Read Waray Samarenyo Meaning Based Job 14 Bible Online

Job 14 - Waray Samarenyo Meaning Based bible

Job 14

¹Natatawo kita ngatanan nga maluya ngan makalolooy. An kinabuhi han ngatanan haliputay ngan puno hin kasamokan.

²Naturok ngan sugad hin bukad nalalaya kita dayon; ngan napaanaw kita sugad hin mga lambong.

³Matan-aw ka ba ha akon, O Dyos, o dadad-on mo ba ako ngadto ha hukmanan ngan paghuhukman mo ba ako?

⁴Waray gud magawas nga malinis tikang hin bisan ano nga mahugaw sugad han tawo.

⁵Ginlarang na nga daan an kahilawig han iya kinabuhi— an kadamo han iya mga bulan. Igintalaan mo na ini, ngan diri na ini maliliwat.

⁶Ayaw siplat ha iya ngan pabay-i la hiya;[27] tugoti hiya hin pagpahimulos han iya makuri nga kinabuhi—kon makakahimo hiya.[28]

⁷May paglaom pa in usa nga kahoy nga ginpulod na; mabubuhi pa ini ngan mananaringsing.

⁸Bisan magurang an mga gamot hini, ngan mauga an tuod dida ha tuna,

⁹kundi kon katubigan ini, mananaringsing ini sugad hin linghod nga tanom.

¹⁰Kundi napatay in usa nga tawo, ngan amo ito an iya kataposan; napatay hiya, ngan hain man hiya?

¹¹Sugad hin mga salog nga diri na naawas, ngan mga lanaw nga hinubsan,

¹²napatay an mga tawo nga diri na gud mabangon. Diri na gud hira magmamata samtang may-ada pa kalangitan; magpapadayon na la hira hin pagkaturog.

¹³Karuyag ko unta nga tagoon mo ako didto han kalibutan han mga patay; patagoa ako tubtob han pagpapas han imo kasina, ngan unina pagtalaan hin panahon nga amo an imo paghinumdom ha akon.

¹⁴Kon mamatay in usa ka tawo, mabubuhi pa ba hiya? Kundi maghuhulat ako hin mauruupay nga mga panahon, maghuhulat ngada han katapos hini nga panahon hin kakurian.

¹⁵Niyan matawag ka ngan mabaton ako, ngan malilipay ka ha akon nga imo binuhat.

¹⁶Niyan babantayan mo an tagsa ko nga pitad, kundi diri mo pag-uusisahon an akon mga sala.

¹⁷Pasasayloon mo ngan hikakalimtan mo ini; paparaon mo an ngatanan nga mga sayop nga akon nabuhat.

¹⁸Maabot an panahon nga magtitimpag an kabukiran, ngan mababalhin an mga pangpang.

¹⁹Maibas an mga bato pinaagi han daganas han tubig ngan maaanas an tuna pinaagi hin makusog nga uran; sanglit binubungkag mo an kanan tawo paglaom han kinabuhi.

²⁰Dinadaog mo in usa ka tawo ngan pinapaiwas mo hiya ha kadayonan; ha kamatayon naliliwat an iya panagway.

²¹Nakarawat hin kadungganan an iya mga anak nga kalalaken-an, kundi diri gud niya ini hinbabaroan, diri liwat hiya ginsusumatan kon naaalohan hira.

²²An iya la inaabat amo an kamaol-ol han iya kalugaringon nga lawas ngan an kaguol han iya kalugaringon nga hunahuna.