Read Waray Samarenyo Meaning Based Job 16 Bible Online

Job 16 - Waray Samarenyo Meaning Based bible

Job 16

¹Hinbatian ko na hadto pa in sugad nga mga pulong; kasakitan la an pagliaw nga iyo ihinahatag ha akon.

³Waray ba kataposan an iyo pagyinakan? Dayuday ba kamo an mahatag han kataposan nga pulong?

⁴Kon kamo an ako ngan ako an kamo, makakayakan man ako han ngatanan nga iyo ginyiyinakan. Makakahimo ako hin pagpilingpiling ha iyo ngan paglumsan ko kamo pinaagi han baha hin mga pulong.

⁵Makakagpadasig ako ha iyo pinaagi hin sagdon ngan magyiyinakan ako hin pagliaw ha iyo.

⁶Kundi diri man nakakabulig an bisan ano nga akon igyinakan, ngan an paghilom diri man nakakaiban han akon pag-antos.

⁷Ginpagul-an mo ako, O Dyos; itinugot mo nga patayon an akon panimalay.

⁸Gindakop mo ako; kaaway ko ikaw. Panit ngan mga tul-an na la ako, ngan gin-isip ini han mga tawo nga tinuod nga ako salaan.[34]

⁹Tungod han iya kasina ginpipikaspikas ako han Dyos, ginpapamudlatan ako niya tungod hin kapungot.

¹⁰Ginyuyubitan ako han mga tawo; gin-aalirongan ngan gintatampalo ako nira.

¹¹Igintubyan ako han Dyos ngadto hin magraot nga mga tawo.

¹²Nag-ukoy ako ha kalinaw, kundi ginpitlok ako han Dyos, iginrambo ngan gindugmok ako. Ginhimo ako han Dyos nga punta blanko han iya mga pagpunting,

¹³ngan pinapana ako niya paluyoluyo— mga pana nga natahos ngan nasamad ha akon; ngan waray gud hiya magpakita hin kalooy.

¹⁴Nakadamo ako niya pagsamara; sinusulong ako niya sugad hin sondalo nga natuyaw tungod hin kapungot.

¹⁵Nagmasulob-on ako ngan nagbado ako hin sako, ngan nalingkod ako ha tuna ngan waray ko na kusog hin pag-ato.

¹⁶Nagtinangis ako tubtob han pamula han akon bayhon, ngan panhupong ngan panngapay han akon mga mata,

¹⁷kundi waray ako salin hin panlupig hin tawo, ngan kinasingkasing an akon pag-ampo ha Dyos.

¹⁸O Tuna, ayaw gad pagtagoa an mga sayop nga ginbuhat ha akon! Ayaw gad paghiloma an akon pagtawag han katadongan!

¹⁹May-ada usa didto ha langit nga matindog ngan madapig ha akon.

²⁰Ginyuyubit ako han akon kasangkayan; nadaligdig ha akon mga mata in mga luha ngadto ha Dyos.

²¹Karuyag ko nga may mangamuyo ha Dyos para ha akon, sugad hin tawo nga nangangamuyo para han iya sangkay.

²²Nalabay na an akon mga tuig, ngan naglalakat ako ha dalan nga waray na pagbalik.