Read Waray Samarenyo Meaning Based Job 18 Bible Online

Job 18 - Waray Samarenyo Meaning Based bible

Job 18

¹Job, diri ba gud makakahimo hin paghilom in mga tawo nga sugad ha imo? Kon umukoy ka la ngan mamati, makakaghimangraw kami ha imo.

³Ano in pakasiring nimo nga sugad kami hin mga baka hin kaowat?

⁴Gindadaot mo la an imo kalugaringon tungod han imo kasina. Babayaan ba an tuna tungod han imo kasina? Babalhinon ba han Dyos an kabukiran basi makalipay hiya ha imo?

⁵Paparongon gihapon an suga han maraot nga tawo; diri na gud ini malaga.

⁶Magmamasirom an suga sakob han iya tulda.

⁷Hadto matapod an iya mga pitad, kundi yana nahipapakdol na hiya; natutumba hiya tungod han iya maraot nga mga larang.

⁸Naglalakat hiya ngadto hin pukot ngan nagagapos an iya mga tiil;

⁹nabibitik an iya mga tikod ngan diri na gud hiya makakagawas.

¹⁰May tinago nga bitik dida ha tuna; iginbutang in usa nga pukot dida han iya aragian.

¹¹Bisan diin naglilibot an kakulba; nasunod ini ha iya bisan hiya diin magpitad.

¹²Riko hiya anay, kundi yana ginugutom na hiya; natindog ngan naghuhulat ha iya ligid an karat-an.

¹³Naluluob an iya lawas hin makamaratay nga sakit, nga nakakapadunot han iya mga butkon ngan mga bitiis.

¹⁴Ginpipirit hiya hin paggawas ha tulda nga iya gin-ukyan nga malinawon, ngan dinadanas hiya hin pag-atubang kan Hadi Kamatayon.

¹⁵Yana makakaukoy in bisan hin-o didto han iya tulda[37] katapos igpasarang in asufre ha paglinis hini.[38]

¹⁶Laya ngan uga na an iya mga gamot ngan mga sanga.

¹⁷Natapos an iya kabantogan didto han iya kalugaringon nga tuna ngan didto ha kahigrayuan; waray na gud nahinunumdom ha iya.

¹⁸Paiiwason hiya tikang han tuna han mga buhi, tikang han kapawa ngadto han kasisidman.

¹⁹Waray niya mga tulin, waray mga nahibilin nga buhi.

²⁰Tikang ha sinirangan ngadto ha katundan, nangungurog hin kahadlok an ngatanan nga nakakabati han iya kasugaran.

²¹Amo ito an dadangatan han magraot nga mga tawo, an dadangatan hadton mga diri nanginginlabot han Dyos.