Read Waray Samarenyo Meaning Based Job 19 Bible Online

Job 19 - Waray Samarenyo Meaning Based bible

Job 19

¹Kay ano nga ginsasakit ako niyo pinaagi hin mga pulong?

³Diri kamo nahunong hin pagtamay ha akon ngan diri kamo naaawod han iyo pagraogdaog ha akon.

⁴Kon nakasayop ako, akon la ini, waray niyo hini labot.

⁵Naghuhunahuna kamo nga mauruupay kamo ha akon, ngan gin-iisip niyo an akon mga kakurian nga nagpapamatuod nga salaan ako.

⁶Diri ba kamo maaram nga an Dyos amo an nagbuhat hini? Iginbutang niya in bitik hin pagdakop ha akon.

⁷Nariwa ako han iya pagraogdaog, kundi waray man namamati; waray namamati han akon pagtawag hin katadongan.

⁸Gin-ulang han Dyos an akon dalan, ngan diri ako nakakaagi; masirom hin duro ug diri ako nakakatoltol han akon dalan.

⁹Ginkuha niya an ngatanan ko nga manggad, ngan gindaot niya an akon dungog.

¹⁰Ginhampak niya an akon bug-os nga lawas. Ginggabot niya an akon paglaom ngan binayaan ako niya basi malaya ngan mamatay.

¹¹Nasisina ngan napupungot gud ha akon an Dyos; gindudumara ako niya sugad han iya labi nga gindudumtan nga kaaway.

¹²Ginsusugo niya an iya kasondalohan hin pagsulong ha akon; nag-uukab hira hin tuna hin paghimo hin mga trinsera ngan ginpapalibotan nira an akon tulda.

¹³Itinugot han Dyos nga igsikway ako han akon kabugtoan nga kalalaken-an; ngan diri na ngani nakilala ha akon an akon hadto kasangkayan;

¹⁴waray na an akon kauropdan ngan kasangkayan.

¹⁵Hinngalimtan na ako hadton mga gindapit ngadto han akon balay; gin-iisip ako han akon mga surugoon nga kababayen-an sugad hin lumalangyaw ug diri kinikilala nga tawo.

¹⁶Kon natawag ako hin usa nakon nga surugoon, diri hiya nabaton, bisan kon hinahangyo ko hiya hin pagbulig ha akon.

¹⁷Diri nailob an akon asawa han baho han akon ginhawa, ngan diri napahirani ha akon an akon kalugaringon nga kabugtoan nga kalalaken-an.

¹⁸Gintatamay ngan gintatawaan ako han kabataan kon nakita hira ha akon.

¹⁹Ginkakadiri ako han akon gisusuoki nga kasangkayan; ginkontra na ako hadton akon minahal nga mga hinigugma.

²⁰Nahukal an akon panit ha akon mga tul-an; haros na ako mamatay.[39]

²¹Akon kamo kasangkayan! Kaluoyi gad ako niyo! Ginhampak ako han kamot han Dyos.

²²Kay ano nga pagpapakurian man ako niyo sugad han pagpakurii ha akon han Dyos? Diri pa ba igo an pagsakita niyo ha akon?

²³Karuyag ko unta nga may-ada manumdom han akon mga pulong ngan igsurat ini dida hin basahan!

²⁴O pinaagi hin tigib iguhit an akon mga pulong dida hin bato, ngan igsurat ini basi diri hingalimtan ha kadayunan.[40]

²⁵Kundi maaram ako nga may-ada usa didto ha langit nga maabot ha kataposan hin pagpanalipod ha akon.

²⁶Bisan kon ginkaon na hin sakit an akon panit, samtang aanhi pa ako hini nga lawas[41] makita ako han Dyos.[42]

²⁷Makita ako ha iya pinaagi han akon kalugaringon nga mga mata, ngan diri na hiya usa nga diri kinikilala. Waray na an akon kadasig kay nagsiring kamo,

²⁸“Uunanhon man namon hin pagsakit ha iya?” Namiling kamo hin pasangil hin pagsulong ha akon.

²⁹Kundi yana, kahadloki niyo an espada— an espada nga nagdadara han kanan Dyos kapungot han sala, basi hibaroan niyo nga may-ada usa nga naghuhukom.[43]