Read Waray Samarenyo Meaning Based Job 13 Bible Online

Job 13 - Waray Samarenyo Meaning Based bible

Job 13

¹Hinbatian ko na hadto, an ngatanan nga iyo iginsiring. Nakasabot ako hini ngatanan, maaram ako sugad nga maaram liwat kamo. Diri ako ubos ha iyo.

³Kundi nakikiglaris ako han Dyos, diri ha iyo; karuyag ko makiglantugi ha iya han akon kalipongan.

⁴Tinatahoban la niyo hin mga buwa an iyo katapang; sugad kamo hin mga doktor nga diri nakakatambal.

⁵Ayaw kamo hin pagyinakan, ngan may-ada makakahunahuna nga makinaadmananon kamo!

⁶Pamati samtang iginsusumat ko an akon sumbong.

⁷Kay ano nga nagbibinuwa kamo? Naghuhunahuna ba kamo nga makakabulig han Dyos an iyo mga buwa?

⁸Nagtitinguha ba kamo hin pagpanalipod han Dyos? Makikiglantugi ba kamo han iya kalipongan didto ha hukmanan?

⁹Kon pag-usisahon kamo hin maupay han Dyos, may-ada ba niya hiaagian dida ha iyo nga maupay? Naghuhunahuna ba kamo nga mauuwat niyo an Dyos sugad han pag-uwat niyo hin mga tawo?

¹⁰Bisan kon diri kamo magpakilala nga may-ada niyo pinalabi, sasawayon kamo niya,

¹¹ngan hahadlokon kamo han iya gahom.

¹²Sugad la hin mga agbon kawaray gamit an iyo mga darahonon; sugad la hin lutak kamaluya an iyo mga pangatadongan.

¹³Paghilom kamo ngan tugoti ako hin paghimangraw, ngan pasagdi nala kon ano an dumangat ha akon.

¹⁴Andam ako[26] hin pag-unong han akon kinabuhi.

¹⁵Nawad-an na ako han ngatanan nga paglaom, sanglit baga ano man kon patayon ako han Dyos? Kundi igsusumat ko manta ha iya an akon sumbong.

¹⁶Bangin ngani makatalwas ha akon an akon kaisog, kay waray maraot nga tawo nga magpapasipara hin pakig-atubang han Dyos.

¹⁷Yana pamatii hin maupay an akon pagsaysay.

¹⁸Andam na ako hin pagsumat han akon sumbong, kay maaram ako nga matadong ako.

¹⁹Makanhi ka ba hin pagsumbong ha akon, O Dyos? Kon imo ini pagbuhaton, andam ako hin paghilom ngan hin kamatay.

²⁰Paaroa ako hin duha nga butang; uyoni ini, ngan diri na ako matago ha imo;

²¹undang na hin pagkastigo ha akon, ngan ayaw ako paglisanga hin kahadlok ha imo.

²²Ikaw anay an pagyakan, O Dyos, ngan mabaton ako. Kon diri, ako anay an magyayakan ngan batona ako.

²³Ano an akon mga sala? Ano nga mga sayop an akon nabuhat? Ano nga pagtalapas an iginpahamtang ha akon?

²⁴Kay ano nga nalikay ka ha akon? Kay ano nga iniisip mo ako sugad hin usa nga kaaway?

²⁵Ginhahadlok mo ba ako? Usa la ako nga dahon; an imo ginlalanat usa la nga uga nga uhot.

²⁶Ginpasalawad mo in magpait nga mga sumbong kontra ha akon, bisan hiunong han akon mga ginbuhat han batan-on pa ako.

²⁷Kinakadenahan mo an akon mga tiil; binabantayan mo an akon tagsa nga pitad, ngan inuusisa mo pa ngani an mga tunob han akon mga tiil.

²⁸Tungod hini, napupukan ako sugad hin gabok nga kahoy, sugad hin gintatangkob nga bado.