog hira sugad hin mga hubog.